“މަދިރިން ރައްކާ” ގެ ނަމުގައި މަދިރި އާއި މަދިރި އުފެދޭ ތަންތަން ނައްތާލުމުގެ ޤައުމީ ހަރަކާތެއް ފަށައިފިއެވެ.

މި ހަރަކާތް ފެށުމުގެ ރަސްމިއްޔާތުގައި ބައިވެރިވެ ވަޑައިގެން މި ހަރަކާތް ރަސްމީކޮށް ފައްޓަވައި ދެއްވައިފައިވަނީ ނައިބު ރައީސް ހުސެއިން މުޙައްމަދު ލަތީފެވެ.

ނައިބު ރައީސް ހުސެއިން ވަނީ މިރަސްމިއްޔާތުގައި ވާހަކަފުޅު ދައްކަވައިފައެވެ. ނައިބުރައީސްގެ ވާހަކަފުޅުގައި ވިދާޅުވީ މަދިރީގެ ޒަރިއްޔާއިން ޖެހޭ ބައެއް ބަލިތައް ރާއްޖެއިން ނައްތާލެވިފައި ވީނަމަވެސް ފައިލޭރިއާ ފަދަ ބަލިތަކުގެ ކޭސްތަކެއް އަލުން ފެނުމަކީ ރައްޔިތުންގެ ކަންބޮޑުވުން އޮންނާނެ ކަމެއް ކަމަށެވެ.

އަދި ސަރުކާރުގެ މުއައްސަސާތަކާއި އާންމު މަދަނީ ޖަމްއިއްޔާތަކާއި ރައްޔިތުން ގުޅިގެން މިފަދަ ކެމްޕެއިނެއް ފެއްޓުމަކީ ރައްޔިތުންނަށް ހިތްހަމަޖެހުން ގެނެސްދޭނެ ކަމެއް ކަމަށް އެމަނިކުފާނު ވިދާޅުވިއެވެ.

މިރަސްމިއްޔާތުގައި ހެލްތް މިނިސްޓަރ ޑރ ޢަބްދުﷲ ޙަލީލްވެސް ވަނީ ވާހަކަފުޅުދައްކަވައިފައެވެ. ޑރ ޙަލީލް ވިދާޅުވެފައިވަނީ މިއަދު މި ކެމްޕެއިން ފެށިނަމަވެސް ކޮންމެ ދުވަހަކީ ވެސް މަދިރި ނައްތާލަން މަސައްކަތް ކުރާ ދުވަހަކަށް ހެދުމަށެވެ.

މި ހަރަކާތަކީ ހެލްތު މިނިސްޓްރީ އާއި ސަރުކާރުގެ ހުރިހާ މިނިސްޓްރީތަކާ ކުންފުނިތަކާއި އަމިއްލަ ޖަމިއްޔާތައް ގުޅިގެން މަދިރިން ރައްކާތެރިވުމަށް މުޅި ރާއްޖޭގައި ސާފުކުރުމުގެ ކެމްޕެއިނެކެވެ.

މާލެ ސަރަހައްދުގެ އިތުރުން މިހަރަކާތް ރާއްޖޭގެ ހުރިހާ ރަށެއްގައިވެސް މިހަރަކާތައް ހިންގުމަށް ވަނީ ހަމަޖެހިފައެވެ.