ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގައި ޖޫންމަހު ތެލަސީމިއާ ފަރާތްތަކުގެ ގޮތުގައި ރަޖިސްތްރީކުރި އަދަދު އިތުރުވެއްޖެއެވެ.

އެންސްޕާގެ ތަފާސްހިސާބުތަކަށް ބަލާއިރު، ޖޫންމަހު ތެލަސީމިއާ ފަރާތްތަކުގެ ގޮތުގައި އަލަށް 7 ފަރާތެއް ވަނީ ރަޖިސްޓްރީކޮށްފައެވެ. ތެލަސީމިއާ ކުދިންނަށް ޚާއްޞަ ކޮށްގެން ދޭ އެލަވަންސަށް ހުޅުވާލުމާއެކު ތެލަސީމިއާއަށް ފަރުވާ ހޯދަމުންދާ ފަރާތްތަކުން ވަނީ އެންސްޕާގައި ރަޖިސްޓްރީވާން ފަށާފައެވެ.

އެންސްޕާގެ ތަފާސްހިސާބުތަކަށް ބަލާއިރު، ޖޫންމަހު ތެލަސީމިއާ ފަރާތްތަކަށް މާލީ އެހީގެ ގޮތުގައި 1.05 މިލިއަން ރުފިޔާ ވަނީ ހޭދަކޮށްފައެވެ. އެންސްޕާގެ ރަޖިސްޓްރީއަށް ބަލާއިރު، މިހާރު ތެލަސީމިއާއަށް ފަރުވާ ހޯދަންޖެހޭ ފަރާތްތަކުގެ އަދަދު އުޅެނީ 526 ގައެވެ. ތެލަސީމިއާ މީހުންނާއި ކުދިންނަށް ސަރުކާރުން 2000 ރުފިޔާގެ އެލަވަންސެއް އެންސްޕާ މެދުވެރިކޮށް މިހާރު އަންނަނީ ދެމުންނެވެ. 

ތެލަސީމިއާ ކުދިންނަށް އެލަވަންސެއް ދޭން ނިންމަވާފައިވާކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ޢިއުލާން ކުރެއްވީ، މިދިޔަ އަހަރުގެ އޮކްޓޯބަރު މަހުގައެވެ. ރައީސުލްޖުމްހޫރިއްޔާ މިގޮތަށް ނިންމެވުމާއި ގުޅިގެން ތެލަސީމިއާ ކުދިންގެ ފަރުވާގެ ނިޒާމު ހަރުދަނާ ކުރުމަށާއި، މުޖުތަމަޢުގެ އެހެން މީހުންނެކޭ އެއްފަދައިން ޢާންމު ދިރިއުޅުމެއް އުޅުމުގެ ފަހި މާޙައުލެއް ކަށަވަރު ކުރުމަށް ސަރުކާރުން ދަނީ، މަސައްކަތް ކުރަމުންނެވެ.