މާރިޗު މަހު އޮންނަ ރައްޔިތުންގެ މަޖިލިހުގެ އިންތިޚާބުގައި ޕްރޮގްރެސިވް ކޮންގުރެންސް ކޯލިޝަންގެ ޕްރައިމަރީގައި މާފަންނު މެދު ދާޢިރާއަށް ވާދަކުރުމަށް ނިންމާފައިވާ މ.ކީކިމިނި އިބްރާޙިމް ރައްޒާން ރަޝީދުގެ ނަން އަބުރާ ގެންގޮސް އެދާޢިރާއަށް ވާދަކުރައްވާ މ.ކުރުވަނި، ޑރ. ފާޠިމަތު ރަޝްނީއަށް ތާއީދުކުރުމަށް ނިންމާ އެކަން އިޢުލާނުކޮށްފިއެވެ.

އެކަން އިޢުލާނުކޮށްފައި ވަނީ އިބްރާޙިމް ރައްޒާން ރަޝީދުގެ ފަރާތުން ޕްރޮގްރެސިވް ކޮންގުރެންސް ކޯލިޝަންއަށް ނިސްބަތްވާ މާފަންނު މެދު ދާޢިރާގެ ރައްޔިތުންނަށް ފޮނުވި ސިޓީއަކުންނެވެ.

މި ސިޓީގައި ރައްޒާން ބުނެފައި ވަނީ އޭނާ އެގޮތަށް ނިންމީ ކުރިއަށް އޮތް ރައްޔިތުން މަޖިލިހުގެ އިންތިހާބުގައި މަދުވެގެން %20 އިންސައްތަ އަންހެނުންނަށް ފުރުޞަތު ދެއްވުމަށް ރައީސް ޑރ. މުހައްމަދު މުއިއްޒުގެ ބޮޑު ތަޞައްވަރެއް އޮތުމާއި އެކު ، ޑރ. ރަޝްނީއަކީ ތަޢުލީމީ ޤާބިލް ޒުވާނަކަށްވެފައި، ޑރ. މުހައްމަދު މުއިއްޒުގެ އެ ސިޔާސަތަށް ތާޢީދުކޮށް އެކަމަށް އެންމެ ފުރިހަމައަށް އެއްބާރުލެއްވުމެއް ދެއްވުމުގެ މަޤްޞަދުގައި ކަމަށެވެ.

Advertisement

އޭގެ އިތުރުން ރައްޒާނުގެ ސިޓީގައި ބުނެފައި ވަނީ މި ކަމުގައި އޭނާ އެންމެ އިސްކޮށްފައި ވާނީ ޕާރޓީގެ ސިޔާސަތުތައް ނެގެހެއްޓުމާއި، ދާއިރާގެ ރައްޔިތުންގެ ކުރިއެރުމާއި، ތަރައްޤީއަށްކުރާ މަސައްކަތްތަކަށް އޭނާއަށް ވެވުނު އެންމެ ފުރިހަމައަކަށް އެއްބާރުލުންދީ ސަރުކާރު ހިންގާ ޕްރޮގްރެސިވް ކޮންގުރެންސް ކޯލިޝަންއަށް 20 ވަނަ ރައްޔިތުން މަޖިލިހުގެ ސްޕަރ މެޖޯރިޓީ ހޯދައި ދިނުމުގެ މަސްލަހަތުކަމަށެވެ.  

މިއާއެކު ރައްޒާނުގެ ސިޓީގައި ބުނެފައި ވަނީ، ޑރ. ރަޝްނީ އަކީ ރައީސް ޑރ. މުހައްމަދު މުއިއްޒުގެ ސިޔާސަތު ތަންފީޒުކުރުމަށް ބޭނުންވާ އެންމެހައި ޤާނޫނުތައް ހެދުމުގައި ރައްޔިތުން މަޖިލިހުގައި މާފަންނު މެދު ދާޢިރާގެ ރައްޔިތުން ތަމްސީލުކުރުމުގެ ޤާބިލްކަން ހުރި ދާއިރާއަށް އިޙްލާސްތެރި ދާއިރާގެ ދަރިއެއް ކަމަށެވެ.

ރައްޒާންގެ ސިޓީ ނިންމާލައިފައި ވަނީ އޭނާއަށް ތާއިދުކުރާ މާފަންނު މެދު ދާޢިރާގެ ރައްޔިތުންގެ އަރިހުން ޑރ. ރަޝްނީއަށް ތާއިދުކުރައްވާ ޕްރޮގްރެސިވް ކޮންގުރެންސް ކޯލިޝަނުން މި މަހުގެ 20 ވަނަ ދުވަހު ކުރިއަށް ގެންދިއުމަށް ނިންމާފައިވާ ޕްރައިމަރީގައި ، ޑރ. ރަޝްނީ ވޯޓްލުމަށް އެދިވަޑައިގަންނަވަމުންނެވެ.

ޑރ.ރަޝްނީ އަކީ ޗައިނާއިން ބެޗެލާ އޮފް މެޑިސިން، ބެޗެލާ އޮފް ސާޖަރީ (އެމްބީބީއެސް) މެޑިކަލް ޑިގްރީ ހާސިލްކޮށް، އަނބުރާ ރާއްޖެ ވަޑައިގަތުމުގެ ކުރިން ބަންގްލަދޭޝް، ސްރީލަންކާ އަދި އިންޑިއާއިން އިތުރު ތަމްރީނުތައް ފުރިހަމަކުރައްވައިގެން ހުންނެވި ބޭފުޅެކެވެ.