ފާއިތުވެދިޔަ 24 ގަޑިއިރުގެ ތެރޭގައި، މޯލްޑިވިއަންގެ ޗާޓަރ ފްލައިޓުން، އެމެޖެންސީގައި 3 ބަލިމީހުން އުފުލާފައިވާ ކަމަށް، ސިޓީ ތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާގެ ވަޒީރު އާދަމް ޝަރީފް ޢުމަރު ވިދާޅުވެއްޖެ އެވެ. 

ޝަރީފް ރޭ ކުރެއްވި ޓްވީޓެއްގައި ވިދާޅުވީ، ރޭ ހިނގައިދިޔަ އެކްސިޑެންޓެއްގައި އަނިޔާވި މީހާ، މާލެ ގެނައުމަށްޓަކައި، ރޭ ދަންވަރު 1:30ގައި ފުރަން ތައްޔާރު ކޮށްފައިވާ ކަމަށެވެ.

އެމީހާގެ އެކްސިޑެންޓް ހިނގި ކަމަށް ފުލުހުންނަށް ރިޕޯޓް ކުރީ ރޭ 22:15 ގައި ކަމަށް ފުލުހުން މިއަދު ބުނެފައިވެއެވެ. 

Advertisement

ޝަރީފް އިތުރަށް ވިދާޅުވީ އެމީހާ ހިމެނޭހެން ފާއިތުވެގެންދިޔަ 24 ގަޑިއިރު ތެރޭ އެފަދައިން އެމެޖެންސީގައި މޯލްޑިވިއަންގެ ތިންވަނަ ފްލައިޓަކުން ބަލިމީހުން އުފުލާފައިވާ ކަމަށެވެ. 

މިނިސްޓަރ ޝަރީފް މިފަދައިން ވިދާޅުވެފައި ވާއިރު،  ގއ. ވިލިނގިލީ، ޕެންޒީއާގޭ، ޢުމުރުން 13 އަހަރުގެ މުޙައްމަދު ޖާހު ޚާލިދު، ނިޔާވި ހާދިސާއާއި ގުޅިގެން މިފަދަ ހާދިސާއެއް ތަކުރާރުވިޔަ ނުދިނުމަށް އަޅުއްވާ ފިޔަވަޅެއްގެ ގޮތުން ދިވެހި ސަރުކާރުގެ ފަރާތުން ކުއްލި ފަރުވާއަށް ބަލިމީހުން ގެނެސްދިނުމުގައި ޢަމަލުކުރަމުން އަންނަ ނިޒާމު އިޞްލާޙުކުރުމަށް ކަމާ ގުޅުން ހުރި ސަރުކާރުގެ ހުރިހާ އިދާރާތަކަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ އަންގަވާފައެވެ. 

އެގޮތުން ބަލި ޙާލަތެއް މެދުވެރިވެގެން، އިތުރު ފަރުވާ ދިނުމަށް، ވައިގެމަގުން ބަލިމީހަކު ގެނެސްދޭންޖެހޭ އެއްވެސް ޙާލަތެއްގައި، އާސަންދަ ފަދަ އިދާރާތަކުން ކަންކަން ހަމަޖެހެންދެން މަޑުނުކުރެއްވުމަށް ރައީސުލްޖުމްހޫރިއްޔާވަނީ، އެދިވަޑައިގެންފައެވެ. އަދި ޞިއްޙީ ފަރުވާދޭ ތަނަކުން އެފަދަ ކަމަށް އެދުމާއެކު، ވީ އެންމެ އަވަހަކަށް ބަލިމީހާ ގެނެސްދިނުމަށް އިސްކަން ދިނުމުގެ އުޞޫލެއް އައިލެންޑް އޭވިއޭޝަނުން ކަނޑައަޅައި އެގޮތަށް އަބަދުވެސް ޢަމަލުކުރަމުން ގެންދިއުމަށް ރައީސުލްޖުމްހޫރިއްޔާވަނީ އެދިވަޑައިގެންފައެވެ.