ޗައިނާއިން ރާއްޖޭގެ ދާޚިލީ އެއްވެސް ކަމަކަށް ބޭރުގެ ނުފޫޒު ފޯރުވުމާއި ދެކޮޅު ހަދާނެ ކަމަށް ބުނެފިއެވެ.
މިކަން ހާމަކޮށްފައިމިވަނީ، ޗައިނާގެ ރައީސް ޝީ ޖިންޕިންގެ ދައުވަތަކަށް ރައީސް މުއިއްޒު ޗައިނާއަށް މިހާރު ކުރައްވަމުން ގެންދަވާ ދަތުފުޅުގައި ދެފަރާތުން އެއްބަސްވާ ކަންކަމާއި ގުޅޭގޮތުން ރައީސް އޮފީހުން ނެރުއްވި ޖޮއިންޓް ޕްރެސް ކޮމިއުނިކޭޝަންގައެވެ.
މިގޮތުން ޗައިނާއިން ރާއްޖޭގެ އިސްތިގުލާލާއި މިނިވަންކަމާއި ގައުމީ ކަރާމާތް ދެމެހެއްޓުމުގައި އެއްބާރުލުންދޭނެ ކަމަށް ވެސް ވަނީ ބުނެފައެވެ.
މި ޖޮއިންޓް ޕްރެސް ކޮމިއުނިކޭޝަންގައި ރާއްޖެއިން ވަނީ "ވަން-ޗައިނާ" ސިޔާސަތު ޤަބޫލުކޮށް، މުޅި ޗައިނާ ތަމްސީލުކުރާ ހަމައެކަނި ގާނޫނީ ސަރުކާރަކީ ޗައިނާގެ ސަރުކާރުކަން ގަބޫލުކޮށް ޓައިވާނަކީ ޗައިނާގެ ސަރަޙައްދުން ވަކިނުކުރެވޭނެ ބައެއް ކަމަށް ގަބޫލުކޮށް "ވަން-ޗައިނާ" ސިޔާސަތަށް ތާއީދުކުރުން މަތީ ދެމި އޮންނާނެ ކަމަށް ބުނެފައެވެ.
ޗައިނާގެ އިސްތިގުލާލާއި ސަރަހައްދީ އެއްބައިވަންތަކަމަށް ބުރޫއަރާ، "ޓައިވާންގެ މިނިވަންކަން" ނަމުގައި ހިންގާ ހުރިހާ ހަރަކާތަކާ ދެކޮޅު ހަދައި، ޓައިވާނާއެކު އެއްވެސް ކަހަލަ ރަސްމީ ގުޅުމެއް ނުއުފައްދާނެ ކަމަށް ވެސް ރާއްޖެއިން ވަނީ އެއްބަސް ވެފައެވެ.
ޗައިނާ އިން ރާއްޖޭގެ ދާޚިލީ އެއްވެސް ކަމަކަށް ބޭރުގެ ނުފޫޒު ފޯރުވުމާއި ދެކޮޅު ހަދާން އެއްބަސްވީ ފަދައިން ޗައިނާގެ ދާޚިލީ ކަންކަމުގެ ތެރެއަށް ބޭރުގެ އެއްވެސް ނުފޫޒެއް ނުފޯރުވުމަށާއި، އެގައުމުގެ ޤައުމީ އެއްބައިވަންތަކަން ހޯދުމަށް ޗައިނާއިން ކުރާ ހުރިހާ މަސައްކަތަކަށް ވެސް އެހީތެރި ވާނެ ކަމަށް ވެސް މި ޖޮއިންޓް ޕްރެސް ކޮމިއުނިކޭޝަންގައި ރާއްޖެއިން ވަނީ އެއްބަސް ވެފައެވެ.
Advertisement
This content is created and paid for by advertisers and does not involve Voice Journalists
