ރައީސުލްޖުމުހުރިއްޔާ ޑރ. މުހައްމަދު މުއިއްޒު އައްޔަންކުރެއްވި ވަޒީރުންނަށް ރުހުން ދިނުމުގެ މައްސަލަ އެޖެންޑާކޮށް ރައްޔިތުންގެ މަޖިލީހުގައި މިއަދު ފެށި ޖަލްސާ، މިރޭވެސް ކުރިއަށް ނުގެންދެވި އެންމެފަހުން ނިންމާލަސް ޖެހިއްޖެއެވެ.

މިއަދުގެ ޖަލްސާ ފުރަތަމަ ފެށީ ހެދުނު 9:00 ގައެވެ. އެ ދަންފަޅީގައި ވަނީ ވަޒީރުންނަށް ރުހުން ދިނުމުގެ މައްސަލާގައި ކޮމެޓީން ނިންމިގޮތް މަޖިލިހަށް ހުށައަޅާ އެ މައްސަލާގައި ބަހުސްވެސް ކުރިއަށް ގެންގޮސްފައެވެ. އެއަށްފަހު ޖަލްސާ މެދުކަނޑާލީ މެންދުރު 1:30 ގައި ވޯޓުލާ ދަންފަޅި ފެށުމަށް ތާވަލްކުރުމަށްފަހުގައެވެ.

ނަމަވެސް 1.30 ގައި ޖަލްސާ ފަށަށް މަސައްކަތް ކުރި ނަމަވެސް  މި ސަރުކާރުގެ ބައެއް ވަޒީރުންނަށް ރުހުން ނުދިނުމަށް އެމްޑީޕީ އާއި ޑިމޮކްރެޓްސް އިން ނިންމާފައިވާތީ، މަޖިލީހުގެ ޖަލްސާ ކުރިއަށް ގެންދިއުމަށް ސަރުކާރަށް ތާއީދު ކުރައްވާ މެމްބަރުން ވަނީ ހުރަސް އަޅައިފައެވެ. އަދި އެ ހަމަނުޖެހުންތަކުގައި އެމްޑީޕީގެ ބައެއް މެމްބަރުން ވަނީ ޕީޕީއެމް/ޕީއެންސީގެ ބައެއް މެމްބަރުންނަށް ހަމަލާދީފައެވެ. އޭގެ ތެރެއިން ބައެއް މެމްބަރުންނަށް އަނިޔާވެގެން ހޮސްޕިޓަލްގައި ފަރުވާ ދޭންވެސް ޖެހިފައިވެއެވެ.

އޭގެ ފަހުން މިރޭގެ 08:00 ޖަލްސާ ބޭއްވުމަށް ތާވަލުކޮށް ޖަލްސާ ބޭއްވުމަށް މަސައްކަތް ކުރި ނަމަވެސް މި ސަރުކާރަށް ނިސްބަތްވާ މެމްބަރުން ޖަލްސާ ކުރިއަށް ގެންދިއުމަށް ފުރުޞަތުދީފައެއް ނުވެއެވެ.

ނަމަވެސް މަޖިލިހުގެ ރައީސް މުހައްމަދު އަސްލަމް އާއި އެމްޑީޕީ އާއި ޑިމޮކްރެޓްސްގެ މެމްބަރުންވަނީ ޖަލްސާ ކުރިއަށް ގެންދިއުމަށް ވަރަށް ބޮޑަށް މަސައްކަތް ކުރައްވާފައެވެ. އެގޮތުން މަޖިލިހުގެ ރިޔާސަތުގައި ހަރުކޮށްފައިވާ މައިކް ސިސްޓަމް ނެތުމުން އަސްލަމް ވަޒީރުން ތިއްބަވާ މޭޒުކޮޅު ގާތު އިންނަވައިގެން 10.30 ގައި ޖަލްސާ ކުރިއަށްގެންދެވުމަށް މަސައްކަތް ކުރެއްވިއެވެ.

މަޖިލިހުގެ  ދެ މެމްބަރަކަށް މަޖިލީހުގެ ގަވާއިދަށް ހުރުމަތްތެރިކޮށް ހިތުމަށް ނަސޭހަތް ދެއްވައި،  އެއަށް ފަހުވެސް ޖަލްސާކުރިއަށް ގެންދެވޭނެ މާހައުލެއް މަޖިލިސް ތެރޭގައި ނެތުމުން 10.57 ހާއިރު އަސްލަމް ވަނީ ޖަލްސާކުރިއަށް ގެންދެވެން ނެތްކަމަށް ވިދާޅުވެ އެންމެފަހުން ޖަލްސާ ނިންމަވާލެއްވިކަން އިއުލާނު ކުރައްވާފައެވެ.