ސޯޝަލް ހައުސިން ޔުނިޓްތަކުގެ ކުލި ނުދެއްކުމުގެ ސަބަބުން މިއަދާއި ހަމައަށް އަރާފައިވާ ޖޫރިމަނާތައް ދިވެހި ސަރުކާރުން މިއަދު މާފްކޮށްދީފިއެވެ.

މިކަމާއި ގުޅިގެން އާބަންކޯ އިން ނެރުނު ނޫސް ބަޔާނެއްގައި ބުނީ ޖޫރިމަނާ މާފް ކުރުމާ އެކީގައި ފްލެޓަށް ބާކީ ނުދެއްކި ހުރި ފައިސާގެ އަދަދު ބަހާލައިގެން ދެއްކޭނެ ނިޒާމެއް ހަމަޖެހިފައިވާ ކަމަށެވެ.

އަދި އެއްބަސްވުމަށް ގެނެވޭ ބަދަލުތަކުގެ ތެރޭގައި އިސްލާމީ އުސޫލުތަކާ އެއްގޮތަށް އެއްބަސްވުން ބަދަލު ކުރުމުގެ ފުރުސަތު ލިބިގެންދާނެ ކަންވެސޑ އާބަންކޯ އިން ބުންޏެވެ.

Advertisement

"މިއާއެކު، ފައިސާ ދިނުން ލަސްވެގެން އަރާ ޖޫރިމަނާއަކީ ކޮންމެ މަހަކު ދައްކަން ޖެހޭ އަދަދުގެ %1 ކަމުގައި ކަނޑައެޅިގެންދާނެއެވެ، ވީމާ ދުވަހުން ދުވަހަށް ޖޫރިމަނާގެ އަދަދު އިތުރު ނުވެ، ޖޫރިމަނާ އަރާ އަދަދު ދުރާލާ ދެ ފަރާތަށް ވެސް އެނގިގެންދާނެއެވެ." އާބަންކޯ އިން ބުންޏެވެ.

އާބަންކޯއިން އިތުރަށް ބުނީ ޖޫރިމަނާ އަށް ކުރިން އަހަރަކަށް %18 ދައްކަން ޖެހޭ އިރު، މި ބަދަލާ އެކު މަހަކު ނެގޭ %1 ޖޫރިމަނާ ސަދަގާތް ފަންޑަށް ހަދިޔާ ކުރުމަށް ނިންމާފައިވާ ކަމަށެވެ.

އެހެންކަމުން އިސްލާމީ އުސޫލުތަކާ އެއްގޮތަށް އެއްބަސްވުމުން ބަދަލު ކުރުމަށް ނުވަތަ ދައްކަން ޖެހި ނުދެއްކިވާ ފައިސާ ބަހާލައިގެން ދެއްކުމަށް އެދޭ މީހުން އަންނަ މަހުގެ 10 ގެ ކުރިން މިކަމަށް އެދޭ ފޯމް ފުރިހަމަކޮށް އެ ކޯޕަރޭޝަންގެ އޮފީހަށް ނުވަތަ އީމެއިލް މެދުވެރިކޮށް ހުށަހެޅުމަށް އާބަންކޯ އިން އެދެއެވެ.

"މި ކޯޕަރޭޝަންއަކީ އަބަދުވެސް ރައްޔިތުންގެ ލާބަ އާއި މަންފާ އަށް މަސައްކަތްކޮށް ރައްޔިތުންނަށް ވީހާވެސް ލުއި ގޮތްތަކެއް ހޯދުމަށް މަސައްކަތް ކުރާ ކުންފުންޏެއް ކަން މި ފުރުސަތުގައި ފާހަގަކޮށްލަމެވެ،" އާބަންކޯގެ ބަޔާން ނިންމާލަމުން ބުނެފައިވެއެވެ.

ރާއްޖޭގެ ކޮންމެ ހިސާބެއްގައި ވެސް އިމާރާތް ކޮށްފައިވާ ހައުސިން ޔުނިޓްތަކަށް ކުލި ނުދެއްކިގެން އަރާފައިވާ ޖޫރިމަނާތައް މާފުކޮށްދެއްވާނެ ކަމަށް މި މަހުގެ ކުރީކޮޅުގައި ރައީސް ވަނީ ވިދާޅުވެފައެވެ.

ރާއްޖޭގެ އެކިކަންކޮޅުތަކުގައި ހުރި ސޯޝަލް ހައުސިން ޔުނިޓްތަކުގެ ކުލި ނުދެއްކުމުގެ ސަބަބުން މިއަދާ ހަމައަށް އަރާފައިވާ ޖޫރިމަނާ ފައިސާ މާފްކޮށް ދިނުމަށް ރައީސް ޑރ. މުހައްމަދު މުއިއްޒު ސަރުކާރުގެ 100 ދުވަހުގެ ވައުދުގެ ތެރޭގައި ވަނީ ހިމަނައިފައެވެ.