ދައުލަތުގެ ދަރަނި އިންތިހާއަށް ބޮޑުވެފައި އޮތްއިރު އާމްދަނީ އިތުރުކުރުމުގެ މަޝްރޫއުތައް ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ސަރުކާރުން ކުރިއަށް ނުގެންދާ ކަމަށް ބުނެ ކުރީގެ ރައީސް އަބްދުالله ޔާމީން އަބްދުލްގައްޔޫމް ރޭ ނުރުހުން ފާޅުކުރައްވައިފިއެވެ.
ރޭ ރައީސް ޔާމީންގެ ޕާޓީ، ޕީޕަލްސް ނެޝަނަލް ފްރޮންޓް، ޕީއެންއެފް އޮފީހުގައި ބޭއްވި ޖަލްސާއެއްގައި ވާހަކަދެއްކެވި ބޭބޭފުޅުންނާ އަމާޒު ކުރައްވައި އެމަނިކުފާނު ވަނީ ދައުލަތުގެ ދަރަނި އިންތިހާއަށް ބޮޑުވެފައިވާއިރު ސަރުކާރުން އިއުލާން ކުރަމުންދާ ކަންކަމުން ފެންނަމުންދަނީ ޚަރަދުތައް އިތުރުވާތަންކަން ފާހަގަކުރައްވާފައެވެ.
"މިސަރުކާރުގެ މި ކުރައްވާ ކަންތައްތަކާއި، އިއުލާން ކުރައްވާ ކަންތައްތަކުން، ހައްތަހާވެސް މިފެންނަނީ، ދެން ހަމަ ރައްޔިތުންގެ ހެވާ ލާބައަށް ކުރާ ކަންކަން، އެއަކާ އަޅުގަނޑު ޑައުޓު ކުރަނީއެއް ނޫން. އެހެންނަމަވެސް ހައްތަހައި ވެސް މި ފެންނަނީ ޚަރަދު، ޚަރަދު، ޚަރަދު،"
ކުރީގެ ރައީސް ޔާމީން އަބްދުލްގައްޔޫމް
މިއާއެކު ރައީސް ޔާމީން ވިދާޅުވީ، ނިމުނު އެމްޑީޕީ ސަރުކާރުން އިންޑިއާއިން އެކަނި ވެސް 3،000 މިލިއަން އެމެރިކާ ޑޮލަރާ ގާތްކުރާ އަދަދަކަށް ދަރަނި ނަގާފައިވާ ކަމަށެވެ. އެ ފައިސާ ދައްކަން އާމްދަނީ ލިބޭ މަޝްރޫޢުތައް ހިންގުމުގެ ބަދަލުގައި މި ސަރުކާރުން ވެސް ހައްތަހައި ޚަރަދު ބޮޑުކުރަނީ ކަމަށް ވިދާޅުވެ، އެ މަނިކުފާނު ވަނީ ނުރުހުން ފާޅުކުރައްވައިފައެވެ.
ކަންމިހެން ހުރިއިރު، ފަސް އަހަރަށް ވުރެ ގިނަ ދުވަސް ވެގެންދިޔައިރު އެ މަނިކުފާނުގެ ސަރުކާރުން ފެއްޓި ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ މަޝްރޫއު ވެސް ނިންމައިނުލެވޭކަމަށާ، އާމްދަނީއެއް ލިބޭނެ ކަމެއްގެ ވާހަކަ ސަރުކާރަށް ނުދެއްކޭ ކަމަށް އެމާނިކުފާނު ވިދާޅުވިއެވެ.
"މި ސަރުކާރުގެ އެއްވެސް ވަޒީރަކު ނޫނިއްޔާ މި ސަރުކާރުގެ އެހެން ވެސް މަސްއޫލުވެރި ބޭފުޅަކު މިވެނި މިވެނި ކަންތައްތަކަކުން އިގުތިސާދީ އާމްދަނީ ހޯދާނެ މިވެނި މިވެނި މަޝްރޫއުތައް މި ފަށަނީއޭ. މީގެ ނަތީޖާ މިވެނި ދުވަހެއްގައި ފެންނާނޭ ވިދާޅުވާތަނެއް އަޅުގަނޑަކަށް ނުފެނޭ،"
ކުރީގެ ރައީސް ޔާމީން އަބްދުލްގައްޔޫމް
އެހެންކަމުން، ސަރުކާރުގެ ޚަރަދުތައް ހަމަޖެއްސޭނެތޯ ރައީސް ޔާމީން ވަނީ ސުވާލުކުރައްވާފައެވެ.
"އަޅުގަނޑުމެންނަށް ސަސްޓެއިން ކުރެވޭނެ ހެއްޔޭ މިހެން ހަމަ؟ ޚަރަދު ކުރަމުން ކުރަމުންނޭ މި ދަނީ އަދިވެސް. އެކަމު އާމްދަނީ ލިބޭނެ ގޮތްތަކެއް އަދިވެސް އަޅުގަނޑުމެންނަކަށް ނުފެނޭ،"
ކުރީގެ ރައީސް ޔާމީން އަބްދުލްގައްޔޫމް
ރައީސް ޔާމީން ވިދާޅުވީ، މާރިޗުމަހުގެ ތެރޭގައި އައިއެމްއެފްގެ ބޭފުޅުން ރާއްޖެއަށް އަންނައިރު، މިދިޔަ ފަސް އަހަރުގެ ބޮޑު ދަރަނީގެ ތެރެއަށް މިސަރުކާރުން ހިންގަމުންދާ މަޝްރޫއުގެ ދަރަނިތައް ވެސް އެއްވަމުން އަންނަ ކަމަށެވެ.
ވުމާއެކު އާމްދަނީގެ އެއްވެސް މަޝްރޫއެއް ނުފެންނާތީ އެމަނިކުފާނު ވަނީ ކަންބޮޑުވުން ފާޅުކުރައްވާފަ އެވެ.
Advertisement
This content is created and paid for by advertisers and does not involve Voice Journalists
