އަންނަ ހަފްތާގައި ރައީސުލްޖުމްހޫރިއްޔާ ޑރ.މުޙައްމަދު މުއިއްޒާއި އެމަނިކުފާނުގެ އަނބިކަބަލުން، ފަސްޓް ލޭޑީ ސާޖިދާ މުޙައްމަދު ރަސްމީ ދަތުރުފުޅެއްގައި ޗައިނާ އަށް ވަޑައިގަންނަވާ ގޮތަށް ހަމަޖެހިއްޖެއެވެ.
ރައީސް އޮފީހުން ބުނީ މި ދަތުރުފުޅަކީ ޗައިނާގެ ރައީސް ޝީ ޖިންޕިންގެ ދައުވަތަކަށް ކުރައްވާ ދަތުރުފުޅެއް ކަމަށެވެ.
މިމަހުގެ 7 އިން ފެށިގެން 12 އާއި ހިސާބަށް ކުރުމަށް ހަމަޖެހިފައިވާ މި ދަތުރުފުޅު ވެގެން ދާނީ ވެރިކަމާއި ހަވާލު ވެވަޑައިގަތުމަށްފަހު ރާއްޖެއިން ބޭރަށް ރައީސް ޑރ.މުއިއްޒު ކުރައްވާ ރަސްމީ 3 ވަނަ ދަތުރުފުޅަށެވެ. އެމަނިކުފާނު ފުރަތަމަ ވަޑައިގެންނެވީ ތުރުކީ އަށެވެ. އެއަށް ފަހު ދުބާއީ ގައި އޮތް ކޮޕް 28 ސަމިޓް ގައި ބައިވެރި ވުމަށް ޔޫއޭއީއަށް ވެސް ދަތުރުފުޅެއް ވަނީ ކުރައްވާފައެވެ.
މި ދަތުރުފުޅު ތަކަށް ޖުމްލަ 3.5 މިލިއަން ރުފިޔާ ހޭދަވެފައިވާ ކަމަށް ރައީސް އޮފީހުން ވަނީ ހާމަކޮށްފައެވެ.
ޗައިނާ އަށް ރައީސް ޑރ.މުއިއްޒުގެ ގެ ދެކަނބަލުން ރަސްމީ ދަތުރުފުޅެއްގައި ވަޑައިގަންނަވަން ހަމަޖެހިފައިވާ އިރު، މިދިޔަ މަހުގެ ތެރޭގައި ނައިބު ރައީސް އަލްއުސްތާޒް ހުސައިން މުހައްމަދު ލަތީފު ވެސް ވަނީ ޗައިނާ އަށް ދަތުރުފުޅެއް ކުރައްވާފަ އެވެ.
Advertisement
This content is created and paid for by advertisers and does not involve Voice Journalists
