ސަރުކާރު ހިންގާ މައިޕާރޓީ ޕީއެންސީގެ ފަރާތުން މާލޭ މޭޔަރުކަމަށް ވާދަކުރައްވާ އަލްއުސްތާޛާ އައިޝަތު އާޒިމާ ޝަކޫރު ވޯޓް ލައްވައިފިއެވެ.

އާޒިމާ ވޯޓު ލައްވާފައި ވަނީ ހިރިޔާ ސްކޫލްގައި ބަހައްޓާފައިވާ ވޯޓު ފޮއްޓަށެވެ. ވޯޓް ލެއްވުމަށްފަހު އާޒިމާ ވަނީ ނޫސްވެރިންނާއި ބައްދަލުކުރައްވާ ވަރަށް މުހިއްމު މެސެޖެއް ދެއްވާފައެވެ. އާޒިމާ ވިދާޅުވީ ވީހާވެސް އަވަހަކަށް ނުކުމެވަޑައިގެން ވޯޓު ލެއްވުމަށް އެދިވަޑައިގަންނަވާ ކަމަށެވެ.

" އަޅުގަނޑު ހުރިހާ ބޭފުޅުންގެ ގާތުގައިވެސް މި އެދެނީ ވީހާވެސް އަވަހަކަށް ނުކުމެވަޑައިގެން ވޯޓު ލެއްވުމަށް. މިއީ ޑިމޮކްރެޓިކް ޕްރޮސެސްއެއް، އެހެހެންވީމަ ޕްރޮސެސްގައި ރައްޔިތުންގެ ހައްގެއް އަދި ޒިންމާއެއް ވީމަ، ޒިންމާ އަދާކޮށްދެއްވުމަށް އަޅުގަނޑުގެ ފަރާތުން ދަންނަވާނީ." އާޒިމާ ވިދާޅުވިއެވެ.

މިއަދުގެ މި ބައި – އިލެކްޝަންގައި 55،000 އަށް ވުރެ ގިނަ މީހުންނަށް ވޯޓުލެވޭ އިރު ޖުމުލަ 55 ވޯޓް ފޮށްޓެއް ބެހެއްޓިފައިވެއެވެ. އަދި ހާހަކާއި ގާތްކުރާ އަދަދަކަށް މީހުން ވޯޓްގެ ކަންތައްތަކުގައި ހަރަކާތްތެރި ވަމުން ގެނދެއެވެ.

މި ބައި އިލެކްޝަންއަށް 5 ބޭފުޅަކު ވާދަ ކުރައްވައެވެ . އެ 5 ބޭފުޅުންނަކީ

1.    އަމިއްލަ ގޮތުން ކުރިމަތި ލައްވާ އެމްޑީއޭގެ ގައުމީ މަޖިލީހުގެ ކުރީގެ މެންބަރު ޝުއައިބު އަލީ

2.    އަމިއްލަ ގޮތުން ކުރީގެ ކޮމިޝަނާ އޮފް ޕޮލިސް ހުސައިން ވަހީދު

3.    ޕީޕީއެމް-ޕީއެންސީ ގެ ފަރާތުން ކުރީގެ ބަންޑާރަނައިބު އާޒިމާ ޝަކޫރު

4.    އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް އާޒިމް

5.    ޑިމޮކްރެޓްސްގެ ފަރާތުން ގަލޮޅު ދެކުނު ދާއިރާގެ ކައުންސިލަރު މުހައްމަދު ސައިފް ފާތިހު

މިއަދުގެ ވޯޓްލުން ކުރިއަށް ގެންދިއުމަށް ހަމަޖެހިފައިވަނި ހެދުނު .8.00 ން ހަވީރު 5.00 އަށެވެ.