ކުށް ކުރާ ގުރޫޕްތަކުން، އެފަދަ ކަން ކަމުގައި ބޭނުން ކުރާ ކުދިކުދިން ޑިޕާޓްމަންޓް އޮފް ޖެނެރަލް ޖަސްޓިސްއަށް ނަގައި، އެފަދަ ކުދިން ރިހެބިލިޓޭޓް ކުރުމުގެ މަސައްކަތް ކުރުމަށް މަޝްވަރާ ކުރަމުންދާ ކަމަށް ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވެއްޖެއެވެ.
ޕޮލިސް ކޮމިޝަނަރުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ޝުޖާޢު ވިދާޅުވީ، ކުށް ކުރާ ގުރޫޕް ތަކުގެ ނުރައްކާތެރިކަން މާލެއާއި ރާއްޖޭގެ ބޮޑެތި ސިޓީ ތަކުގައިވެސް އޮތް ކަމަށެވެ. އަދި އެފަދަ ގުރޫޕްތަކުން، 18 އަހަރުން ދަށުގެ ކުދިން ކުށުގެ ވެއްޓަށް ވައްދަމުންދާ ކަންވެސް ފުލުހުންގެ ރިކޯޑްތަކުން ހާމަވާ ކަމަށް ކޮމިޝަނަރ ފާހަގަކުރެއްވިއެވެ.
ވީމާ މިފަހަ، މި ފަދަ ގުރޫޕްތަކަށް އަމާޒުކޮށްގެން ކަންކަން އެންފޯސް ކުރުމުގެ އިތުރުން، މިކަން ކަމުގައި އުޅޭ ކުޑަކުދިންނަށް އަމާޒުކޮށްގެން ޑިޕާޓްމަންޓް އޮފް ޖެނެރަލް ޖަސްޓިސްއާ ގުޅިގެން އެކުދިން ނަގައި، އެ ޑިޕާޓްމަންޓާއި ގުޅިގެން އެފަދަ ކުދިން ރިހެބިލިޓޭޓް ކުރުމުގެ މަސައްކަތް ކުރުމަށް މަޝްވަރާތައް ދަނީ ކުރެވެމުން. މިކަމަށް ފުލުހުންގެ ފަރާތުން ދޭންޖެހޭ ހުރިހާ އެއްބާރުލުމެއް ދޭނެ ކަނުގެ ޔަގީންކަން އަރުވަން.
ސީޕީ ޢަލީ ޝުޖާޢު
ކޮމިޝަނަރ ވަނީ، ކުށްކުރާ ކުދިން ރިހެބިލިޓޭޓް ކުރުމުގެ މަސައްކަތް މީގެ ކުރިންވެސް ވަރަށް ކާމިޔާބު ކަމާއި އެކު ފޭދޫ ފިނޮޅުގައި ކޮށްފައިވާ ކަން ފާހަގަކުރައްވާފައެވެ.
މީގެ އިތުރުން، ކުށް ކުރާ ގުރޫޕް ތަކުގެ ބޮޑުންނާއި ހަމައަށް ވާސިލް ވުމަށް ކުރަންޖެހޭ ކަންކަންވެސް މި ދައުރު ތެރޭގައި ކުރައްވާނެ ކަމަށް ކޮމިޝަނަރ ޝުޖާޢު ވިދާޅުވި އެވެ.
އަދި ކުށްކުރާ ގުރޫޕްތައް ހުއްޓުވުމަށް ގާނޫނު ތަކަށް ގެންނަން ޖެހޭ ބަދަލުތައް ގެނައުމުގެ މަސައްކަތް ވެސް ކުރައްވާނެ ކަމަށް ޝުޖާޢު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
