ޕީޕީއެމް/ޕީއެންސީ ކޯލިޝަންގެ 20 ވަނަ ރައްޔިތުންގެ މަޖިލީހުގެ ޕްރައިމަރީ އިންތިހާބު އަމާންކަމާއި އެކު ކުރިއަށް ގެންދިޔުމަށް އިލެކްޝަން ކޮމިޝަން (އީސީ)ގެ ނައިބު ރައީސް އިސްމާއިލް ހަބީބް އެދިވަޑައިގެންފިއެވެ.

ހަބީބް މިފަދައިން ވިދާޅުވީ  ޕްރައިމަރީގައި ވާދަކުރައްވާ ކެންޑިޑޭޓުންނަށް، މިއަދު ބާއްވާ އިންތިހާބަކީ، މިނިވަންކަމާއި، އިންސާފުވެރިކަމާއެކު ބޭއްވޭ ދެފުށް ފެންނަ އިންތިޚާބަކަށް ހެދުމަށް އެދިވަޑައިގެން އެކްސްގައި ކުރައްވި ޕޯސްޓެއްގައެވެ.

މީގެ އިތުރުންވެސް ހަބީބް ވަނީ ކެންޑިޑޭޓުންނާއި ވޯޓުލާމީހުންގެ ޙައްޤުތައް ރައްކާތެރިކޮށް، އަމާންކަމާއި އޮމާންކަމާއެކު އިންތިޚާބުގެ ހުރިހާ ކަމެއް ގެންދެވުމަށް ވެސް އެދިލައްވާފައެވެ.

Advertisement

މިއަދު ކުރިއަށްދާ ޕީޕީއެމް/ޕީއެންސީ ކޯލިޝަންގެ ރައްޔިތުން މަޖިލީހުގެ އިންތިހާބުގެ ޕްރައިމަރީ ބާއްވާ 73 ދާއިރާއަށް 283 ފަރާތަކުން ވަނީ ކުރިމަތިލާފައެވެ. ޕްރައިމަރީގައި 71،597 ފަރާތަކަށް ވޯޓް ލުމުގެ ހައްގު ވަނީ ލިބިފައެވެ. 

މުޅި ޖުމްލަ 227 ފޮއްޓެއް ބެހެއްޓިފައިވާއިރު މާލޭ ގައި ވޯޓް ފޮށިތައް ބެހެއްޓުމަށް ހަމަޖެހިފައިވަނީ:

1. ހެންވޭރު ދަނޑު (އަތޮޅުތަކުގެ ފޮށިތައް)

2. ކަލާފާނު ސްކޫލް

3. ޖަމާލުއްދީން ސްކޫލް

4. ތާޖުއްދީން ސްކޫލް

5. ވިލިމާލެ ޔޫތު ސެންޓަރު

6. ކާމިލް ދީދީ ސްކޫލް (ހުޅުމާލެ)

7. ރެހެންދި ސްކޫލް (ހުޅުމާލެ)

މިއަދު ހެނދުނު 10 ޖެހިއިރު ފެށި ޕްރައިމަރީ އަށް ވޯޓު ލުމުގެ ފުރުސަތު މިއަދު ހަވީރު 5 ޖަހަންދެން ވަނީ ހުޅުވާލާފައެވެ.