ގައުމީ ފެންވަރުގައި ކުޅިވަރުތައް ކުޅޭ އެތުލީޓުންނަށް ހަފްތާއަކު ތިން ދުވަހު ތެރަޕީ ނެގޭނެ ގޮތް ހަދައިފިއެވެ.
މިކަން އިއުލާން ކުރެއްވީ، ކުޅުންތެރިންނަށް ފަރުވާދޭނެ މިނިމަމް މެޑިކަލް ރިކުއަޔަރމަންޓްސް ފެސިލިޓީގެ ހިދުމަތް ސޯޝަލް ސެންޓަރުގައި ގާއިމްކޮށް އެތަން އިފްތިތާހުކުރުމަށް ރޭ ސޯޝަލް ސެންޓަރުގައި ބޭއްވި ހާއްސަ ރަސްމިއްޔާތުގައި ވާހަކަ ދައްކަވަމުން މިނިސްޓަރ އޮފް ސްޕޯޓްސް އެންޑް ފިޓްނަސް އަބްދުالله ރާފިއުއެވެ.
ވަޒީރު ރާފިޢު ވިދާޅުވީ، ރޭ އިފްތިތާހު ކުރެވުނު މިނިމަމް މެޑިކަލް ރިކުއަޔަރމަންޓްސް ފެސިލިޓީ އާއި އެކު ބައިނަލްއަގްވާމީ ކުޅިވަރު މުބާރާތްތައް ބާއްވާ ތަންތަނުގައި ހުރުން ލާޒިމުކުރާ ސިއްހީ ހިދުމަތްތަކާބެހޭ މިންގަނޑުތައް އެކުލަވާލުމަށް ސަރުކާރުން ވީ ވައުދު ފުދިގެން ގޮސްފައިވާ ކަމަށެވެ.
ރާފިއު އިތުރަށް ވިދާޅުވީ ކުޅިވަރު ކުޅޭ ސްޓޭޑިއަމް ތަކުގައި މެޑިކަލް ރޫމް ހެދި އެ ތަންތަނުގައި ބޭނުންވާ އާލާތްތައް މިހާރު ފުރިހަމަ ކުރެވިފައިވާ ކަމަށާއި އަދި އެ ފެސިލިޓީތަކަަށް ބޭނުންވާ ފަސްޓް އެއިޑުން ތަމްރީން ކުރެވި، މޯލްޑިވްސް އޮލިމްޕިކް ކޮމިޓީއާ ގުޅިގެން އެކަން ހަމަޖެހިފައިވާ ކަމަށެވެ.
ކުޅުންތެރިންނަށް ފަރުވާދޭނެ މިނިމަމް މެޑިކަލް ރިކުއަޔަރމަންޓްސް ފެސިލިޓީގެ ހިދުމަތް އިފުތިތާހުކުރުމަށް ބޭއްވި ރަސްމިއްޔާތުގައި ވަޒީރު ރާފިޢު ވާހަކަ ދައްކަވަނީ--ފޮޓޯ/ ރައީސް އޮފީސް
"މީގެއިތުރުން ތިޔަ އެތުލީޓުން ހަފްތާއަކު ތިން ދުވަހު ތެރަޕީ ނެގޭނެ ގޮތް ވެސް މާދަމާ އިން ފެށިގެން ހަމަޖެހިގެން ދާނެ. އަދި މިކަން ކުރުމަށްޓަކައި ހާއްސަ ވެބްސައިޓެއް ވެސް މާދަމާ އިން ފެށިގެން އިފްތިތާހުވެގެން ދާނެ. އިރާދަކުރެއްވިޔާ ތިކުދިންނަށް ތެރަޕީ ހެދުމަށްޓަކައި އެޕްލިކޭޝަން އެއްވެސް މިހަފްތާ ތެރޭގައި އޮލިމްޕިކް ކޮމިޓީން އިންޓްރޮޑިޔުސް ކޮށްގެން، އެޕްލިކޭޝަން މެދުވެރިކޮށް އެޕޮއިންޓްމަންޓް ހެދުމުގެ ކަންތައްވެސް ކުރިއަށްދާނެ"
މިނިސްޓަރ އޮފް ސްޕޯޓްސް އެންޑް ފިޓްނަސް އަބްދުالله ރާފިޢު
ރާފިއު ވިދާޅުވި ގޮތުގައި މި އަސާސީ ހިދުމަތަކީ ކުޅިވަރު ކުޅޭ އެތުލީޓުންގެ ބޭނުންތައް ދެނެގަނެ، އެކަންކަމަށް އަވަސް ހައްލެއް ހޯދުމަށް އަދުގެ ސަރުކާރުން ކުރަމުންދާ މަސައްކަތުގެ އަލިގަދަ ހެއްކެކެވެ.
