ކުރީގެ ރައީސް އަބްދުﷲ ޔާމީން އަބްދުލްގައްޔޫމް އިސްވެ ހުންނަވައިގެން އުފައްދަވާ ސިޔާސީ ޕާރޓީ ޕީޕަލްސް ނެޝަނަލް ފްރަންޓް (ޕީއެންއެފް) ރަޖިސްޓްރީ ކުރުން ދެން ލަސްނުވާނެކަމަށް ޚުދު އެމަނިކުފާނު ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވެފައި ވަނީ ރޭ ޕީއެންއެފް އޮފީހުގައި އޮތް ޖަލްސާ އެއްގައި ވާހަކަފުޅު ދައްކަވަމުންނެވެ.
ފުރަތަމަ ފަހަރަށް ޕާޓީ ރަޖިސްޓްރީ ކުރުމާއި ގުޅޭ ގޮތުން ވާހަކަފުޅު ދައްކަވަމުން ރައީސް ޔާމީން ވިދާޅުވީ ޕާރޓީ ރަޖިސްޓްރީ ކުރުން ލަސްވަނީ ސަބަބުތަކެއް ހުރުމުން ކަމަށެވެ. ނަމަވެސް އެސަބުބަތުކުގެ ތަފްސީލަށް ވަޑައިގެންފައެއް ނުވެއެވެ. އޭގެ ބަދަލުގައި އެމަނިކުފާނު ވިދާޅުވީ މާ ލަސްތަކެއް ނުވެ ޕީއެންއެފް ރަޖިސްޓްރީ ކުރައްވާނެ ކަމަށެވެ.
"އަދި މި އުޅެނީ ޕާޓީ ރަޖިސްޓްރީ ނުކުރެވި. ސަބަބުތަކެއް ހުރެގެން ވެސް މެ. އެހެން ނަމަވެސް އިރާދަ ކުރެއްވިއްޔާ މާ ލަސްތަކެއް ނުވެ އަޅުގަނޑުމެންގެ ޕާޓީ ރަޖިސްޓްރީ ކުރާނަން،"
ރޭގެ ޖަލްސާގައި ރައީސް ޔާމީން ވިދާލުވިއެވެ.
ޕީއެންއެފް އަކީ ކުރީގެ ރައީސް ޔާމީން މިދިޔަ ނޮވެންބަރު މަހު ޕީޕީއެމުން ކުއްލި ގޮތަކަށް ވަކިވެވަޑައިގެން އާ ސިޔާސީ ޕާޓީއެއް އުފައްދަވާނެ ކަމަށް ވިދާޅުވެ ރަޖިސްޓްރީ ކުރެއްވުމަށް މަސައްކަތް ކުރައްވަމުން ގެންދަވާ ސިޔާސީ ޕާރޓީއެކެވެ. މި ޕާރޓީއަށް ސިޔާސީ ޕާރޓީއެއް އުފެއްދުމުގެ ހުއްދަ އިލެކްސަން ކޮމިޝަނުން ދެއްވާފައި ވަނީ މިދިޔަ ނޮވެމްބަރ މަހުގެ 29 ގައެވެ.
ރައީސް ޔާމީން މިވަގުތުވެސް ހުންނެވީ 11 އަހަރުގެ ޖަލުހުމެއްގައި ކަމުން ޕީއެންއެފް އުފެއްދުމުގެ ހުއްދަ އީސީން ދެއްވާފައިވަނީ ޔާމީންގެ ދަރިކަލުން ޒޭން އަބްދުﷲ ޔާމީނަށެވެ.
ރައީސް ޔާމީން ވެސް މިހާރު ޕީއެންއެފް އަށް ސޮއި ކުރައްވާފައި ވާއިރު ، ރަޖިސްޓްރީ ކުރުމަށް ބޭނުންވާ 3000 މީހުންގެ ސޮއިވެސް މިހާރު ހަމަކޮށްފައިވާކަމަށް އެ ޕާރޓީން މައުލޫމާތު ދެއްވައެވެ.
Advertisement
This content is created and paid for by advertisers and does not involve Voice Journalists
