މަޖިލީހުގެ ކައުންސެލް ޖެނަރަލް ފާތިމަތު ފިލްޒާ އަކީ އެވަގުތެއްގަައި މަޖިލީހުގެ ރިޔާސަތުގައި ހުންނަ މީހެއް އެދޭ ކޮންމެ ގޮތަކަށް ޤާނޫނީ ލަފާ ނެރެދޭ މީހެއް ކަމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖް ވިދާޅުވެއްޖެއެވެ.
މޫސާ ސިރާޖް މިފަދައިން ރުހުން ނުލިބުނު ވަޒީރުންގެ ނަންތައް އަލުން ނުފޮނުވޭނެ ކަމަށް ފިލްޒާ ވިދާޅުވި ކަމަށް އިދިކޮޅު އެމްޑީޕީގެ ޕާލިމަންޓްރީ ގުރޫޕުގެ ލީޑަރު އަދި އަލިފުށި ދާއިރާގެ މެމްބަރު މުހައްމަދު ރަޝީދު ހުސެއިން (ބިގޭ) ވިދާޅުވުމާއި ގުޅިގެންނެވެ.
މިގޮތުން ސިރާޖް ވިދާޅުވީ އެމްޑީޕީއިން އެންމެ ފަހުން ސުޕްރީމް ކޯޓަށް ހުށަހެޅި މައްސަލައިގައިވެސް ސާފު އިބާރާތުން ފިލްޒާ ދީފައިވާ ޤާނޫނީ ލަފައަކީ ޤާނޫނުއަސާސީއާއި މަޖިލިސް ގަވައިދާ ހިލާފު ލަފައެއް ކަމުގައި ފާހަގަ ކޮށްފައިވާ ކަމަށެވެ.
"މި ވަގުތު ރައްޔިތުންގެ މަޖިލީގެ ކައުންސެލް ޖެނެރަލްގެ މަޤާމުގައި ހުންނެވި ފިލްޒާއާކީ އެވަގުތެއްގަައި މަޖިލީހުގެ ރިޔާސަތުގައި ހުންނަ މީހެއް އެދޭ ކޮންމެ ގޮތަކަށް ޤާނޫނީ ލަފާ ނެރެދޭ މީހެއް. އެމްޑީޕީއިން އެންމެ ފަހުން ސުޕްރީމް ކޯޓަށް ހުށަހެޅި މައްސަލައިގައިވެސް ސާފު އިބާރާތުން ފިލްޒާ ދީފައިވާ ޤާނޫނީ ލަފައަކީ ޤާނޫނުއަސާސީއާއި މަޖިލިސް ގަވައިދާ ހިލާފު ލަފައެއް ކަމުގައި ފާހަގަ ކޮށްފައިވޭ."
ސިރާޖް ވިދާޅުވިއެވެ.
އެމްޑީޕީން އިއްޔެ ބޭއްވި ނޫސްވެރިންގެ ބައްދަލުވުމުގައި ބިގޭ ވިދާޅުވީ ވަޒީރުންނަށް ރުހުން ދިނުމާ ގުޅޭގޮތުން މަޖިލީހުގެ ރައީސާއި، އަމީންއާންމު އަދި ކައުންސެލް ޖެނެރަލް އާ އެކު ބޭއްވުނު ބައްދަލުވުމެއްގައި އޭނާ ވެސް ބައިވެރިވެވަޑައިގެންނެވި ކަމަށާއި އެ ބައްދަލުވުމުގައި، ވަޒީރުންގެ ނަންތައް ދެން އަލުން މަޖިލީހަށް ނުފޮނުވޭނެ ކަމަށް ފިލްޒާ ވަރަށް ސާފުކޮށް ވިދާޅުވި ކަމަށެވެ.
އެހެންނަމަވެސް ރައްޔިތުންގެ މަޖިލީހުން ވަނީ މިވާހަކަ ދޮގު ކޮށްފައެވެ. މި ގޮތުން މަޖިލީހުގެ ކޮމިއުނިކޭޝަން ޑިރެކްޓަރ ހަސަން ޒިޔާއު ވިދާޅުވީ، އެ މައްސަލައިގައި ފިޒްލާ އެފަދަ ލަފައެއް ދެއްވާފައި ނުވާ ކަމަށެވެ.
ރައީސް ޑރ.މުއިއްޒުގެ ކެބިނެޓަށް އައްޔަން ކުރައްވި 22 ބޭފުޅުންނަށް ރުހުން ހޯދުމަށް މަޖިލީހަށް ފޮނުވުމުން، 3 ބޭފުޅުން ފިޔަވާ ބާކީ ތިބި ހުރިހާ ބޭފުޅުންނަށް މަޖިލީހުން ވަނީ ރުހުން ދީފައެވެ.
މަޖިލީހުން ރުހުން ދޭން ނުފެންނަ ކަމަށް ނިންމި ތިން ބޭފުޅުންނަކީ އެޓާނީ ޖެނެރަލް އަހްމަދު އުޝާމް އާއި، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުގެ އިތުރުން ހައުސިން މިނިސްޓަރ ޑރ. އަލީ ހައިދަރެވެ. އެހެންނަމަވެސް ރައީސް ޑރ. މުއިއްޒު ވަނީ މި ތިން ބޭފުޅުން ވެސް އަލުން ހަމަ އެ މަގާމް ތަކަށް އައްޔަނު ކުރައްވާފައެވެ.
Advertisement
This content is created and paid for by advertisers and does not involve Voice Journalists
