ރާއްޖެ އާއި ޗައިނާ އާއި ދެމެދު އުފެދެމުން އަންނަ ގާތް ގުޅުމަށް އިންޑިއާއިން ސަމާލު ވާން ޖެހޭ ކަމަށް އިންޑިއާގެ އެމްޕީ ޝަޝީ ތަރޫރު ވިދާޅުވެއްޖެއެވެ.

ޝަޝީ ތަރޫރު މިފަދައިން ވިދާޅުވީ އިންޑިއާގެ 'ތޫގްލަކް' މަޖައްލާގެ 54 ވަނަ އަހަރީ ދުވަހު ދިން ބަސްދީގަތުމެއްގައެވެ. މިގޮތުން އޭނާ ވިދާޅުވީ ޗައިނާއިން މަސައްކަތް ކުރަނީ މުޅި ރާއްޖޭގައި އެގައުމުގެ ނުފޫޒު ފޯރު ވުމަށް ކަމަށެވެ. 

ޝަޝީ ތަތޫރު ވިދާޅުވީ، ޗައިނާއިން މުޅި ސަރަހައްދަށް ނުފޫޒު ފޯރުވުމަށް މަސައްކަތް ކުރަމުން އަންނަ ކަމާމެދު ޝައްކެއް ނެތް ކަމަށެވެ. އަދި މި ނުފޫޒު އިންޑިއާއާއި އަވައްޓެރި ކޮންމެ ގައުމެއްގައިވެސް، އެއްވެސް މީހަކު އިސްތިސްނާ ވުމެއްނެތި އިތުރުވަމުން އަންނަ ކަމަށެވެ. އޭނާ އިތުރަށް ވިދާޅުވީ މިކަމަށް އިންޑިއާއިން ސަމާލުވާން ޖެހޭ ކަމަށާއި އެ ގައުމުގެ ސަރުކާރަށް މިކަމުގައި ހުރި ނުރައްކާތެރިކަން އެނގެން ޖެހޭނެ ކަމަށެވެ.

އިންޑިއާ އާއި އެކު ގުޅުން ބަދަހި ކުރި ފަދައިން ރާއްޖެއަށް ވެސް އެހެން ގައުމު ތަކާއި އެކު ގުޅުން ބަދަހި ކުރުމުގެ ފުރުސަތު އޮންނާނެ ކަމަށާއި، ނަމަވެސް މިކަމުގެ ނަތީޖާއެއްގެ ސަބަބުން ނުކުންނަ ބައެއް ކަންތައްތަކަކީ އިންޑިއާގެ މަސްލަހަތު ގެއްލޭ ކަމެއް ނަމަ އެކަމަށް ފިޔަވަޅު އަޅުއްވާނެ ކަމަށް އޭނާ ވަނީ ވިދާޅުވެފައެވެ.

މީގެ އިތުރުންވެސް ދާދި ފަހުން އިންޑިއާގެ ބޮޑު ވަޒީރު ނަރެންދްރަ މޯދީ ލަކްޝަދީޕަށް ވަޑައިގެން އެ ތަނުގެ ފަތުރުވެރިކަން ޕްރޮމޯޓް ކުރި ވީޑިއޯ އަކަށް ރާއްޖޭގެ ތިން ޑެޕިއުޓި މިނިސްޓަރަަކު ފާޑު ކިޔުމާއި ގުޅިގެން ދެގައުމުގެ ދެމެދުގައި ބަދަލު ކުރެވުނު ހޫނު ބަހުގެ ހަމަލާތަކަށް އިޝާރާތް ކުރައްވާ ވިދާޅުވީ ދެގައުމުގެ ޚާރިޖީ ސިޔާސަތާއި ބެހޭގޮތުން ސޯޝަލް މީޑިއާ ތެރޭގައި މަޝްވަރާކުރަން ނުޖެހޭ ކަމަށެވެ. އަދި މިފަދަ މައްސަލަތައް ސޯޝަލް މީޑިއާ އިން ހައްލު ކުރުމަށް ވުރެ ހަރުދަނާ ހައްލެއް އޮންނަން ޖެހޭނެ ކަން ވެސް އޭނާ ފާހަގަ ކުރެއްވިއެވެ.

