20 ވަނަ ރައްޔިތުންގެ މަޖިލީހަށް ޕީޕީއެމް/ޕީއެންސީ ގެ ފަރާތުން ވާދަކުރާނެ ކެނޑިޑޭޓުން ކަނޑައެޅުމަށް ބާއްވާ ޕްރައިމަރީގެ ވޯޓުލުން ކުރިއަށް ދާގޮތް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ރައީސް، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބައްލަވާލައްވައިފިއެވެ.

ރައީސް ޑރ.މުއިއްޒު ވަނީ މިއަދު މެންދުރުގެ ވަގުތެއްގައި ވޯޓުލުން ކުރިއަށްދާ ގޮތް ބައްލަވައިލެއްވުމަށް ހެންވޭރު ދަނޑަށް ވަޑައިގެންފައެވެ. އެތަނުގައި ހުރި 5 ޓެންޓަށް ވަޑައިގެން ކޮންމެ ޓެންޓެއްގައި ވެސް ވޯޓުލުން ކުރިއަށްދާ ގޮތް އެމަނިކުފާނު ވަނީ ބައްލަވާލައްވާފައެވެ. ހެންވޭރު ދަނޑުގައި ކުރިއަށް ދަނީ އަތޮޅު ތަކުގެ ޕްރައިމަރީ އަށް ވޯޓް ލުމެވެ.

ރައީސް ޑރ.މުއިއްޒުގެ އަރިހުގައި ޕީއެންސީގެ ޗެއާޕާސަން އަބްދުއްރަހީމް އަބްދުالله އާއި ޓޫރިޒަމް މިނިސްޓަރ އަހްމަދު ފައިސަލް އާއި މާލެ ސިޓީ ކައުންސިލްގެ ޑެޕިއުޓީ މޭޔަރު އަހްމަދު ނަރީޝްގެ އިތުރުން ހުޅުމާލެ ދާއިރާގެ މެމްބަރު އިބްރާހިމް ޝުޖާއު ވެސް ވަނީ ބައިވެރިވެ ވަޑައިގަންނަވާފައެވެ.

Advertisement

ވޯޓް ލުން ކުރިއަށްދާ ގޮތް ބައްލަވާލެއްވުމަށް ފަހު ނޫސްވެރިންނާއި މުޚާތަބު ކުރައްވަމުން ރައީސް ޑރ.މުއިއްޒު ވަނީ ވޯޓް ލުން ކުރިއަށްދަނީ ވަރަށް އޮމާން ކަމާއި ހަމަޖެހުމާއި އެކު ކަމަށާއި ދެތިން ދިމާލަކުން ކުޑަކޮށް ހަމަނުޖެހުންތަކެއް ފެނިވަޑައިގެން ނަމަވެސް އެކަންކަން ހައްލު ކުރެވިފައިވާ ކަމަށް ވިދާޅުވެފައެވެ. އަދި ޕްރައިމަރީ ތަކުގައި ވާދަކޮށްގެން މޮޅުވާނީ އެކަކު ކަމަށާއި ބަލިވާ އެންމެން އެކަތިގަނޑަކަށް ވާން ޖެހޭނެ ކަމަށް ވެސް އެމަނިކުފާނު ވިދާޅުވިއެވެ. 

މީގެ އިތުރުންވެސް ރައީސް ޑރ.މުއިއްޒު ވިދާޅުވީ އިންތިހާބުތަކާއި ގުޅިގެން ކުރިން ފެނިފައިވައިވާ ހަމަނުޖެހުންތައް ނުފެނި، އެންމެން ވެސް ގައުމު އިސްކުރަންޖެހޭ ކަމަށް ގަބޫލުފުޅު ކުރައްވާކަމަށެވެ.

މިއަދު ހެނދުނު 10 އިން ހަވީރު 5 އަށް ކުރިއަށްދާ ޕީޕީއެމް/ޕީއެންސީގެ ޕްރައިމަރީގައި 73 ދާއިރާ އަކުން 283 ކެނޑިޑޭޓުން ކުރިމަތިލާފައިވާއިރު 227 ވޯޓް ފޮއްޓެއް ވަނީ ބެހެއްޓިފައެވެ.