ޗައިނާގެ ހިލޭ އެހީގެ ދަށުން 5 ރަށެއްގައި ސާފު ބޯފެން ފޯރުކޮށްދޭ ނިޒާމު ޤާއިމުކުރުމަށް ކުރިއަށްގެންދިޔަ މަޝްރޫޢު ނިންމުމަށްފަހު ލިޔެކިޔުންތައް ސަރުކާރާއި ޙަވާލުކުރައްވައިފިއެވެ.
ޗައިނާގެ ހިލޭ އެހީގެ ދަށުން އިޔާދަކުރެނިވި ހަކަތައިން ބޭނުންކުރާ ޑީސެލިނޭޝަން ޕްލާންޓްތައް ގާއިމްކޮށް ސަރުކާރާއި ހަވާލުކޮށްފައިވާ 5 ރަށަކީ ރ. އަލިފުށީ، ޅ. އޮޅުވެލިފުށި، ހއ. ކެލާ، ގއ. ދާންދޫ އަދި ކ. ކާށިދޫ އެވެ.
މަޝްރޫއު ނިންމައި ލިޔުންތައް ހަވާލު ކުރި ރަސްމިއްޔާތުގައި ލިޔެކިޔުންތަކުގައި ދިވެހި ސަރުކާރުގެ ފަރާތުން ސޮއި ކުރެއްވީ މިނިސްޓަރ އޮފް ކޮންސްޓްރަކްޝަންސް އެންޑް އިންފްރާސްޓްރަކްޗާ ޑރ. އަބްދުالله މުއްތަލިބެވެ. ޗައިނާ ސަރުކާރުގެ ފަރާތުން ސޮއި ކުރެއްވީ ހަރ އެކްސެލެންސީ ވޭންގ ލީޒިން އެވެ.
މި މަޝްރޫއުގެ ދަށުން ރ. އަލިފުށީ، ޅ. އޮޅުވެލިފުށި، ހއ. ކެލާ، ގއ. ދާންދޫ ގައި 200 ޓަނުގެ ފެން އުފެއްދޭ ޑީސެލިނޭޝަން ޕްލާންޓް އަދި 200 ކިލޯ ވޯޓް ގެ ސޯލާ ޕެނަލް ވަނީ ހަރު ކުރެވިފައެވެ. އަދި ކ. ކާށިދޫގައި 200 ޓަނުގެ ފެން އުފެއްދޭ ޑީސެލިނޭޝަން ޕްލާންޓާއި އެކު 100 ކިލޯ ވޯޓް ވިންޑް ޓާބައިން ގެ އިތުރުން 100 ކިލޯ ވޯޓް ގެ ސޯލާ ޕެނަލް ވަނީ ހަރުކޮށްފައެވެ.
ޗައިނާގެ ހިލޭ އެހީގެ ދަށުން 5 ރަށެއްގައި ސާފު ބޯފެން ފޯރުކޮށްދޭ ނިޒާމު ޤާއިމުކުރުމަށް އެއްބަސްވެފައިވަނީ 2020 ވަނަ އަހަރުގެ އޯގަސްޓް މަހުގެ ތެރޭގައެވެ. މިނިސްޓްރީ އޮފް ކޮންސްޓްރަކްޝަންސް އެންޑް އިންފްރާސްޓްރަކްޗާ އިން ހާމަކުރާ ގޮތުގައި މި މަޝްރޫއަށް 11.8 މިލިއަން ރުފިޔާ ވަނީ ޚަރަދު ކޮށްފައެވެ.
Advertisement
This content is created and paid for by advertisers and does not involve Voice Journalists