"މިއަދު މި އިފްތިތާހު ކުރެވުނު ހިދުމަތަކީ ކުޅިވަރުގެ ދާއިރާގައި އަޅާނުލެވި އެހެންނަމަވެސް އެކަމަށް ވަރަށް ބޮޑަށް ބޭނުންވެފައި އޮތް ހިދުމަތެއް. މި ހިދުމަތުގެ ސަބަބުން ބޮޑު އިންގިލާބީ ބަދަލެއް ހަމަ ޔަގީނުން ވެސް ކުޅިވަރުގެ މި ދާއިރާ އަށް ފެނިގެންދާނެ. ދަނޑުގައި އެތުލީޓުންނަށް ކުރިމަތިވާ އަނިޔާތަކަށް އެދެވޭ ފަރުވާ ދިނުމަކީ ގައުމީ ފެންވަރުގައި އެ ކުދިންނަށް ލިބޭ ހިދުމަތެއް ކަމުގައި އަޅުގަނޑު ގަބޫލު ކުރަން،" .
މިނިސްޓަރ އޮފް ސްޕޯޓްސް އެންޑް ފިޓްނަސް އަބްދުالله ރާފިޢު
ކުޅިވަރު ކުޅޭ ތަންތަނުގައި ހުންނަ މެޑިކަލް ރޫމް، ދަށްވެގެން ވަކި ޞިއްޙީ މިންގަނޑެއްގައި ޤާއިމުކޮށްފައި ހުންނަންޖެހެއެވެ. ޤައުމީ އަދި ބައިނަލްއަޤްވާމީ ކުޅިވަރު މުބާރާތްތައް ބާއްވާ ތަންތަނުގައި ހުރުން ލާޒިމްކުރާ ޞިއްޙީ ޚިދުމަތް ފޯރުކޮށްދިނުމުގެ ވަޞީލަތްތައް ޤާއިމުކުރުމުގެ މަޤްޞަދުތަކުގެ ތެރޭގައި ކުޅުންތެރިއަކަށް، އޮފިޝަލަކަށް ނުވަތަ ބެލުންތެރިއަކަށް ޞިއްޙީ ފުރަތަމަ އެހީ ދޭންޖެހޭފަދަ ހާލަތެއް މެދުވެރިވެއްޖެނަމަ އެހީތެރިވެދޭނެ އިންތިޒާމުހަމަޖެހިފައިވާކަން ކަށަވަރުކުރުން ހިމެނެއެވެ. އަދި އެފަދަ ހާލަތެއް މެދުވެރިވެއްޖެނަމަ އަވަސްފަރުވާ ދިނުމާއި ވީއެންމެ އަވަސް ފުރުޞަތެއްގައި ރައްކާތެރިކަމާއެކު ޞިއްޙީ ފަރުވާދޭ ހޮސްޕިޓަލަކަށް ނުވަތަ އިމަރޖެންސީ ފަރުވާދޭ ތަނަކަށް ގެންދިއުމުގެ އިންތިޒާމު ހަމަޖެހިފައިވާކަން ކަށަވަރުކުރުން މަޤްޞަދުތަކުގެ ތެރޭގައި ހިމެނެއެވެ.
ކުޅިވަރު ކުރިއެރުވުމާއި ކުޅުންތެރިންނަށް ބޭނުންވާ ޞިއްޙީ ފަރުވާ އަދި ފިޓްނަސްއާ ގުޅޭކަންކަން ފަހިކޮށްދެއްވުމަކީ ރައީސުލްޖުމްހޫރިއްޔާގެ ރިޔާސީ ވަޢުދެކެވެ.
އެގޮތުން ޤައުމީ އަދި ބައިނަލްއަޤްވާމީ ކުޅިވަރު މުބާރާތްތައް ބާއްވާ ތަންތަނުގައި ހުރުން ލާޒިމުކުރާ ޞިއްޙީ ޚިދުމަތްތަކާބެހޭ މިންގަނޑުތައް އެކުލަވާލުމަކީ ސަރުކާރުގެ ހަފްތާ 14ގައި ހިމެނޭކަމެކެވެ.
Advertisement
This content is created and paid for by advertisers and does not involve Voice Journalists
