ޗައިނާއިން ރާއްޖެ އަށް ދީފައިވާ ލޯނުތައް ދެއްކުމަށް ޗައިނާއިން ލުއި ދޭން ނިންމައި، ރާއްޖެއަށް ލުއިތަކެއް ހަމަޖައްސައިދިނުމުގެ ދިރާސާތައް ފެށުމަށް ޗައިނާގެ ފަންނީ ޓީމެއް ރާއްޖެއަށް އައުމަށް ހަމަޖެހިފައިވާކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ. 

ޗައިނާއަށް ކުރެއްވި ފުރަމާނަ ދަތުރުފުޅަށްފަހު ރާއްޖެ ވަޑައިގެން ވެލާނާ އެއާޕޯޓުގައި ދެއްވި ބަޔާނެއްގައި ރައީސް ޑރ. މުއިއްޒު ވިދާޅުވީ ޗައިނާއިން ރާއްޖެއަށް ދީފައިވާ ލޯނުތަކަށް ލުއިދޭން އެ ގައުމުން ނިންމާފައިވާ ކަމަށެވެ. ރައީސް ވިދާޅުވި ގޮތުގައި ޗައިނާއިން ރާއްޖެއަށް ދަރަންޏަށް ދީފައިވާ ފައިސާ އަނބުރާ ދެއްކުމުގައި ރާއްޖެއަށް ލުއި ގޮތްތަކެއް ހަމަޖައްސަައިދެއްވުމަށް އެ ޤައުމުގެ ރައީސް ޝީ ޖިންޕިން އަރިހުން އެދިވަޑައިގަތީ ސީދާ ރައީސްއެވެ.

އެގޮތުން ރައީސް ވިދާޅުވީ ޗައިނާއިން ރާއްޖެއަށް ދައްކަން ހުރި ފައިސާ ކުރިއަށް އޮތް 5 އަހަރު ނުދައްކައި ވީހާވެސް ބޮޑަށް ގްރޭސް ޕީރިއަޑެއް ހަމަޖައްސައި، ވީހާވެސް ލުއި ގޮތެއްގައި ދަރަނި އަދާކުރެވޭނެ ގޮތެއް ހޯދުމަށް ޗައިނާގެ ފިނޭންސް މިނިސްޓްރީއާއި އެ ޤައުމުގެ މާލީ ތަޖުރިބާކާރުންގެ ޓީމެއް ރާއްޖެއަށް އައުމަށް ހަމަޖެހިފައިވާ ކަމަށެވެ.