ގަތަރުގައި މިހާރު ކުރިއަށްދާ އޭޝިއަން ކަޕް ފުޓްބޯޅަ މުބާރާތުގެ ދެވަނަ ބުރުގައި އަންގާރަދުވަހުގެ ހަވީރު 2-1 ގެ ނަތީޖާއަކުން ތައިލެންޑް ބަލިކޮށް އުޒްބެކިސްތާނުން މުބާރާތްގެ ކުއާޓާ ފައިނަލުން ޖާގަ ހޯދައިފި އެވެ.

އުޒްބެކިސްތާން މުބާރާތުގެ ދެވަނަ ބުރުން ޖާގަ ހޯދީ ގްރޫޕް ބީގެ ދެވަނަ ޓީމުގެ ގޮތުގައެވެ. ގުރޫޕް ސްޓޭޖުގައި އޮސްޓްރޭލިޔާ އަދި ސީރިއާ އާއި ދެކޮޅަށް ކުޅުނު ދެމެޗު އެއްވަރުވިއިރު، އިންޑިއާ އަތުން އެޓީމު މޮޅުވީ 3-0 ގެ ނަތީޖާއަކުންނެވެ. އަދި ތައިލެންޑުން ދެވަނަ ބުރުގެ ޖާގައެއް ހޯދީ ގުރޫޕް އެފްގެ ދެވަނަ ޓީމުގެ ގޮތުގައެވެ. ގުރޫޕް ސްޓޭޖުގައި ސައުދީ އަރަބިއާ އަދި އިންނާއި ދެކޮޅަށް ކުޅުނު ދެ މެޗު އެއްވަރުވިއިރު، ކިރްގިސްތާން އަތުން އެޓީމު ވަނީ 2-0 ގެ ނަތީޖާއަކުން މޮޅުވެފައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އުޒްބެކިސްތާނުން ނެވެ. މިލަނޑު ފުރަތަމަ ހާފުގެ 37 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް އަޒީޒްބެކް ތުރުގުންބޮއެވް އެވެ. ތައިލެންޑުން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 58 ވަނަ މިނެޓުގައި ކާމިޔާބުކޮށްދިނީ އެޓީމުގެ މިޑްފިލްޑަރު ސުޕާޗޯކް ސަރަޗަޓް އެވެ.

Advertisement

އުޒްބެކިސްތާން މިމެޗުން މޮޅުވި ލަނޑު ދެވަނަ ހާފުގެ 65 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް އެބޮސްބެކް ފައިޒުއްލަވް އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން އުޒްބެކިސްތާން ކުރީގައި އޮވެގެންނެވެ.

މުބާރަތުގެ ކުއާޓާ ފައިނަލުގައި ފެބުރުއަރީ މަހުގެ 3 ވަނަ ދުވަހު އުޒްބެކިސްތާނުން ނުކުންނާނީ ގަތަރާއި ދެކޮޅަށެވެ.