"ގައްދޫ ކައުންސިލް ފުޓްސަލް ޗެލެންޖު 2024" ގެ ނަމުގައި މިއަހަރުގެ ނޮވެމްބަރު މަހު 360,000 ރުފިޔާގެ އަގުބޮޑު ފުޓްސަލް މުބާރާތެއް މިއަހަރުގެ ނޮވެމްބަރު މަހު ގދ.ގައްދޫގައި ބޭއްވުމަށް ގައްދޫ ކައުންސިލުން ނިންމައިފިއެވެ.

ގައްދޫ ކައުންސިލުން މިއަދު އާންމުކުރި އިއުލާނެއްގައި ވާގޮތުން ގައްދޫގައި އެންމެ ފަހުން ބޭއްވުނު ކައުންސިލްގެ ފުޓްސަލް ދެ މުބާރާތަކީ ވެސް އަތޮޅު ފެންވަރުގައި ފާހަގަ ކޮއްލެވޭ ދެ މުބާރާތް ކަމަށާއި، އެހެންކަމުން ގައްދޫ ކައުންސިލުގެ މީިހާރުގެ އަމާޒަކީ "ގައްދޫ ފުޓްސަލް ޗެލެންޖު 2024" އަކީ ރާއްޖޭގެ ފެންވަރުގައި ވެސް ފާހަގަކޮއްލެވޭ ފަދަ ފެންވަރު ރަނގަޅު އަގުބޮޑު މުބާރާތަކަށް ހެދުމެވެ.

އެގޮތުން މިއަހަރުގެ މުބާރާތުގައި ވެސް ފިިރިހެން ޑިވިޝަނާއި އަންހެން ޑިވިޝަންގެ އިތުރުން ޖޫނިއަރ ޑިވިޝަން ކުރިއަށް ގެންދިއުމަށް ވަނީ ހަމަޖެހިފައެވެ. އަދި މިދިޔައަހަރުގެ މުބާރާތާއި އަޅާބަލާއިރު، މިއަހަރުގެ މުބާރާތުގެ ޗެންޕިއަން ޓީމާއި ރަނަރަޕް ޓީމަށް ހުށަހަޅާފައިވާ ފައިސާގެ އިނާމު ވަނީ ބޮޑުތަނުން އިތުރުކޮށްފައެވެ. އަދި މީގެ އިތުރުން މިއަހަރުގެ މުބާރާތުގައި މުޅިން އަލަށް ފެއާޕްލޭ ޓީމަށް ފައިސާގެ އިނާމު ދިނުމަށް ވެސް ގައްދޫ ކައުންސިލުން ވަނީ ނިންމާފައެވެ.

މުބާރާތުގެ ޑިވިޝަން ތަކަށް ހުށަހަޅާފައިވާ ފައިސާގެ އިނާމުތަކަށް ބަލާއިރު ފިރިހެން ޑިވިޝަން ޗެންޕިއަން ޓީމަށް 155،000 ފުރިޔާގެ އިތުރުން ރަނަރަޕް ޓީމަށް 80,000 ރުފިޔާގެ ފައިސާގެ އިނާމެއް ހުށަހަޅާފައިވާއިރު ފެއާޕްލޭ ޓީމް 40,000 ރުފިޔާ ވަނީ ހުށަހަޅާފައެވެ.

އަންހެން ޑިވިޝަންގެ ޗެންޕިއަން ޓީމަށް 30,000 ރުފިޔާގެ އިތުރުން ރަނަރަޕް ޓީމަށް 15,000 ރުފިޔާ ހުށަހަޅާފައިވާއިރު، ފެއާޕްލޭ ޓީމް 5,000 ރުފިޔާ ވަނީ ހުށަހަޅާފައެވެ.

ޖޫނިއަރ ޑިވިޝަން ( 13 އަހަރާއި 17 އަހަރުން ދަށުގެ ކުދިން ) ގެ ޗެންޕިއަން ޓީމަށް 20,000 ރުފިޔާގެ އިތުރުން ރަނަރަޕް ޓީމަށް 10,000 ރުފިޔާ ހުށަހަޅާފައިވާއިރު ފެއާޕްލޭ ޓީމް 5,000 ރުފިޔާ ވަނީ ހުށަހަޅާފައެވެ.