ވަކި ޕާޓީއަކަށް ބެލުމެއް ނެތި މާލެ ރައްޔިތުންނަށް ފައިދާވާނެ ހުރިހާ ކަމަކަށް ތާއީދުކުރައްވާނެ ކަމަށް މާލެ ސިޓީގެ މޭޔަރު ކަމަށް ޕީއެންސީގެ ފަރާތުން ކުރިމަތިލެއްވި ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ވިދާޅުވެއްޖެއެވެ.

އެކަމަނާ މި ފަދައިން ވިދާޅުވީ މާލޭގެ މޭޔަރު ކަމަށް އިދިކޮޅު އެމްޑީޕީގެ ކެނޑިޑޭޓް އާދަމް އާޒިމް އިންތިހާބު ވެވަޑައިގަތުމާއި ގުޅިގެން މަރުހަބާ ދެންނެވުމަށް ކުރެއްވި ޓްވީޓެއްގައެވެ.

އާޒިމާ ވިދާޅުވީ އެއްވެސް ފިކުރެއް އަދި ޕާޓީއަކަށް ބެލުމެއްނެތި މާލެ ރައްޔިތުންނަށް ފައިދާވާނެ ހުރިހާ ކަމަކަށް ތާއީދުކުރުމަށް ވައުދުވެވަޑައިގަންނަވާ ކަމަށެވެ.

Advertisement

މިއަދު ބޭއްވުނު މާލޭ ސިޓީ ކައުންސިލަށް މޭޔަރަކު ހޮވުމާއި، ކައުންސިލްގެ ގެ ހުސްވެފައިވާ ގޮނޑިތަކަށް މެންބަރުން ހޮވުމަށް ބޭއްވި މި އިންތިހާބުގައި މޭޔަރުކަން ބޮޑު ތަފާތަކުން އާޒިމް ކާމިޔާބު ކުރައްވާފައި ވަނީ 3،529 ވޯޓާއެކު އެވެ. މިއީ ވޯޓްލީ މީހުންގެ ނިސްބަތަށް ބަލާއިރު 46 އިންސައްތަ ވޯޓެވެ.

މި އިންތިހާބުގައި އާޒިމާ އަށް ލިބިވަޑައިގަތީ 2،167 ވޯޓާއެކު ޖުމްލަ ވޯޓުގެ 27 އިންސައްތަ ކަމަށް އިއުލާން ކޮށްފައިވާ ނަތީޖާއިން ދައްކައެވެ.

މި އިންތިހާބުގައި ދަ ޑިމޮކްރެޓްސް ގެ ފަރާތުން ވާދަކުރެއްވި ސައިފް ފާތިހް އަށް ލިބުނީ 1،634 ވޯޓެވެ. ކުރީގެ ކޮމިޝަނަރ އޮފް ޕޮލިސް ހުސެއިން ވަހީދަށް 1،326 ވޯޓު ލިބުނުއިރު، އަމިއްލަ ގޮތުން ވާދަކުރާ ޝުއައިބު އަލީ އަށް ލިބިފައިވަނީ 91 ވޯޓެވެ.

މި އަހަރުގެ މާލޭ ސިޓީ ކައުންސިލްގެ ހުސްވެފައިވާ މަގާމުތަކަށް މީހުން ހޮވުމަށް ބޭއްވި އިންތިހާބަކީ ވަރަށް މަދު ބަޔަކު ވޯޓު ލާން ދިޔަ އިންތިހާބެއް ކަން ފާހަގަކޮށްލެވެއެވެ. މިގޮތުން ވޯޓު ލުމުގެ ހައްގު ލިބިފައިވާ ފަރާތްތަކުގެ ތެރެއިން ވޯޓްލީ ކަމަށް ބެލެވެނީ 40 އިންސައްތަ ކަމަށް އިލެކްޝަން ކޮމިޝަން (އީސީ) އިން ވަނީ ބުނެފައެވެ.

މާލޭގެ މޭޔަރުގެ ގޮނޑި ހުސްވީ އެ މަގާމުގައި ހުންނެވި ރައީސް ޑރ. މުހައްމަދު މުއިއްޒު ރާއްޖޭގެ ރައީސުލްޖުމްހޫރިއްޔާ ކަމަށް އިންތިހާބު ވެވަޑައިގަތުމުންނެވެ. އަދި ސިޓީ ކައުންސިލްގެ ތިން ގޮނޑި ހުސްވީ އެ މަގާމުތަކުގައި ތިއްބެވި ބޭފުޅުން ސަރުކާރުގެ މަގާމުތަކަށް ވަޑައިގަތުމުންނެވެ.