މެޝިނަރީ އާއި ހެވީ ހެވިކަލް އުފައްދަން މަޝްހޫރު ޗައިނާގެ ވީޗައި ގްރޫޕުން ރާއްޖޭގެ ލިއޯ ކުންފުންޏާ ގުޅިގެން ރާއްޖޭގައި އިންވެސްޓް ކޮށްފި އެވެ.

މިގޮތުން އެ ކުންފުނިން ރާއްޖޭގެ ލިއޯ ގްރޫޕާ ގުޅިގެން ވިޔަފާރި ފެށުން ފާހަގަ ކުރަން ރޭ ހުޅުމާލޭ ސެންޓްރަލް ޕާކުގައި ބޭއްވި ރަސްމިއްޔާތުގައި ވީޗައި ގްރޫޕާއި ރާއްޖޭގެ ލިއޯ ކުންފުންޏާއި ދެމެދު ވަނީ އެ ކުންފުނީގެ އުފެއްދުންތައް ރާއްޖޭގައި ވިއްކައި ވިޔަފާރި ފުޅާކުރަން އެއްބަސްވުމެއްގައި ވަނީ ސޮއި ކޮށްފަ އެވެ.

މި ރަސްމިއްޔާތުގައި  ޗައިނާ ސަފީރު، ވެންގް ލިޒިން އާއި އިކޮނޮމިކް މިނިސްޓަރު މުހައްމަދު ސައީދު ބައިވެރިވެ ވަޑައިގެންނެވިއެވެ. ހަފުލާގެ ޝަރަފުވެރި މެހުމާނެއްގެ ގޮތުގައި ބައިވެރިވަޑައިގަތީ ޕްރިންސިޕަލް އެޑްވައިޒަރު ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓް މުހައްމަދު އަލީ ޖަނާހެވެ.

މި ރަސްމިއްޔާތުގައި ވާހަކަފުޅު ދައްކަވަމުން ޕްރިންސިޕަލް އެޑްވައިޒަރު ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓް މުހައްމަދު އަލީ ޖަނާހު ވަނީ ދިވެހިންނަކީ ލިބޭ ފުރުސަތުގެ ބޭނުން ހިފައި ދުނިޔޭގެ އެކި ގައުމުތަކުގައި ވިޔަފާރި ކުރަން ދަންނަ ބައެއް ކަން ލިއޯ ކުންފުނީގެ ކުރިއެރުން އައި ގޮތުން އެނގިގެން ގޮސްފައިވާ ކަމަށް ވިދާޅުވެފައެވެ.

އެއްބަސްވުން ތަކުގައި ސޮއި ކުރެއްވުމަށް ފަހު ލިއޯ ކުންފުނީގެ ވެރިޔާ ސަވާދު ވިދާޅުވީ ވީޗައި ކުންފުންޏާ ގުޅިގެން ގެންނަ އުފެއްދުންތަކުގެ ތެރޭގައި ހިމެނޭ އިންޖީނަކީ ތެލުގެ ހަރަދު ކުޑަ ރާއްޖެއަށް އެކަށީގެންވާ އުފެއްދުމެއް ކަމަށެވެ.

މި ރަސްމިއްޔާތުގައި ޗައިނާގައި 1940 ގެ އަހަރުތަކުގެ ކުރީކޮޅު އުފެދިފައިވާ ވިޗައި ކުންފުނީގެ އުފެއްދުންތައް ވެސް ވަނީ ދައްކާލާފައެވެ.

އަހަރަކު 46 ބިލިއަން އެމެރިކާ ޑޮލަރަށްވުރެ މަތީ އާމްދާނީ އެއް ހޯދާ ވީޗައި ގްރޫޕަކީ އެމެރިކާ އަދި އިނގިރޭސިވިލާތާއި ޖަރުމަނުގައި ވެސް ފެކްޓަރީ ހަދައިގެން އިންޖީނާއި ހެވީ ވެހިކަލް އުފައްދާ ކުންފުންޏެކެވެ.