މިއަދު ކުރިއަށް ޕީޕީއެމް/ޕީއެންސީގެ މަޖިލިސް ޕްރައިމަރީގެ ވޯޓުލުމުގައި ކާމިޔާބު ހޯދާ ކެންޑިޑޭޓުންނާއި އެކު ބަލިވާ ކެންޑިޑޭޓުން ކުރިއަށް ދާގޮތަށް ކޯލިޝަންތެރޭގައި އިޤްރާރުވެވިފައިވާކަމަށް ރައީސުލް ޖުމުހުރިއްޔާ އަދި އެ ކޯލިޝަންގެ ލީޑަރ ޑރ.މުހައްމަދު މުއިއްޒު ވިދާޅުވެއްޖެއެވެ.

މިއަދު ހެނދުނު 10:00 ން ފެށިގެން ކުރިއަށްދާ ޕީޕީއެމް/ޕީއެންސީގެ މަޖިލިސް ޕްރައިމަރީގެ ވޯޓުލުން ކުރިއަށްދާ ގޮތް ބައްލަވައިލެއްވުމަށް ހެންވޭރު ދަނޑަށް ކުރެއްވި ޒިޔާރަތަށްފަހު ނޫސްވެރިންނާ ވާހަކަދައްކަވަމުން ރައީސް ވިދާޅުވީ އިންތިހާބުގައި މޮޅުވަނީ ކޮންމެވެސް އެކަކު ކަމަށާއި ބަލިވާ އެންމެން މޮޅުވާ މީހުންނާއެކު އެކަތި ގަނޑަކަށް ވާން ޖެހޭނެ ކަމަށެވެ.

"ދެން އަޅުގަނދުމެންގެ ތެރޭގައި އިޤުރާރުވެސް ވެވިފަ އޮތީ، ބަލިވާ އެންމެން މޮޅުވާ މީހާއާއި އެކީގައި ކުރިއަށް ދާގޮތަށް، މިފަހަރު އުންމީދު ކުރަނީ ކުރިން ފެނުނު ފަދަ މަންޒަރުތައް ނުފެންނާނެކަމަށް " ރައީސް ވިދާޅުވިއެވެ.

Advertisement

މިއަދު ކުރިއަށްދާ ޕަރައިމަރީ އާއި ގުޅޭގޮތުން ރައީސް ވިދާޅުވީ ދެ ޕާޓީ ދަފުތަރުގައި 71،000 މީހުން އެބަތިބި ކަމަށެވެ. އަދި ވޯޓުލުމުގައި ގިނަ އަދަދެއްގެ މީހުން ބައިވެރިވެ ފޯރީގައި ވޯޓުލުމުގެ ކަންކަން ހިނގަމުންދާ ކަމަށާއި، 283 ކެނޑިޑޭޓުން ޕްރައިމަރީގައި ވާދަކުރައްވާ ކަމަށެވެ.

ރައީސް ވަނީ މިއަދު ހެންވޭރު ދަނޑަސް ވަޑައިގެން ވޯޓްލުން ކުރިއަސްދާ ގޮތް ބައްލަވާލެއްވުމަށް އެތަނުގައި ހަދާފައިވާ ފަސްޓެންޓަށް ޒިޔާރަތް ކުރައްވާ ވޯޓްލުމުގެ ކަންތައްތައް ކުރުއަށްދާގޮތް ވަރަށް ގާތުން ބައްލަވާ ލައްވާފައެވެ.

ރައީސް ޑރ.މުހައްމަދު މުއިއްޒު ވިދާޅުވީ މިއަދުގެ ޕްރައިމަރީ ހިނގަމުންދަނީ ޖުމްލަ ގޮތެއްގައި ސުލްހަވެރިކޮށް ކަމަށާއި، ކުޑަކޮށް ނުތަނަވަސްކަން އުފެދުނު ތަންތަނުގައި އެކަންކަންވެސް މިހާރު ހައްލުކުރެވިގެން ސުލްހަވެރިކަމާއެކު ވޯޓުލުމުގެ ހުރިހާކަމެއްވެސް މިހާރު ހިނގަމުންދާ ކަމަށެވެ.