ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވަޢުދުފުޅާއި އެއްގޮތަށް، ދިވެހިރާއްޖޭގައި ގާއިމްވެތިބި އިންޑިޔާ ސިފައިން ރާއްޖެއިން ބޭލުމަށް ސަރުކާރުން ކުރަމުންދާ މަސައްކަތުގެ ތެރެއިން، ދެ ގައުމުގެ މަތީ ފަންތީގެ ބޭފުޅުން އެކުލެވޭ ކޮމިޓީއެއް އެކުލަވައި އެ ކޮމިޓީގެ ބައްދަލުވުމެއް ފޮރިން މިނިސްޓްރީގައި ފަށައިފިއެވެ. 

މިކަމާއި ގުޅޭގޮތުން 'ވޮއިސް' އަށް މައުލޫމާތު ދެއްވަމުން މިނިސްޓަރ އެޓް ދަ ޕްރެޒިޑެންޓް އޮފީސް ފޮރ ސްޓްރެޓީޖިކް ކޮމިޔުނިކޭޝަން، އިބްރާހީމް ޚަލީލް ވިދާޅުވީ، ރައީސް ޑރ. މުޢިއްޒު އިންޑިއާގެ ބޮޑުވަޒީރު ނަރެންދުރަ މޯދީއާ ދުބާއީގައި ބޭއްވެވި ބައްދަލުކުރެއްވުމުގައި، ދެ ލީޑަރުން އެއްބަސްވެވަޑައިގަތް ގޮތަށް، ދިވެހިރާއްޖެއާ އިންޑިއާއިން މަޝްވަރާކުރަން ޖެހޭ ކަންކަމާއި ގުޅިގެން ދެ ޤައުމުގެ އިސް އޮފިޝަލުން ބައިވެރިވެވަޑައިގަންނަވާ ހައިލެވެލް ކޮމިޓީއެއް މިހާރު އުފައްދަވާފައިވާ ކަމަށެވެ. 

އަދި މި ކޮމެޓީގެ ބައްދަލުވުމެއް މިއަދު ޚާރިޖީ ވުޒާރާގައި މިހާރު  ކުރިއަށްދާ ކަމަށާ, މި ބައްދަލުވުން ނިމުމުން، ބައްދަލުވުމާ ގުޅޭ އިތުރު މަޢުލޫމާތު ޚާރިޖީ ވުޒާރާއިން ހާމަކުރާނެ ކަމަށެވެ.

މަޢުލޫމާތު ލިބިފައިވާ ގޮތުގައި މި މަތީ ފަންތީގެ ކޮމިޓީގައި އިންޑިއާގެ ފަރާތުން މި ބައްދަލުވުމުގައި ބައިވެރިވެވަޑައިގަންނަވަނީ؛ 

1) އިންޑިއާއިން ރާއްޖެއަށް ކަނޑައަޅާފައި ހުންނަވާ ހައި ކޮމިޝަނަރު މުނޫ މަހާވަރު

2) އިންޑިއާގެ ހާރިޖިއްޔާގެ ފަރާތުން، އިންޑިއާ ކަނޑުގެ ކަންކަމަށް ހާއްސަ ޖޮއިންޓް ސެކްރެޓަރީ ޕުނީތު އަގަރުވާލް

3) އިންޑިއާގެ ދިފާއީ ވުޒާރާގެ މަންދޫބުން

4) އިންޑިއާގެ ކަނޑުގެ ސިފައިންގެ ބޭފުޅުން

ރާއްޖެ ތަމްސީލުކުރައްވަނީ:

1) ރައީސް އޮފީހުގެ ޗީފް އޮފް ސްޓާފް އަބްދުالله ފަަޔާޒު

2) ދިވެހި ސިފައިންގެ ޗީފް އޮފް ޑިފެންސް ފޯސް މޭޖަ ޖެނެރަލް އަބްދުއްރަހީމް އަބްދުالله

3) ފޮރިން މިނިސްޓްރީގެ އެމްބެސެޑަރު އެޓް ލާޖު ޑރ. އަލީ ނަސީރު

4) އިންޑިއާގައި ހުންނަވާ ދިވެހި ސަފީރު އިބްރާހިމް ޝަހީބު

މި ބައްދަލުވުމުގައި ރާއްޖޭގައި ތިބި އިންޑިއާ ސިފައިން ބޭލުމާއި ގުޅޭ މަޝްވަރާތަކެއް ކުރިއަށް ދާނެ ކަމަށް މައުލޫމާތު ލިބެއެވެ.