ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ކެބިނެޓްގައި ހިމެނިވަޑައިގަންނަވާ ބައެއް ވަޒީރުންނަށް ރުހުން ނުދިނުމަށް އިދިކޮޅު އެމްޑީޕީ އާއި ދަ ޑިމޮކްރެޓްސް އިން  ނިންމުމާއި ގުޅިގެން ވެރިކަން ކުރާ ޕީޕީއެމް/ޕީއެންސީގެ މެމްބަރުން މަޖިލީހުގައި އެތެރެއިން ތަޅުލައި، ތަޅުމުގައި އިހުތިޖާޖު ކުރަން ފައްޓަވައިފިއެވެ.

މިއަދު ކުރިއަށްދާ 19 ވަނަ ރައްޔިތުންގެ މަޖިލީހުގެ ދައުރުން ބޭރުގައި ބާއްވާ ހާއްސަ ޖަލްސާގައި މި ސަރުކާރުގެ ވަޒީރުންނަށް ރުހުން ދިނުން އެޖެންޑާ ކޮށްފައިވާއިރު މިކަމާއި ގުޅިގެން މަޖިލީހުގެ ތަޅުން ވަނީ ވަރަށް ބޮޑަށް ހޫނު ވެފައެވެ. 

އެގޮތުން މި މައްސަލަ އާއި ގުޅިގެން ބަހުސް ކުރި އިރު މަޖިލިސް ތެރޭގައި މެމްބަރުން އަޑު ގަދަކޮށްފައިވާއިރު، ޕީޕީއެމް/ޕީއެންސީ ކޯލިޝަންގެ މަޖިލިސް މެމްބަރުން ވަނީ މަޖިލިސް ތަޅުމުގައި އަޑުގަދަކޮށް މަޖިލީހުގެ ބޭރުން ވަދެވެން ހުރި ދޮރުތައް އެތެރެއިން ތަޅުލާފައެވެ. މިކަމާއި ގުޅިގެން ޖަލްސާ ފެށުމަށް ވަނީ ދަތިތަކާއި ކުރިމަތިލާން ޖެހިފައެވެ.

ރުހުން ނުދޭން ނިންމުމާއި ގުޅިގެން އާންމުންވެސް ދަނީ މަޖިލީހުގެ ބޭރުގައި ތިބެ އިހުތިޖާޖް ކޮށް، ސަރުކާރު ނުހުއްޓުވޭނެ ކަމަށް ގޮވާލަމުންނެވެ.

ރައީސް ޑރ.މުއިއްޒުގެ އާ ސަރުކާރަށް ދެ މަހެއްހާ ދުވަސް ވެގެން ދިޔައިރުވެސް، ވަޒީރުންނަށް ރުހުން ދީފައެއް ނުވެއެވެ. މިއަދު ކުރިއަށްދާ ހާއްސަ ޖަލްސާގައި މި މައްސަލަ އެޖެންޑާކޮށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއިން ވަނީ ވަޒީރުންނަށް ރުހުން ދޭން ފެންނަކަމަށް ނިންމާފައެވެ.

މިކަމާއި ގުޅިގެން ދަ ޑިމޮކްރެޓްސް އާއި އެމްޑީޕީން ވަނީ ބައެއް ވަޒީރުންނަށް ރުހުން ނުދިނުމަށް ނިންމާފައެވެ. އެ ޕާޓިން ނެރުނު ބަޔާނެއްގައި ބުނެފައިވަނީ އެ ޕާޓީން އިންތިހާއަށް ކަންބޮޑުވާ ސިޔާސަތުތަކެއް ރައީސް ޑރ.މުޙައްމަދު މުޢިއްޒުގެ ސަރުކާރުން ގެންގުޅުއްވާކަމަށް ފާހަގަކުރެވޭއިރު، މި ސަރުކާރުގެ ކެބިނެޓްގެ ބައެއް ވަޒީރުންނަށް ރުހުން ނުދިނުމަށް ދަ ޑިމޮކްރެޓްސްގެ ޕާލަމެންޓްރީ ގްރޫޕުގެ ބައްދަލުވުމުގެ މަޝްވަރާއަށް ފަހު އިއްތިފާގުން ވަނީ ނިންމާފައިކަމަށެވެ.

ރުހުން ނުދިނުމަށް އިދިކޮޅުން ނިންމާފައިވަނީ އެޓާނީ ޖެނެރަލް އަޝާމްއާއި ފޮރިން މިނިސްޓަރ މޫސާ ޒަމީރުއާއި އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުގެ އިތުރުން ހައުސިން މިނިސްޓަރ ޑރ.ހައިދަރުއެވެ.