ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާ ވަޒީރުންނަށް ރުހުން ދިނުމާ މެދު ގޮތެއް ނިންމަން ރައްޔިތުންގެ މަޖިލިހުން ބާއްވާ ޖަލްސާ މިއަދު މެންދުރު ފަހު 1:00 އަށް ފަސްކޮށްފިއެވެ.

މީގެ ކުރިން މި ޖަލްސާ މިއަދު ބާއްވަން ކަނޑައަޅާފައި އޮތީ މިއަދު 11 ޖަހާއިރުއެވެ.

ނަމަވެސް މިހާރު 1:00 އަށް ފަސްކޮށް އެޖެންޑާ ނެރެފައިވާއިރު، އެޖެންޑާގައި ހަމައެކަނި އޮތީ ވަޒީރުންނަށް ރުހުން ދިނުމާ މެދުގައި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ހުށަހެޅި ރިޕޯޓާ މެދުގައި ގޮތެއް ނިންމުމެވެ.

Advertisement

މިއީ ވަޒީރުންނަށް ރުހުން ދިނުމަށް ދައުރުން ބޭރުން ޖަލްސާ ބާއްވަން މަސައްކަތް ކުރާ ދެވަނަ ދުވަހެވެ.

އެގޮތުން އިއްޔެގެ މަޖިލިހުގެ ޖަލްސާ އެންމެ ފުރަތަމަ ފެށީ ހެނދުނު 9:00 ގައެވެ. އެ ޖަލްސާގައި ކޮމިޓީ ރިޕޯޓު ހުށަހަޅައި މަޖިލިހުގެ މެމްބަރުންގެ މެދުގައި އެ ރިޕޯޓަށް ބަހުސް ކުރައްވަމުން ދިޔަ ވަގުތު މަޖިލިސް ހޫނުވާން ފެށުމުން ޖަލްސާ މެދުކަނޑާލީ މެންދުރު ފަހު 1:30 ގައި ވޯޓަށް އެހުމަށެވެ.

ނަމަވެސް 1:30 ގައި ވޯޓަށް އެހުމަށް ހަމަޖެހިފައި ވަނިކޮށް، ޕީޕީއެމް/ޕީއެންސީ މެމްބަރުން ފުރަތަމަ ވެސް ވަނީ މަޖިލިހުގެ ކޮންޓްރޯލް ނަގައި މަޖިލިހުގެ ތަޅުމަށް ނުވަދެވޭ ގޮތަށް ދޮރުތައް ތަޅުލައިފައެވެ. އޭގެ ފަހުން ބޭރުގައި ތިބި މެންބަރުންނަށް ވަދެވިފައި ވީ ނަމަވެސް، މަޖިލީހުގެ ތަޅުމުގައި ތިބި އެމްޑީޕީ މެންބަރުންނާއި ޕީޕީއެމް/ޕީއެންސީގެ މެންބަރުންގެ މެދުގައި ބޮޑެތި ހަމަނުޖެހުންތަކެއް ހިނގުމުގެ ސަބަބުން އެ ގަޑީގައި ޖަލްސާ ކުރިއަށް ނުގެންދެވި ރޭގައި ބާއްވާ ގޮތަށް ފަސް ކުރެވުނެވެ.

އަދި ރޭގައިވެސް ދެ ފަހަރެއްގެ މަތިން ޖަލްސާ ބާއްވަން މަސައްކަތް ކުރި ނަމަވެސް ކުރިއަށް ގެންދެވޭ ގޮތެއް ނުވިއެވެ.