ކުރީގެ ރައީސް ޢަބުދުالله ޔާމީން އަބުދުލް ޤައްޔޫމުގެ ވެރިކަމުގައި ރާއްޖޭގައި ހެދި ސިނަމާލެ ބުރިޖުގެ މަސައްކަތްކުރި ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ ލިމިޓެޑް، ސީ.ސީ.ސީ.ސީގެ އިސް އޮފިޝަލުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަރިހަށް އިޙްތިރާމްގެޒިޔާރަތެއް ކުރައްވައިފިއެވެ.

ރައީސް އޮފީހުން މަޢުލޫމާތު ދެއްވި ގޮތުގައި ސީ.ސީ.ސީ.ސީގެ އިސް އޮފިޝަލުން ރައީސާއި ބައްދަލުކުރައްވާފައި މިވަނީ އެމަނިކުފާނު މިހާރު ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިންނެވެ.

ޗައިނާގެ ސީ.ސީ.ސީ.ސީ އާއި ދިވެހި ސަރުކާރު ގުޅިގެން ހިންގުނު ސިނަމާލެ ބުރިޖުގެ މަސައްކަތަކީ ދިވެހި ރާއްޖޭގެ ތަރީޙުގައި މިހާތަނަށް ހިންގައި ނިމުނު ތަރަޤީގެ މިފަދަ އެންމެ ބޮޑު މަޝްރޫޢުއެވެ.

Advertisement

ސިނަމާލެ ބުރިޖުގެ ސަބަބުން އޭގެ ކުރިން ތަކުލީފާއި ބިރުވެރިކަމުގައި ކަނޑު މަގުގައި މާލެއިން، ހުލުލެއާއި ،ހުޅުމާލެއަށް ކުރަމުން އައި ދަތުރުތަކަށް ފަސޭހަކަށް ލިބި ސަރާސަރު ފާލަމަކުން ގުޅާލެވިގެން ދިޔައެވެ. އެ މަސައްކަތް ކުރިއަށް ގެންދިޔަ އިރު، ހައުސިންގް މިނިސްޓަރު ކަމުގެ މަގާމުގައި ހުންނެވީ އަދުގެ ރައީސުލްޖުމްހޫރިއްޔާ ޑރ މުހައްމަދު މުޢިއްޒެވެ. 

ޗައިނާގެ ރައީސް ޝީ ޖިންޕިންގެ ދަޢުވަތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ޗައިނާއަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގައި ދިވެހިރާއްޖެއާއި ޗައިނާއާ ދެމެދު ރަސްމީ ވާހަކަފުޅުތައް ބޭއްވުމަށް ހަމަޖެހިފައިވެއެވެ.

ހަމައެއާއިއެކު ދެ ޤައުމުގެ ދެމެދުގައި، ވިޔަފާރީގެ ގުޅުންތައް ބަދަހިކުރުމާއި، ފަންނީ ދާއިރާތަކުން މީހުން ބިނާކުރުމާއި، އިޖުތިމާއީ، އިޤުތިޞާދީ އަދި ޓެކްނޮލޮޖީގެ އިތުރުންވެސް އެކި ދާއިރާތަކުން ގުޅުން ބަދަހިކުރުމުގެ އެއްބަސްވުންތައް ބަދަލުކުރުމަށް ހަމަޖެހިފައިވާ ކަމަށް ރައީސް އޮފީހުން މަޢުލޫމާތު ދެއްވައެވެ.

ރައީސުލް ޖުމުހުރިއްޔާގެ އޮފީހުން އިތުރަށް މައުލޫމާތު ދެއްވި ގޮތުގައި ރައީސްގެ މި ދަތުރުފުޅުގައި ރައީސުލްޖުމްހޫރިއްޔާ ޗައިނާގެ ބައެއް ވިޔަފާރިވެރިންނާއި ބައްދަލުކުރައްވައި ދިވެހިރާއްޖެއާއި ޗައިނާއާ ދެމެދު އިޖުތިމާއީ އަދި އިޤުތިޞާދީ ގުޅުން ބަދަހި ކުރުމަށް މަޝްވަރާ ކުރެއްވުމަށްވެސް ހަމަޖެހިފައިވެއެވެ.

ރައީސުލް ޖުމުހުރިއްޔާ މި ދަތުރު ފުޅުގައި ދިވެހި ސަރުކާރު މަތީ ފަންތީގެ ވަފުދެއް ބައިވެރިވެ ވަޑައި ގަންނަވައެވެ.