ދައުލަތާއިި މީގެ ކުރީން ހަވާލުވެ ވަޑައިގެންނެވި ވެރީން އެބޭފުޅުންގެ ސަރުކާރުގެ ފުރަތަމަ 2 މަސްދުވަހު، "ސަރުކާރުގެ" އާމްދަނީ އިތުރު ކުރުމަށް ކުރެއްވި އީޖާދީ މަސައްކަތަކީ ކޮބައިތޯ އިކޮނަމިކް މިނިސްޓަރު މުހައްމަދު ސަޢީދު ސުވާލު ކުރައްވައިފި އެވެ. 

މިސަރުކާރުން ދައުލަތުގެ އާމްދަނީ އިތުރު ކުރަން އެއްވެސް މަސައްްކަތެއް ކުރާތަން ނުފެންނަ ކަމަށް ކުރީގެ ރައީސް ޔާމީން އަބްދުލްގައްޔޫމް ވިދާޅުވެފައިވާ ދަނޑިވަޅެއްގައި، އެމަނިކުފާނުގެ ވެރިކަމުގައިވެސް އިކޮނަމިކް މިނިސްޓަރު ކަން ކުރެއްވި ސައީދު އެކްސްގައި ކުރެއްވި ޕޯސްޓެއްގައި ވަނީ މިސަރުކާރަކުން ދައުލަތުގެ ހަރުމުދާ ވިއްކުމާއި ޤާނޫނު ތަޅުއަޅުވާފައި ފައިސާޗާޕު ކުރުމާއި މާލީޒިއްމާއިން ރެކުން ފަދަ ކަމެއް ނުކުރާނެ ކަމަށެވެ. 

"ދައުލަތާއިި މީގެ ކުރީން ހަވާލުވި ވެރީން އެބޭފުޅުންގެ ސަރުކާރުގެ ފުރަތަމަ 2 މަސްދުވަހު، “ސަރުކާރުގެ” އާމްދަނީ އިތުރު ކުރުމަށް ކުރެއްވި އީޖާދީ މަސައްކަތަކީކޮބައިތޯ؟" ސަޢީދު ސުވާލުކުރައްވާފައިވެއެވެ. 

Advertisement

ސަޢީދު މިފަދައިން ސުވާލު ކުރައްވާފައި ވާއިރު ރޭ ރައީސް ޔާމީންގެ ޕާޓީ، ޕީޕަލްސް ނެޝަނަލް ފްރޮންޓް، ޕީއެންއެފް އޮފީހުގައި ބޭއްވި ޖަލްސާއެއްގައި ވާހަކަދެއްކެވި ބޭބޭފުޅުންނާ އަމާޒު ކުރައްވައި އެމަނިކުފާނު ދެއްކެވި ވާހަކައިގައި ވަނީ ދައުލަތުގެ ދަރަނި އިންތިހާއަށް ބޮޑުވެފައިވާއިރު ސަރުކާރުން އިއުލާން ކުރަމުންދާ ކަންކަމުން ފެންނަމުންދަނީ ޚަރަދުތައް އިތުރުވާތަންކަން ފާހަގަކުރައްވާފައެވެ.  

"މިސަރުކާރުގެ މި ކުރައްވާ ކަންތައްތަކާއި، އިއުލާން ކުރައްވާ ކަންތައްތަކުން، ހައްތަހާވެސް މިފެންނަނީ، ދެން ހަމަ ރައްޔިތުންގެ ހެވާ ލާބައަށް ކުރާ ކަންކަން، އެއަކާ އަޅުގަނޑު ޑައުޓު ކުރަނީއެއް ނޫން. އެހެންނަމަވެސް ހައްތަހައި ވެސް މި ފެންނަނީ ޚަރަދު، ޚަރަދު، ޚަރަދު،"  ރައީސް ޔާމީން ވިދާޅުވި އެވެ. 

މިއާއެކު ރައީސް ޔާމީން ވިދާޅުވީ، ނިމުނު އެމްޑީޕީ ސަރުކާރުން އިންޑިއާއިން އެކަނި ވެސް 3،000 މިލިއަން އެމެރިކާ ޑޮލަރާ ގާތްކުރާ އަދަދަކަށް ދަރަނި ނަގާފައިވާ ކަމަށެވެ. އެ ފައިސާ ދައްކަން އާމްދަނީ ލިބޭ މަޝްރޫޢުތައް ހިންގުމުގެ ބަދަލުގައި މި ސަރުކާރުން ވެސް ހައްތަހައި ޚަރަދު ބޮޑުކުރަނީ ކަމަށް ވިދާޅުވެ، އެ މަނިކުފާނު ވަނީ ނުރުހުން ފާޅުކުރައްވައިފައެވެ.

"މި ސަރުކާރުގެ އެއްވެސް ވަޒީރަކު ނޫނިއްޔާ މި ސަރުކާރުގެ އެހެން ވެސް މަސްއޫލުވެރި ބޭފުޅަކު މިވެނި މިވެނި ކަންތައްތަކަކުން އިގުތިސާދީ އާމްދަނީ ހޯދާނެ މިވެނި މިވެނި މަޝްރޫއުތައް މި ފަށަނީއޭ. މީގެ ނަތީޖާ މިވެނި ދުވަހެއްގައި ފެންނާނޭ ވިދާޅުވާތަނެއް އަޅުގަނޑަކަށް ނުފެނޭ،" ރައީސް ޔާމީން ވިދާޅުވި އެވެ.