ރައިސުލްޖުމްހޫރިއްޔާ ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު މިހާރު ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގައި ޗައިނާގެ ވެރިރަށް ބެއިޖިންގ އަށް ވަޑައިގެންނެވުމަށް ރަތްދޫލައިގެ މަރުޙަބާއެއް ދަންވައިފިއެވެ.
ރައީސް ޑރ. މުޙައްމަދު މުއިއްޒު ގެ ދެކަނބަލުން ޗައިނާއަށް ވޑައިގެންނެވުމުން އެއާރޕޯޓުންވެސް ވަނީ ރަތްދޫލައިގެ ހޫނު މަރުޙަބާއެއް ދަންނަވާފައެވެ. ބެއިޖިންއަށް ވަޑައިގެންނެވުމުން ރަތްދޫލައިގެ މަރުޙަބާއެއްގެ އިތުރުން އެދެކަނބަލުންގެ ޝަރަފުގައި ވަނީ އޮނަރގާޑެއް ވެސް އަރުވާފައެވެ.
ރައީސުލްޖުމްހޫރިއްޔާގެ ދެކަނބަލުން ޗައިނާއަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅަކީ ޗައިނާގެ ރައީސް ޝީ ޖިންޕިން ގެ ދައުވަތަކަށް ކުރައްވާ ދަތުރުފުޅެކެވެ. މިދަތުރުފުޅުގައި ޗައިނާގެ ސަރުކާރުން ރައީސުލްޖުމްހޫރިއްޔާގެ ދެކަނބަލުންނަށް މަރުޙަބާ ދެންނެވުމަށް ބާއްވާ ޚާއްޞަ ރަސްމިއްޔާތު ބޭއްވުމަށް ހަމަޖެހިފައިވަނީ މާދަމާއެވެ.
މަޢުލޫމާތު ލިބިފައިވާ ގޮތުގައި ޗައިނާގެ ރައީސް ޝީ ޖިންގ ޕިން އާއި ރައީސް ޑރ.މުއިއްޒާއި ދެމެދު ރަސްމީ ވާހަކަފުޅުތައް ކުރިއަށް ގެންދިއުމަށްވެސް ހަމަޖެހިފައިވަނީ މާދަމާއެވެ. އަދި މިވާހަކަފުޅުތަކަށް ފަހު ދެ ޤައުމުގެ ދެމެދުގައި އެކިއެކި އެއްބަސްވުންތަކުގައި ސޮއިކުރުމަށް ވެސް ވަނީ ހަމަޖެހިފައެވެ.
ރައީސުލް ޖުމުހުރިއްޔާގެ ދެކަނބަލުން ޗައިނާއަށް ކުރައްވަމުން މިގެންދަވާ ފުރަމާނަ ދަތުރުފުޅުގެ ތެރެއިން މިހާތަނަށް ވަނީ ޗައިނާގެ މަތީފަންތީގެ 300 އެއްހާ ވިޔަފާރިވެރިންނާއި ބައްދަލުކުރައްވާ ރާއްޖޭގައި އިންވެސްޓް ކުރުމާއި ގުޅޭގޮތުން ވާހަކަ ދައްކަވާފައެވެ. އަދި މީގެ އިތުރުން ރާއްޖެއަށް އެންމެ ގިނަ ފަތުރުވެރިން އަންނަ މާރކެޓަކަށް ޗައިނާ ހެދުމާއި ބެހޭގޮތުން ވެސް މަޝްވަރާކުރައްވާފައި ވެއެވެ.
ރައީސުލްޖުމުހުރިއްޔާގެ މި ދަތުރުފުޅުގައި އެމަނިކުފާނުގެ އަރިހުގައި ދިވެހި ސަރުކާރުގެ މަތީ ފަންތީގެ ވަފުދެއް ގެންދަވަނީ ބައިވެރިވެ ވަޑައިގަންނަވަމުންނެވެ.
Advertisement
This content is created and paid for by advertisers and does not involve Voice Journalists
