ސިރިޔާއަށް ހަނގުރާމައަށް ގޮސް، ހާލުގައި ޖެހިފައި ތިއްބާ މިއަދު ރާއްޖެ ގެނެވުނު ހުރިހާ ދިވެހިންގެވެސް، ކޮންމެ މީހެއް ވަކިވަކިން އެސެސްމަންޓް ހަދާނެ ކަމަށް، ދާޚިލީ ވަޒީރު ޢަލީ އިޙުސާން ވިދާޅުވެއްޖެ އެވެ.
ސީރިޔާއިން ގެނެވުނު ދިވެހިންނާއި ގުޅޭގޮތުން މަޢުލޫމާތު ދިނުމަށް މިއަދު ބޭއްވުނު ނޫސްވެރިންގެ ބައްދަލުވުމުގައި ވަޒީރު އިހްސާން ވިދާޅުވެފައިވާ ގޮތުގައި، ސިރިޔާ އަދި ތުރުކީ ގުޅޭ ބޯޑަރުގައި ހާލުގައި ޖެހިފައި ތިބި އެ މީހުންގެ ތެރޭގައި ހިމެނެނީ 5 ޢާއިލާއަކަށް ނިސްބަތްވާ 21 މީހުންނެވެ.
އޭގެ ތެރެއިން އެކަކީ ފިރިހެނެއް ކަމަށާ އަނެއް 5 މީހުންނަކީ އަންހެނުން ކަމަށާ، އަދި ދެން ތިބި 15 ދިވެހިންނަކީ 18 އަހަރު ނުފުރޭ ކުޑަކުދިން ކަމަށް އޭނާ ވިދާޅުވި އެވެ. އަދި އެ 15 ކުދިންނަކީވެސް އެތަނުގައި ތިބި 5 އަންހެނުންގެ ދަރިންކަން ޑީއެންއޭ ޓެސްޓް ހަދައިގެން ކަށަވަރު ކޮށްފައިވާ ކަމަށް އޭނާ ވިދާޅުވި އެވެ.
އިހްސާން އިތުރަށް ވިދާޅުވީ، އެ އެންމެންވެސް ރާއްޖެ ގެނެވި, އެންމެންގެ މެޑިކަލް އެސެސްމެންޓް ހެދުމަށްފަހު، މިހާރު އެމީހުން ވަނީ، ހިންމަފުށީގައި ހުންނަ ނެޝަނަލް ރީ އިންޓެގްރޭޝަން ސެންޓަރަށް ގެންދެވިފައިވާ ކަމަށެވެ. އަދި އެތަނުގައި މަސައްކަތް ކުރާ މުވައްޒަފުންނަކީ، އެ މަސައްކަތަށް ހާއްސަކޮށް ތަމްރީނާއި ތަޖުރިބާ ލިބިފައިވާ މުވައްޒަފުން ކަމަށެވެ.
ނެޝަނަލް ރީ އިންޓެގްރޭޝަން ސެންޓަރުން ބެލި ބެލުމުން، އެތަނަށް ގެންދެވުނު މީހުންގެ ސިއްހީ ހާލަތު ރަނގަޅުކަން ފާހަގަކުރެއްވައި އިހްސާން ވިދާޅުވީ، ދެން ކުރިއަށް ގެންދަން ނިންމާފައިވަނީ ގެނެވުނު މީހުންގެ އެސެސްމެންޓެއް ކަމަށެވެ.
މި އެސެސްމަންޓް ތަކުގެ ޒަރީޢާއިން އަޅުގަނޑުމެން ދެނެގަންނާނަން ކޮން ހާލަތެއްގައި ތޯ އެމީހުން ތިބީ. ކޮންމެ ބޭފުޅެއްގެ ވަކިވަކި އެސެސްމެންޓް ހެދޭނެ. ހަދާފައި އެހިސާބުން އަޅުގަނޑުމެންގެ ޕްރޮފެޝަނަލްސް މި ނިންމަކީ ކޮން ކަހަލަ ރިހެބިލިޓޭޝަން ޕްރޮގްރާމެއްތޯ އެ ބޭފުޅަކަށް ގެންދަން ޖެހެނީ. އެހެންވީމާ އެބޭފުޅެއްގެ ހާލަތު ދެނެގަނެފައި، އެ ބޭފުޅެއްގެ ހާލަތާ އެކަށީގެންވާ ރީ ހެބިލިޓޭޝަން ޕްރޮގްރާމެއް ޑިޒައިން ކުރާނެ، ނެޝަނަލް ރީ ރެޖިސްޓްރޭޝަން ސެންޓަރު ގައި ތިއްބަވާ މި ދާއިރާގެ ޕްރޮފެޝަނަލުން.
ޢަލީ އިހްސާން
ޝަނަލް ރީ ރެޖިސްޓްރޭޝަން ސެންޓަރު ގައި ތިއްބަވާ މި ދާއިރާގެ ޕްރޮފެޝަނަލުން ތައްޔާރު ކުރާ ޕްރޮގްރާމް ކުރިއަށް ގެންދެވޭނީ ރިހެބިލިޓޭޝަން އެންޑް ރީ އިންޓެގްރޭޝަން ކޮމިޓީއަަށް ފޮނުވައި، އެ ކޮމިޓީން ޕްރޮގްރާމް އެޕްރޫވް ކުރުމުން ކަމަށް އިހްސާން ވިދާޅުވިއެވެ.
އަދި އެ ޕްރޮގްރާމް ތެރެއިން އެކި ހިސާބުތަކުގައި އެކި އެސެސްމެންޓްތައް ހެދޭނެ ކަމަށާ، އެ އެސެސްމަންޓްތައް ބަލައި، އެ މީހުންނަކީ، ދިވެހި މުޖުތަމަޢުގައި އާއްމު ހާލަތުގައި ދިރިއުޅެވޭނެ މީހެއްކަން ކަށަވަރު ކުރުމަށްފަހު، މުޖުތަމަޢުއަަށް ރީ އިންޓެގްރޭޓެ ކުރުމުގެ މަސައްކަތް ފައްޓަވާނެ ކަމަށް އޭނާ ވިދާޅުވި އެވެ.
އިހްސާން އިތުރަށް ވިދާޅުވީ، މީގެ ކުރިން 2022 ވަނަ އަހަރު ރާއްޖެ ގެނެވުނު ޢާއިލާގެ އެ މަރުހަލާތައް ނިމެން 1 އަހަރާއީ 1 މަސްދުވަސް ނެގިކަމަށެވެ. އަދި އެގޮތުން ގެނެވޭ މީހުން ހުރިހާ މަރުހަލާ ނިމޭ މުއްދަތު ކަނޑައެޅޭނީ އެމީހުންގެ ހާލަތަށް ބަލާފައި ކަމަށެވެ.
Advertisement
This content is created and paid for by advertisers and does not involve Voice Journalists
