ޗައިނާގެ ރައީސް ޝީ ޖިންގޕިންއާއެކު ކުރިއަށްދިޔަ މަޝްވަރާތަކަކީ ވަރަށް ކާމިޔާބު މަޝްވަރާތަކެއްކަމަށާއި، އެ މަޝްވަރާތަކުން ވަރަށް ބޮޑެތި ފައިދާތަކެއް ކުރާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ޗައިނާގެ ޕްރިމިއާ (ބޮޑުވަޒީރު) ލީ ޗިންއާއެކު އިއްޔެ ބޭއްވެވި މަޝްވަރާތަކުގައި ދެއްކެވި ވާހަކަފުޅުގައެވެ.

ޗައިނާގެ ޕްރިމިއާ ލީޗިންއާއެކު ބޭއްވި މި ބައްދަލުކުރެއްވުމުގައި ރައީސުލްޖުމްހޫރިއްޔާ ވިދާޅުވީ ވެރިކަމަށް ވަޑައިގަތުމަށްފަހު ކުރައްވާ ފުރަތަމަ ފުރަމާނަ ދަތުރުފުޅުގައި ޗައިނާއަށް ވަޑައިގަތުމަކީ ދެޤައުމުގެ ދެމެދުގައި އޮތް ގާތް އަޚްވަންތަ ގުޅުން ރަމްޒުކޮށްދޭކަމެއްކަމަށެވެ. އަދި ޗައިނާއަށް ވަޑައިގަތުމަށް އެރުވި ދައުވަތަށް ރައީސް ވަނީ ޝުކުރު އަދާކުރައްވާފައެވެ. 

މިއާއެކު، ޗައިނާއާއެކު ޤާއިމްކުރި އެއްބަސްވުންތަކަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވިދާޅުވީ ޗައިނާއަށް ދިވެހި ސަރުކާރުގެ ފުރިހަމަ އެއްބާރުލުން ލިބޭނެކަމަށާއި، މި ދަތުރުފުޅުން ދެޤައުމުގެ ގުޅުން އައު ހަރުފަތަކަށް ދާނެކަމަށެވެ.

މި ބައްދަލުވުމުގައި ޗައިނަގެ ޕްރިމިއާ ދެއްކެވި ވާހަކަފުޅުގައި ވަނީ ދެ ޤައުމުގެ ދެމެދުގައި ބޭއްވުނު ރަސްމީ މަޝްވަރާތަކަކީ ބިނާކުރަނިވި އަދި ދެޤައުމަށްވެސް ފައިދާހުރި މަޝްވަރާތަކެއްގެ ގޮތުގައި ސިފަކުރައްވާފައެވެ.

ޗައިނާގެ ޕްރިމިއާގެ ވާހަކަފުޅުގައި ވަނީ ރައްޖެއިން ބޭނުންވާ ކަންކަން ފުރިހަމަކޮށްދިނުމަށް ޗައިނާ ތައްޔާރަށް އޮތްކަމަށާއި، ޗައިނާ ސަރުކާރާ ރައްޔިތުންގެ ފަރާތުން އެއްބާރުލުމާއި އެހީތެރިކަން ލިބިގެންދާނެކަމަށް ވިދާޅުވެފައެވެ.

މީގެ އިތުރުން، މި ބައްދަލުވުމުގައި ރާއްޖެއަށް އިތުރު ސްކޯލާޝިޕް ފުރުސަތުތައް ފަހިކޮށްދިނުމާއި، ވޮކޭޝަނަލް ޓްރެއިނިންގ، ސްޕޯޓްސް ޓްރެއިނިންގ، އަދި މަސްވެރިކަމާއި، އެނޫންވެސް ދާއިރާ ތަކުން ޗައިނާގެ އެހީ ފޯރުކޮށްދިނުމަށް މަޝްވަރާ ކުރައްވާފައިވެއެވެ. 

އަދި، ރާސްމާލެ މަޝްރޫޢުއާއި، އެއާޕޯޓް ބޮޑު ކުރުމުގެ މަޝްރޫއުގެ އިތުރުން ވެސް ރައީސް މުޢިއްޒުގެ ސަރުކާރުން ފަށާފައިވާ ތަރައްގީގެ މަޝްރޫއުތަކަށް ޗައިނާގެ އެހީތެރިކަން ފޯރުކޮށްދިނުމާއި، ޗައިނާ އާއި ރާއްޖެއާއި ދެމެދު ޑައިރެކްޓް ފްލައިޓްތައް އިތުރު ކޮށް ފަތުރުވެރިކަން ކުރި އެރުވުމަށްވެސް މަޝްވަރާ ކުރައްވާފައިވެއެވެ. 

ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާއި އަނބިކަނބަލުން ސާޖިދާ މުހައްމަދު ފުރަމާނަ ދަތުރުފުޅެއްގައި ޗައިނާއަށް ވަޑައިގަތީ އެ ޤައުމުގެ ރައީސްގެ ދައުވަތަކަށެވެ. މިއީ ވެރިކަމާއި ހަވާލުވެވަޑައިގަތުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރާއްޖެއިން ބޭރަށް ކުރެއްވި ފުރަތަމަ ފުރަމާނަ ދަތުރުފުޅެވެ.