އުންމީދަކީ ޗައިނާއިން މިއަހަރު ރާއްޖެއަށް އަންނަ ފަތުރުވެރިންގެ އަދަދު 40 އިންސައްތަ އިތުރުކުރުން ކަމުގައި އެމްއެމްޕީއާރުސީގެ މެނޭޖިން ޑިރެކްޓަރު ފާތިމަތު ތައުފީގު ވިދާޅުވެއްޖެއެވެ.

ރައީސް ޑރ. މުހައްމަދު މުއިއްޒި ޗައިނާއަސް ކުރެއްވު ފުރަމާނަ ދަތުރު ފުޅުގައި ބައިވެރިވެލައްވައި ޗައިނާގައި ހުންނަވާ ޗައިނާގެ ގްލޯބަލް ޓައިމްސްއަށް މިދިޔަ ބުރާސްފަތި ދުވަހު ދެއްވި އިންޓަވިއުއެއްގައި ފާތިމަތު ވިދާޅުވީ ޗައިނާއާ އެކު މި ސަރުކާރުން ހެދި އާ އެއްބަސްވުންތަކާ އެކު ކޮވިޑް-19 ބަލިމަޑުކަމުގެ ކުރިން ޗައިނާ މާކެޓު އޮތް ހިސާބަށް މި އަހަރު އަރާނެ ކަމަށް ލަފާކުރެއްވޭ ކަމަށެވެ.

"އުންމީދަކީ ޗައިނާ ފަތުރުވެރިންގެ އަދަދު [މިދިޔަ އަހަރާ އަޅާބަލާއިރު] %40 އިތުރުވެ، ކޮވިޑް-19 ބަލިމަޑުކަމުގެ ކުރިން އޮތް ހާލަތަށް ދިޔުން." ފާތިމަތު ވިދާޅުވިއެވެ.

ޗައިނާގެ ގްލޯބަލް ޓައިމްސްއަށް ދެއްވި މި ބަސްދީގަތުމުގައި ފާތިމަތު ވިދާޅުވީ ޗައިނާ ފަތުރުވެރިންގެ މެދުގައި ރާއްޖެއަށް ޝައުގުވެރިކަން ބޮޑުކުރުމަށް ގިނަ މަސައްކަތްތަކެއް ކުރެވެމުން އަންނަކަމަށެވެ. އެގޮތުން ޗައިނާ ބަހުން އެ ގައުމުގެ ސޯޝަލް މީޑިއާ އެކި ޕްލެޓްފޯމްތަކުގައި މާކެޓިން ހަރަކާތްތައް ކުރިއަށްގެންދާ ކަމަށާއި، ޗައިނާގެ ބޮޑެތި ޓްރެވަލް ޓްރޭޑް ޝޯތަކާއި އެކި އިވެންޓުތަކުގައި ބައިވެރިވެ، ޓުއާ އޮޕަރޭޓަރުންނާއި ޓްރެވަލް އެޖެންޓުންނާ ދެމެދު އޮންނަ ގުޅުން ބަދަހިކުރުމަށް މަސައްކަތް ކުރައްވަމުން ގެންދަވާ ކަމަށެވެ.

"ޗައިނާއަކީ ރާއްޖޭގެ ފަތުރުވެރިކަމަށް އެންމެ މުހިންމު އެއް މާކެޓުގެ ގޮތުގައި ދެމިއޮތް ގައުމެއް. ބޯޑަރުތައް ބަންދު ކުރުމުގެ ކުރިން އަދި އޭގެ ފަހުން ވެސް ޗައިނާއިން އަންނަ ފަތުރުވެރިންގެ އަދަދު އައީ އިތުރުވަމުން،" ފާތިމަތު ވިދާޅުވި އެވެ.

އެމްއެމްޕީއާރުސީގެ މެނޭޖިން ޑިރެކްޓަރު ފާތިމަތުގެ މި ބަސްދީގާތުމުގައި ވަނީ ރައީސް ޑރ. މުހައްމަދު މުއިއްޒު ޗައިނާއަށް މި ކުރެއްވި ފުރަމާނަ ދަތުރު ފުޅާއި ބެހޭގޮތުންވެސް ވާހަކަ ދައްކަވާފައެވެ. އޭނާ ފާހަކަ ކުރެއްވި ގޮތުގައި ރައީސްގެ މި ދަތުރު ފުޅުގެ ސަބަބުން ދެ ޤައުމުގެ ދެމެދުގައި ގުޅުން އެތަށް ތަނަކުން ކުރިއަރާ ދާނެކަމަށެވެ.

"މިކަމުން ދައްކުވައިދެނީ މާކެޓެއް އަދި ޕާޓްނަރެއްގެ ގޮތުގައި ރާއްޖެއިން ޗައިނާއަށް ދޭ އަހަމިއްޔަތުކަން. އަދި މިކަންކަމުން ދެ ގައުމުގެ ދެމެދުގައި އޮތް ގުޅުން އިތުރަށް ވަރުގަދަވެގެންދާނެ،" ރައީސްގެ ދަތުރުފުޅާއި ގުޅޭގޮތުން ފާތިމަތު ވިދާޅުވި އެވެ.

ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި ފަތުރުވެރި ކަމުގައި ޗައިނާގެ މާކެޓަކީ ރާއްޖެއަށް އެންމެ ގިނަ ފަތުރުވެރިން އަންނަ މާކެޓުކަމުގައި ހައްދަވައި ދެއްވުމަށް ވަނީ އެދި ވަޑައިގެންފައެވެ.