ށ އަތޮޅު ބިލެތްފާހީގައި ރަށު އާސާރެއް ހުޅުވައިފިއެވެ. 

ބިލެއްފަހީ އާސާރު ހުޅުވާފައި ވަނީ އިއްޔެ ހަވީރު 4:15 އެކަމަށްޓަކައި ބޭއްވުނު ޚާއްސަ ރަސްމިއްޔާތެއްގެ ތެރެއިންނެވެ. މި ރަސްމިއްޔާތު ޝަރަފްވެރި ކޮށްދެއްވީ ސިއްރު ފެންފުށި ރިސޯޓުގެ މެނޭޖުމަންޓުގެ ބޭފުޅުންނާއި "އިހުތިބީންގެ ދުލުން އެވޭލާ ދިރިއުޅުން" ފޮތުގެ ލިޔުންތެރިޔާ، ށ.ކަނޑިތީމް، ހަސަން ޒަރީރެވެ.

ބިލެތްފަހީގެ ޒުވާނެއް ކަމަށްވާ އަލީ ސާމިރުގެ އިސްނެގުމާއެކު، އޭނާ އެ ރަށު ކައުންސިލާއި، ރަށުގެ ޒުވާނުންނާއެކު އެ ރަށު އާސާރެއް ހުޅުވުމަށް ކުރެއްވި މަސައްކަތުގެ މައިގަނޑު މަގްސަދަކީ ރަށަށް އަންނަ ފަތުރުވެރިންގެ އަދަދު އިތުރު ކުރުމާއި ރަށު ކައުންސިލަށް ލިބޭ އާމްދަނީ އިތުރުކޮށް ރަށުގެ މަގްބޫލުކަން ރާއްޖޭގައި އިތުރު ކުރުން ކަމަށް އެފަރާތުން މައުލޫމާތު ދެއެވެ. 

Advertisement

މިއާސަރުގައި ކުރީޒަމާނު އެ ރަށުގައި ބޭނުން ކޮއްފައި ހުރި ޒަމާންވީ ވަސީލަތްތަކާއި، ބިލެތްފަހި އެކަމަކަށް މަޝްހޫރު ކިއްސަރު ވަޑާން ކުރަން ބޭނުން ކުރާ އާލާތްތަކުގެ ތެރޭގައި ހިމެނޭ، އަތު ރޮނދާ، ބޮޑު މުގުރު ފަދަ ތަކެތި ވަނީ ބަހަށްޓާފައެވެ. މީގެ އިތުރުން ކުރީގައި ރަށު އޮފީހުގައި ބޭނުން ކުރި ޓައިޕް ރައިޓަރު، ސަންގު ކަހަލަ ތަކެތި ވަނީ ބަހަށްޓާފައެވެ.

މި އާސާރުގައި އެންމެ އިހުގެ، ރަށު އޮފީހުގެ އިދާރީ ލިޔެކިޔުންތައް، އަދު ވެރިކަން ކުރެއްވި ބޭފުޅުން ގެންގުޅުއްވި ފޮތް ތައްވެސް ވަނީ ބަހަށްޓާފައެވެ. އަދި 1300 ގެ އަހަރު ތަކުގައި ބޭނުންކުރި މައުލޫދު ފޮތްތައް ވެސް ހިމެނެއެވެ.

މީގެ އިތުރުން، މި އާސާރުން ސްކޫލް ދަރިވަރުންނަށް ވަރަށް ބޭނުން ހިފޭނެ ކުރީގެ މުހިންމު މައުލޫމާތު ތަކާއި، އިހުޒަމާނުގައި މީހުން ގެންގުޅުނު އާލާތްތަކުގެ މައުލޫމާތު ވެސް ލިބެން ހުރެއެވެ

މި އާސާރު ބަލާލުމަށް އެދޭ ކޮންމެ މީހެއްގެ އަތުން ފީގެ ގޮތުގައި ވަކި އަދަދަކަށް ފައިސާ ރަށު ކައުންސިލަށް ދެއްކާ ގޮތަށް ހަމަ ޖެހިފައިވާ ކަމަށްވެސް އެ ރަށުން ވޮއިސް އަށް މައުލޫމާތު ދިން ފަރާތުން ބުނެފައި ވެއެވެ.