މި މައްސަލައާއި ގުޅިގެން ދެ ގައުމުގެ އެކްޓިވިސްޓުންގެ މެދުގައި ވަރުގަދަ ބަހުގެ ހަމަލާ ތަކެއް ބަދަލު ކޮށްފައިވާރު އެގައުމުން ވަނީ ރާއްޖޭގެ ފަތުރުވެރިކަން ބޮއިކޮޓް ކުރުމަށް ވެސް ގޮވާލާފައެވެ. އަދި އިންޑިއާގެ ބަޔަކު ވަނީ ދިވެހި ރާއްޖޭގެ ކުޑަކުދިންގެ މައްސަލަތައް ބަލާ ޖުވެނައިލް ކޯޓުގެ ވެބްސައިޓް ހެކްކޮށް ސަރުކާރަށް އިންޒާރު ވެސް ދީފައެވެ.

ސަރުކާރުން ވަނީ މި މައްސަލައިގައި ޝާމިލްވާ ޔޫތު މިނިސްޓްރީގެ ޑެޕިއުޓީ މިނިސްޓަރުން ކަމަށްވާ މަލްޝާ ޝަރީފާއި މަރިޔަމް ޝިއުނާ އަދި މަހުޒޫމް މާޖިދު ސަސްޕެންޑްކޮށްފަ އެވެ. އަދި ސަރުކާރުން ވަނީ މިކަމާއި ގުޅޭގޮތުން ބަޔާނެއް ނެރެ މިކަން ހަރުކަށި އިބާރާތުން ކުށްވެރި ވެސް ކޮށްފައެވެ. 

ދެގައުމުގެ ދެމެދުގައި މަޝްރަހު ހޫނު ވެފައިވާ ދަނޑިވަޅެއްގައި ރައީސް ޑރ.މުއިއްޒު ޗައިނާ އަށް ކުރެއްވި ދަތުރުފުޅު ނިންމާލެއްވުމަށްފަހު ވަޑައިގެން ނޫސްވެރިންނާއި ބައްދަލު ކުރައްވަމުން ވަނީ އިންޑިއާއިން ދެކޭ ގޮތަށް ރާއްޖެ އަކީ އެއްވެސް ބައެއްގެ ބެކްޔާޑު ނޫން ކަމަށާއި، ރާއްޖެ ކުޑަޔަސް ބްލީ ކުރުމުގެ ހައްގު ނޯންނާނެ ކަމަށް ވިދާޅުވެފައެވެ. އަދި ރާއްޖޭގައި ތިބި ސިފައިން މާޗު މަހުގެ 15 ގެ ކުރިން ގެންދިޔުމަށްވެސް އެމަނިކުފާނު ވަނީ އެދިފައެވެ.

މި ކަންތައްތަކާއި ގުޅޭ ގޮތުން މަޝްވަރާކުރުމަށް އިއްޔެ އިންޑިއާ އާއި ރާއްޖޭގެ ޓީމެއް އެކުލެވޭ ހައި ލެވެލް ކޮމިޓީގެ މީޓިން އެއް ބާއްވާފައިވާއިރު މި މީޓިންގައި މި ޤައުމުގައި ތިބި އިންޑިއާގެ ސިފައިން އަނބުރާ ގެންދިއުމުގެ މަސައްކަތް "ފާސްޓް ޓްރެކް" ގައި ކުރިއަށް ގެންދަން އިންޑިޔާއިން އެއްބަސްވެފައިވާ ކަމަށް ރާއްޖޭގެ ޚާރިޖީ ވުޒާރާއިން ވަނީ ބުނެފައެވެ. އަދި ރާއްޖެ އާއި އިންޑިއާގެ މަސްލަހަތު ހިމެނޭ ކަންކަމާ ގުޅޭ ގޮތުން ފުޅާދާއިރާއެއްގައި މަޝްވަރާ ކުރެވުނު ކަމަށާއި ގުޅުން އިތުރަށް ބަދަހި ކުރުމަށް ބޭނުންވާކަން، ދެ ގައުމުން ވެސް މި ބައްދަލުވުމުގައި ހާމަކޮށްފައިވާ ކަމަށް ވެސް އެ ވުޒާރާއިން މައުލޫމާތު ދެއެވެ.