ނައިބު ރައީސް ޙުސައިން މުޙައްމަދު ލަޠީފް، ޑިސެންބަރު 4 އިން 14 އަށް ރާއްޖެއިން ބޭރަށް ކުރެއްވި ދެ ދަތުރުފުޅުގެ ޚަރަދު ތަކުގެ ތަފްސީލް ރައީސް އޮފީހުން ހާމަކޮށްފިއެވެ. 

މި ދެ ދަތުރުފުޅަކީ އެމަނިކުފާނު “ޗައިނާ-އިންޑިއަން އޯޝަން ރީޖަން ފޯރަމް އޮން ޑިވެލޮޕްމަންޓް ކޯޕަރޭޝަން” ގައި ބައިވެރިވެވަޑައިގަތުމަށް ކުރެއްވި ރަސްމީ ދަތުރުފުޅާއި، “ޔުނިވަރސަލް ޑިކްލަރޭޝަން އޮފް ހިއުމަން ރައިޓްސް” އަށް 75 އަހަރު ފުރުމުގެ މުނާސަބަތު “ހިއުމަން ރައިޓްސް 75” ފާހަގަކުރުމަށްޓަކައި ބޭއްވި މަތީ ފަންތީގެ ހަރަކާތްތަކުގައި ބައިވެރިވެވަޑައިގަތުމަށް ކުރެއްވި ރަސްމީ ދަތުރުފުޅެވެ. 

ދެ ދަތުރުފުޅަށް ހޭދަވި ޚަރަދުގެ ތަފްސީލް ހާމަކޮށް ރައީސް އޮފީހުން މީޑިއާ ތަކަށް ފޮނުވި މަޢުލޫމާތުގައިވާ ގޮތުން، ރައީސުލްޖުމްހޫރިއްޔާގެ ނައިބު ޗައިނާ އަދި ޖެނީވާއަށް ކުރެއްވި ދަތުރުފުޅުގެ ޖުމްލަ ޚަރަދަކީ 3،189،544.58 (ތިން މިލިއަން ސަތޭކަ އައްޑިހަ ނުވަހާސް ފައްސަތޭކަ ސާޅީސް ހަތަރު ރުފިޔާ ފަންސާސްއަށްލާރި އެވެ.

ވަކި ވަކި ޚަރަދަށް ބަލާލާއިރު، އެ ދެ ދަތުރުފުޅުގެ ޓިކެޓްތަކުގެ ޖުމްލަ ޚަރަދަކީ 2،413،029.54 (ދެ މިލިއަން ހަތަރުސްތޭކަ ތޭރަ ހާސް އޮނަތިރީސް ރުފިޔާ ފަންސާސް ހަތަރު ލާރި) އެވެ. އެއީ ނާއިބު ރައީސް އާއި އަރިހުގައި ވަޑައިގެންނެވި 16 ފަރާތުގެ ޓިކެޓްގެ އަގެވެ. އެތަނުން ފަސްޓް ކުލާހުގައި ދަތުރު ކުރެއްވީ ނާއިބު ރައީސް އެކަންޏެވެ. ދެން ތިއްބެވި 4 ބޭފުޅުން ބިޒްނަސް ކްލާސްގައި ދަތުރު ކުރެއްވި އިރު، ބާކީ 12 ބޭފުޅުން ކުރެއްވީ އިކޮނޮމީ ކްލާސް ގައެވެ. 

ރައީސް އޮފީހުން ބުނިގޮތުގައި، ނާއިބު ރައީސް ފަސްޓް ކްލާހުގައި ދަތުރު ކުރެއްވީ ބިޒްނަސް ކްލާހުން ޓިކެޓް ލިބިވަޑައިނުގެންނެވުމުންނެވެ. 

މީގެ އިތުރުން އެ އޮފީހުން އާއްމު ކުރި މައުލޫތުން އެނގޭ ގޮތުން ނާއިބު ރައީސް ޗައިނާއަށް ކުރެއްވި ރަސްމީ ދަތުރުފުޅުގެ ޖުމްލަ ޚަރަދަކީ 180،735.90 (އެއްލައްކަ އައްޑިހަ ހާސް ހަތްސަތޭކަ ތިރީސް ފަސް ރުފިޔާ ނުވަދިހަ ލާރި) އެވެ.

އަދި ރައީސުލްޖުމްހޫރިއްޔާގެ ނައިބު ޖެނީވާއަށް ކުރެއްވި ދަތުރުފުޅުގެ ޖުމްލަ ޚަރަދަކީ 595،779.14 (ފައްސަތޭކަ ނުވަދިހަ ފަސްހާސް ހަތްސަތޭކަ ހަތްދިހަނުވަ ރުފިޔާ ސާދަ ލާރި) އެވެ.

ޗައިނާ ދަތުރުފުޅުގައި ވަފުދުގެ ބޭފުޅުންނަށް ހުރުމާއި، ފަރިއްކޮޅާއި، އެތެރޭގެ ދަތުރުފަތުރުގެ ޚަރަދުތައް ހަމަޖައްސަވައިދެއްވާފައި ވަނީ ޗައިނާގެ ސަރުކާރުންނެވެ.

ރައީސުލްޖުމްހޫރިއްޔާ ވަނީ އެމަނިކުފާނާއި، ރައީސުލްޖުމްހޫރިއްޔާގެ ނައިބު ރާއްޖެއިން ބޭރަށް ކުރައްވާ ދަތުރުފުޅުގެ ޚަރަދުތައް އެދަތުރެއް ނިންމަވައި ވަޑައިގަންނަވާތާ ގިނަވެގެން 15 ދުވަހުގެ ތެރޭގައި ހާމަ ކުރައްވާނެކަމުގައި ވިދާޅުވެފައެވެ. އަދި އެގޮތުގެ މަތިން މިހާތަނަށް ކުރެވުނު ހުރިހާ ދަތުރެއްގެ ވެސް ތަފްސީލް ވަނީ ދެއްވާފައެވެ.