ޗައިނާ ސަރުކާރުން ހުރިހާ ހަރަދެއް ކުރާގޮތަށް ދިވެހިންނަށް މަސްޓާސް އަށް ކިޔެވުމުގެ 200 ސްކޮލަޝިޕަށް ހުޅުވާލައިފިއެވެ.

މިކަން ހާމަކޮށްފައިވަނީ ހަޔާ އެޑިއުކޭޝަން މިނިސްޓްރީން އިއްޔެ ކުރި އިއުލާނެއްގައެވެ.

އެ އިއުލާނުގައި ބުނެފައިވަނީ ޗައިނީޒް ސްކޮލާޝިޕް ކައުންސިލުން ހިންގުމަށް ހަމަޖެހިފައިވާ "ޔޫތް އޮފް އެކްސެލެންސް ސްކީމް އޮފް ޗައިނާ ޕްރޮގްރާމް" ގެ ދަށުން ދޫކުރާ ސްކޮލާޝިޕްތަކުގެ ހުރިހާ ހަރަދެއް ދެނީ އެ ކައުންސިލުން ކަމަށާއި އެ ޕްރޮގްރާމުގައި ބައިވެރިވުމުގެ ފުރުސަތު ދިވެހިންނަށް އޮތް ކަމަށް ޗައިނާ އިން އަންގާފައިވާ ކަމަށެވެ.

މަތީ ތައުލީމާއި ބެހޭ ވުޒާރާގެ އިއުލާނުގައިވާ ގޮތުން އެއް އަހަރު ދުވަހުގެ އެ ސްކޮލާޝިޕްގައި ބައިވެރިވުމަށް ބޭނުންވާ ނަމަ އަންނަ އޭޕްރީލް 15ގެ ކުރިން އޮންލައިންކޮށް ފޯމު ހުށަހަޅަށް ޖެހެއެވެ.

މިނިސްޓްރީގެ އިއުލާނުގައި އިތުރަށް ބުނެފައި ވަނީ ޗައިނާގެ 78 ޔުނިވާސިޓީއެއްގެ ކޯސްތަކުގައި ބައިވެރިވުމުގެ ފުރުސަތު އެބައޮތް ކަމާށާއި،  ކޯހަށް ހޮވޭ މީހުން ރާއްޖެ އިން ފުރުމުގެ ކުރިން އެ މީހަކު ބައިވެރިވާ ކޯސް ހިންގާ ޔުނިވާސިޓީ އާއި ކޯހަކީ ރާއްޖޭގެ އެމްކިޔުއޭ ގަބޫލުކުރާ ކޯހެއްތޯ ޔަގީން ކުރުމަށް އެދޭކަމަށެވެ.

ޚިދުމަތުގައި ތިއްބެވުމަށްފަހު ކޯހަށް ކުރިމަތިލައްވަން ބޭނުންވާ ފަރާތްތަކުން ކޯހަށް ހޮވިއްޖެ ނަމަ އެކޯހަކީ ކަމާ ބެހޭ އިދާރާތަކުން ގަބޫލުކުރާ މަރުކަޒެއްގައި ހިންގާ އަދި އެ އިދާރާއަކުން ގަބޫލުކުރާ ކޯހެއްކަން ޔަގީން ކުރުމަށް ވެސް މިނިސްޓްރީން އެދިފައިވެއެވެ.

މިނިސްޓްރީގެ އިއުލާނުގައިވާ ގޮތުން އެ ސްކޮލާޝިޕްތަކަށް ކުރިމަތި ލެވެނީ ޑިގްރީ ނިންމާފައިވާ އުމުރުން 45 އަހަރު ނުވާ މީހުންނަށެވެ.

މައުލޫމާތު ލިބިފައިވާ  ގޮތުގައި ޗައިނާއިން ހަމަޖެހިގެން މި ދިޔަ ފުރުސަތަކީ ޗައިނާގެ ރައީސް ޝީ ޖިންޕިންގެ ދަޢުވަތަކަށް  ރައީސް ޑރ.މުހައްމަދު މުއިއްޒު ދާދި ފަހުން  ޗައިނާއަށް ކުރެއްވި ފުރަމާނަ ދަތުރުފުޅާއި ގުޅިގެން ހަމަޖެހިގެން ދިޔަ ފުރުސަތެކެވެ.