މާލޭގެ މޭޔަރު ކަމަށް އައްޔަނު ވުމުން ފުރަތަމަ 100 ދުވަހުގެ ތެރޭގައި މާލޭގެ ޓްރެފިކް މައްސަލަ ހައްލުކުރުމަށް މާސްޓަރޕްލޭން އެއް ތައްޔާރު ކޮށްދެެއްވާނެ ކަމަށް ޕީޕީއެމް/ޕީއެންސީގެ ފަރާތުން މާލޭ މޭޔަރު ކަަމަށް ވާދަކުރައްވާ އަލްއުސްތާޒާ ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.

ޢާޒިމާ މިހެން ވިދާޅުވީ ސަންގު ޓީވީން ރޭ ކުރިއަށް ގެންދިޔަ ސަންގު ބަހުސް ގައި ވާހަކަ ދައްކަވަމުންނެވެ.

މާލޭގެ ޓްރެފިކް މައްސަލަ ހައްލު ކުރުމާއި ގުޅޭ ގޮތުން ހުށައެޅުނު ސުވާލަށް ޖަވާބު ދެއްވަމުން ޢާޒިމާ ވިދާޅުވީ މާލޭގެ ޓްރެފިކްގެ މައްސަލަތައް ހައްލުކުރުމަށް އެންމެ ފުރަތަމަ އެމައްސަލަތައް ދިމާވާ ސަބަބު ދެނެގަންނަން ޖެހޭ ކަމަށެވެ.

ޢާޒިމާ ވިދާޅުވީ މާލެގައި އޮތީ ހަމައެކަނި ޓްރެފިކްގެ މައްސަލަތައް އެކަނި ނޫން ކަމަށާއި މާލޭގައި މިހާރު އޮތީ “ޓޯޓަލް ގަވަރނެންސް ފެއިލިއަރ” ކަމަށެވެ.

ޢާޒިމާގެ ވާހަކައިގައި މާލޭގެ ޓްރެފިކް މައްސަލަތައް މިހާބޮޑުވެގެންދާ ސަބަބުތަކަށް ބައްލަވައިލައްވައި ވާހަކަފުޅު ދައްކަވައިފައިވެއެވެ.

އެގޮތުން ޢާޒިމާ ވިދާޅުވީ ފުލުހުން މިހާރު ބުނަމުންގެންދަނީ އެބޭފުޅުން މިހާރު ވެހިކަލްއެއް ޓޯ ނުކޮށްވޭތޯ ބައްލަވާ ކަމަށެވެ. އޭގެ މާނައަކީ ޓޯޔާޑުގަ ޖާގައެއް ނެތް ކަން ކަމަށާއި، ކިތަންމެވަރަކަށް ޤަވާއިދާއި ޚިލާފަށް ޕާކުކޮށްފައި އޮތަސް ޓޯޔާޑަކަށް ނުނެގޭނެ ކަން ކަމަށް ޢާޒިމާ ވިދާޅުވިއެވެ.

މީގެއިތުރުން ޓޯޔާޑް މިހާރު ބޭނުން މިކުރަނީ ވެހިކަލް ތައް ރާއްޖެއިން ބޭރުން ގެނެސްގެން ވިއްކެން ދެން ބާއްވާތަނެއްގެ ގޮތުގައި ކަމަށާއި، ތިންމަސް ދުވަސް ވަންދެން ހިލޭ އެތާންގަ ވެހިކަލް ބޭއްވޭ ކަމަށެވެ. އަދި މަގުމަތީ ވެހިކަލް ބާއްވާފަ ވިއްކެން ދެން އެބޭނުން ކުރެވޭ ކަން ވެސް ޢާޒިމާ ފާހަަގަ ކުރެއްވެވިއެވެ.

ޢާޒިމާ ވިދާޅުވީ މާލޭގެ ޓްރެފިކްގެ މައްސަލަ ބޮޑުވާ އެއްމައްސަލަ އަކީ އެއީ ކަމަށެވެ.

ޤަވާއިދުގައި ފަސް އަހަރުވެފައޮތް އުޅަނދެއް ރާއްޖެއަކަށް އެތެރެ ނުކުރެވޭނެ ކަމަށް އޮތް ކަމަށާއި، މިދިޔަ ސަރުކާރުން ކަންކުރަމުން އައީ އެއާ ޚިލާފަށް ކަމަށް ޢާޒިމާ ވިދާޅުވިއެވެ.

އެގޮތުން ޓްރާންސްޕޯރޓް މިނިސްޓްރީގެ ހުއްދަ އާއެކު ދުވާލެއްގެ މައްޗަށް 200 ވެހިކަލް ވެސް މާލޭގައި ރެޖިސްޓަރ ކޮށްދީފައި ވާކަމަށް އޭނާ ވިދާޅުވި އެވެ.

ދަރިން ގޮވައިގެން ރައްކާތެރިކަމާއި އެކު ސްކޫލަށް ގެންދެވޭނެ މަގުތަކެއް ގާއިމް ކޮށްދޭން ޖެހޭ ކަމަށް ޢާޒިމާ ވިދާޅުވިއެވެ.

“އަޅުގަނޑުމެންނަށް ސީރިއަސް ރަނގަޅު މާސްޓަރ ޕްލޭނެއް އަންނަންޖެހޭނެ، އިރާދަކުރެއްވިއްޔާ މާލޭގެ ޓްރެފިކް މައްސަލައަށް މާސްޓަރ ޕްލޭނެއް އަޅުގަނޑުގެ 100 ދުވަހުގެ ތެރޭގައި ތަޢާރަފްކޮށްދޭނަން” ޢާޒިމާ ވިދާޅުވިއެވެ.

ސަންގު ބަހުސް ގައި ޕީޕީއެމް/ޕީއެންސީގެ ކެންޑިޑޭޓް ޢާޒިމާ ޝަކޫރުގެ އިތުރުން ޑިމޮކްރެޓްސްގެ ސައިފް ފާތިޙާއި ޕީއެންފެގެ ހުސެއިން ވަހީދު އަދި އަމިއްލަ ގޮތުން ވާދަކުރައްވާ ޝުޢައިބް ޢަލީ ވެސް ބައިވެރިވެ ވަޑައިގަތެވެ. ބަހުސްގައި ބައިވެރިވެވަޑައިގެންފައި ނުވަނީ އެމްޑީޕީގެ ކެންޑިޑޭޓް އާދަމް ޢާޒިމް އެވެ.