ރާއްޖޭގައި މީގެ ތިން އަހަރު ކުރިން ފެށިގެން މިހާތަނަށް އެއްކޮށްފައިވާ ތަފާސްހިސާބުތަކަށް ބަލާއިރު، ކުއްލި ހާލަތުގައި ބޭސްފަރުވާގެ ބޭނުމަށް މީހުން އުފުލުމުގައި ނުވަތަ މެޑިކަލް އިވެކުއޭޝަންގެ 93 ޕަސެންޓް ދަތުރު ކޮށްފައި ވަނީ މޯލްޑިވިއަން އެއާލައިނުން ކަމަށް ޑިފެންސް މިނިސްޓަރ މުހައްމަދު ޣައްސާން މައުމޫން މިއަދު ވިދާޅުވެއްޖެ އެވެ.
ޣައްސާން މިފަދައިން ވިދާޅުވެފައި މިވަނީ ގއ. ވިލިނގިލިން ކުއްލި ހާލަތުގައި މިދިޔަ ބުރާސްފަތި ދުވަހު މާލެ ގެނެސް ފަރުވާ ދެނިކޮށް އުމުރުން 13 އަހަރުގެ ކުއްޖަކު މިއަދު ނިޔާވީ، އެކުއްޖާ މާލެ ގެނައުން ލަސްވެ، އިތުރު ފަރުވާ ވެސް ލަސްވުމުން ކަމަށް އެ ކުއްޖާގެ އާއިލާ އިން ކުރާ ތުހުމަތުތަކާއި ގުޅިގެން ސަރުކާރަށް ފާޑުކިޔުން އަމާޒުވެފައިވާ މި ދަނޑިވަޅުގައި އެކްސް މެދުވެރިކުރައްވާ މިރޭ ކުރެއްވި ޕޯސްޓެއްގައެވެ.
އެޕޯސްޓުގައި މިނިސްޓަރ ވިދާޅުވީ 2021 އިން ފެށިގެން ތަފާސް ހިސާބުތަކަށް ބަލާއިރު މެޑިކަލް އިވެކުއޭޝަންގެ 93 ޕަސެންޓް ދަތުރު ކުރީ އައިލެންޑް އޭވިއޭޝަންގެ ދަށުން ހިންގާ މޯލްޑިވިއަން އެއާލައިނުން ކަމަށެވެ.
"މެޑިކަލް އޮޕަރޭޝަންގެ އެސްއޯޕީ ގައި ރައީސުލްޖުމްހޫރިއްޔާ އަށް އިންފޯމް ކުރުމެއް، ހުއްދަ ދެއްވުމެއް ނޯވޭ. އެއީ އެކަމާ ގުޅޭ އިދާރާތަކުން ކޯޑިނޭޓް ކުރެވިގެން ހިނގާ ކަމެއް،"
ޑިފެންސް މިނިސްޓަރ ޣައްސާންގެ ޕޯސްޓުގައި ވިދާޅުވެފައިވެއެވެ.
ބެލެވޭ ގޮތުގައި މިނިސްޓަރ ޣައްސާން މިފަދައިން ވިދާޅުވެފައި މިވަނީ އެ ކުއްޖާ ބުދަ ދުވަހުގެ އިރުއޮއްސެން އުޅެނިކޮށް މާލެ ގެނެވޭވަރުވީ ރައީސް ޑރ. މުހައްމަދު މުއިއްޒުގެ ސީދާ ހުއްދަ ނުލިބިގެން ކަމަށް ބުނެ ފަތުރަމުންދާ ވާހަކަތަކާ ގުޅިގެންނެވެ.
މި ސަރުކާރުން މިހާރު ނިންމާފައި ވަނީ އަންނަ މާރޗުމަހުގެ 1 ވަނަ ދުވަހުން ފެށިގެން ރާއްޖެ އަށް އެއާރ އެމްބިއުލާންސް ތައާރަފް ކުރުމަށެވެ.
Advertisement
This content is created and paid for by advertisers and does not involve Voice Journalists
