ޕްރޮގްރެސިވް ކޮންގްރެސް ކޯލިޝަންގެ ރައްޔިތުން މަޖިލީހުގެ ޕްރައިމަރީ ޖަނަވަރީ 27 ގައި ބާއްވާ ގޮތަށް ހަމަޖައްސައި، ވޯޓު ލެވޭ މީހުންގެ ލިސްޓު ޢާންމު ކޮށްފިއެވެ. 

2024 ވަނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ޕްރޮގްރެސިވް ކޮންގްރެސް ކޯލިޝަންގެ ފަރާތުން ވާދަކުރާ ކެންޑިޑޭޓުން ކަނޑައެޅުމަށް ބާއްވާ ޕްރޮގްރެސިވް ކޮންގްރެސް ކޯލިޝަންގެ ޕްރައިމަރީ އެންމެ ފުރަތަަމަ ބާއްވާ ގޮތަށް ނިންމީ ޑިސެމްބަރު 25 ގައެވެ. 

އެފަހުން، އެ ތާރީޚް މިމަހު 20 ވަނަ ދުވަހަށްވެސް ފަސްކުރެވުނެވެ.

ނަމަވެސް އެ ދުވަހުވެސް ނުބާއްވާ މިހާރު ޕްރައިމަރީ ބާއްވާ ގޮތަށް ހަމަޖެހިފައި ވަނީ 2024 ޖަނަވަރީ 27 ވާ ހޮނިހިރު ދުވަހު ކަމަށް ރޭ އެ ކޯލިޝަނުން ނެރުނު ނޫސްބަޔާނެއްގައި ބުނެފައި ވެއެވެ.

އަދި މި ޕްރައިމަރީގައި ވޯޓު ލެވޭ މި ކޯލިޝަންގެ މެންބަރުންގެ ލިސްޓް ވަނީ www.pnc.mv ވެބްސައިޓްގައި ޢާންމު ކުރެވިފައިވާ ކަމަށްވެސް ބުންޏެވެ.

އެހެންކަމުން، ވޯޓު ލެވޭ މީހުންގެ ލިސްޓުގައި އެއްވެސް މައްސަލައެއް ފާހަގަކުރެވިފައިވާނަމަ، މައްސަލައިގެ ތަފްސީލާއެކު ލިޔުމުން 2024 ޖަނަވަރީ 18 ވާ ބުރާސްފަތި ދުވަހުގެ އިރުއޮއްސި 6:00 ގެ ކުރިން ޕީއެންސީ އޮފީސް (ސީ ޓްރެކް ބިލްޑިންގ 7 ވަނަ ފަންގިފިލާ) އަށް ނުވަތަ [email protected] އަށް ފޮނުއްވުމަށް އެދިފައިވެއެވެ.

އަދި މި ތާރީޚްގެ ފަހުން ފޮނުވާ އެއްވެސް ޝަކުވާއެއް ބަލައިނުގަނެވޭނެ ކަމަށްވެސް އެ ބަޔާނުގައި ވެއެވެ.

ރައްޔިތުންގެ މަޖިލިސް އިންތިޚާބު ބޭއްވުމަށް އިލެކްޝަންސް ކޮމިޝަނުން ނިންމަވަފައިވަނީ މާރޗް މަހުގެ 17 ވަނަ ދުވަހުއެވެ.