ފުޓްބޯޅަ އެސޯސިއޭޝަން އޮފް މޯލްޑިވްސް ގެ އިންތިހާބުގެ ކަންކަން ކުރިއަށް ނުގެންގޮސް ހުއްޓާލުމަށް، ސްޕޯޓްސް ކޮމިޝަނުން މިއަދު އެއިދާރާ އަށް އަންގައިފި އެވެ.

2024 ވަނަ އަހަރުގެ ޖެނުއަރީ 31 ގައި ބާއްވަން ތައްޔާރު ވަމުންއަންނަ އިންތިހާބު ފަސް ކުރަން ސްޕޯޓްސް ކޮމިޝަނަރު އެންގެވީ ސުވާލު އުފެދޭ ކަންތައްތަކެއް ހުރުމުން، ކަމަށް ސްޕޯޓްސް ކޮމިޝަނާ އޮފީހުން ނެރުނު ބަޔާނުގައި ބުނެފައި އެވެ.

އެ ބަޔާނުގައި ބުނެފައި ވަނީ، އެފްއޭއެމްގެ ރައީސް ބައްސާމް އަދީލް ޖަލީލްގެ ދައުރު ހަމަވާން ހަ މަސް ދުވަސް ބާކީ އޮއްވައި، އިންތިހާބު 45 ދުވަހުގެ ތެރޭގައި ބާއްވަން އެގްޒެކެޓިވް ކޮމިޓީން ނިންމި އިރު، އެ ކޮމިޓީގެ ގާނޫނީ ސައްހަކަން ގެއްލިފައިވާ ކަމަށެވެ.

މީގެއިތުރުން ކޮމިޝަނާގެ ބަޔާނުގައި ބުނެފައިވާ ގޮތުން، އެފްއޭއެމްގެ އެކްސްކޯގެ މެންބަރުކަމުގެ ތެރެއިިން ދާދިފަހުން އިސްތިއުފާ ދިން ތިން މެންބަރުން އިސްތިއުފާ ދިން ތާރީޚާއި އެފްއޭއެމްގެ އިންތިހާބު އިއުލާން ކުރި ތާރީޚާ މެދު ސުވާލު އުފެދޭ ކަންތައްތަކެއް އެބަހުއްޓެވެ. އަދި އެފްއޭއެމްގެ ފަސް މެންބަރުން އިސްތިއުފާ ދީފައި ވުމުން، އިންތިހާބު އިއުލާން ކުރި ތާރީހުގައި ވެސް ބައްސާމްގެ އެގްޒެކެޓިވް ކޮމިޓީގެ ގާނޫނީ ހައިސިއްޔަތު ގެއްލިފައިވާކަން މި ބަޔާނުގައި ފާހަގަ ކޮށްފައިވެއެވެ.

މިމަހު އެފްއޭއެމް އެކްސްކޯ އިން އިސްތިއުފާ ދިން، ޓީސީގެ އަހްމަދު ނަޝީދު (ޓީސީ ޑޭވް) އާއި މުހައްމަދު ޝަފީއު އަދި އެކްސްކޯގެ އަންހެން މެންބަރު އާމިނަތު ޝާނީޒު އިސްތިއުފާ ދީފައިވާ ސިޓީގައި ވާގޮތުން، އެ ތިން މެންބަރުން އިސްތިއުފާ ދީފައި ވަނީ މި މަހު 15 ވަނަ ދުވަހުކަން އެނގިފައިވާ ކަމަށް ކޮމިޝަނާގެ ބަޔާނުގައި ވެ އެވެ.

އަދި އޭގެ ކުރިން އިސްތިއުފާ ދިން، މުާޒިޔާގެ ސީއީއޯ ހުސައިން ޝާފިއު (ކޮކީ) އާއި ގްރީން ސްޓްރީޓްސްގެ ރައީސް މުއާވިޔަތު ހަލީލު އިސްތިއުފާ ދީފައި ވަނީ 16 ސެޕްޓެމްބަރު އަދި އޮކްޓޯބަރު ފަހެއްގައިކަން ވެސް ބަޔާނުގައި ފާހަގަ ކޮށްފައި ވެއެވެ.

އެކަމަކު ޝާފިއު އާއި މުއާވިޔަތު އިސްތިއުފާ ދިން ފަހުން، އެފްއޭއެމްގެ ޑެޕިޔުޓީ ޖެނަރަލް ސެކްރެޓަރީ އަބްދުالله ޝިބާއު އެގްޒެކެޓިވް ކޮމިޓީ އަށް އައްޔަން ކުރުމަށް، އެ ކޮމިޓީން ނިންމިކަން އެފްއޭއެމުގެ ރައީސް ބައްސާމް ވަނީ އިއުލާން ކޮށްފަ އެވެ.

އިންތިހާބު 45 ދުވަހުގެ ތެރޭގައި ބާއްވަން، އެ އެސޯސިއޭޝަނުގެ އެކްސްކޯ އިން ނިންމާފައިވާކަން، މި މަހު 17 ވަނަ ދުވަހު އެފްއޭއެމުން ވަނީ އިއުލާންކޮށްފަ އެވެ. އެ ނިންމުމާ ގުޅޭ ގޮތުން ފަސް ކަމެއްގެ ތަފުސީލު ހޯދަން ސްޕޯޓްސް ކޮމިޝަނާ އެދުމުން ވެސް އެ މައުލޫމާތު އެފްއޭއެމުން ދީފައި ނުވާކަން ވެސް، އިންތިހާބުގެ މަސައްކަތް ހުއްޓާލުމަށް ސްޕޯޓްސް ކޮމިޝަނާ އަމުރު ކުރި އެންގުމުގައި ވެއެވެ.

އެކަންކަން ފާހަގަކޮށް، ސްޕޯޓްސް ކޮމިޝަނާގެ ބަޔާނުގައި ބުނެފައިވަނީ، އެ އެސޯސިއޭޝަންގެ ކަންތައްތައް އިތުރަށް ކުރިއަށް ގެންދިއުމަށް، ފީފާ އާއި އޭއެފްސީ އަދި އޮލިމްޕިކް ކޮމިޓީއާ އެކު އިތުރަށް މަޝްވަރާކޮށް ގޮތެއް ނިމެންދެން އިންތިހާބުގެ ކަންކަން ހުއްޓާލުމަށް ސްޕޯޓްސް ކޮމިޝަނާ އަންގާފައިވާ ކަމަށެވެ.