ރާއްޖޭގެ ފަތުރުވެރިކަމުގެ މާކެޓް ގެ އެއްވަނަ އަށް ޗައިނާ އަރައިފިއެވެ.

ޓުރިޒަމް މިނިސްޓްރީން ހާމަ ކުރާ ފަތުރުވެރިކަމުގެ ޑެއިލީ ރިޕޯޓް އިން ދައްކާގޮތުގައި މިދިޔަ އަހަރުގެ މި މުއްދަތުގައި 3 ވަނައިގައި އޮތް ޗައިނާ މި އަހަރު ވަނީ 23,972 ފަތުރުވެރިންނާއި އެކު މާކެޓްގެ އެއްވަނަ ހޯދާފައެވެ. މިއާއިއެކު، ރާއްޖޭގެ ފަތުރުވެރިކަމުގެ މާކެޓްގައި ޗައިނާ ފަތުރުވެރިންގެ މާކެޓް ޝެއާ އަކީ 11.2 ޕަސެންޓެވެ.

މި ބަދަލާއި އެކު މިއަހަރު ރާއްޖޭގެ މާކެޓްގައި ކުރިން އެއްވަނައިގައި އޮތް ރަޝިއާ ވަނީ 21,898 ފަތުރުވެރިންނާއި އެކު ދެވަނަ އަށް ވެއްޓިފައެވެ. މާކެޓް ގެ ތިންވަނައިގައި އޮތީ އިޓަލީއެވެ. އެގައުމުން މި އަހަރުގެ މިހާތަނަށް 21,321 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.

Advertisement

މިދިޔަ އަހަރުގެ މި މުއްދަތުގައި ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރީ އިންޑިއާ އިން ނަމަވެސް މި އަހަރު އެ ގައުމުން ފަތުރުވެރިން ޒިޔާރަތް ކުރި އަދަދު ވަނީ މާކެޓް ގެ 5 ވަނަ އަށް ވެއްޓިފައެވެ. މިގޮތުން މި އަހަރު އެ ގައުމުން ރާއްޖެއަށް ޒިޔާރަތް ކުރީ 16,536 ފަތުރުވެރިންނެވެ.

މި މަހުގެ 3 ވަނަ ދުވަހާއި ހިސާބަށް ރާއްޖެ އަށް ޖުމްލަ 214,470 ފަތުރުވެރިން ވަނީ ޒިޔާރަތްކޮށްފައެވެ. މިއީ ފާއިތުވި ދެ އަހަރާއި އަޅާ ބަލާއިރު، 13.3 ޕަސެންޓްގެ ކުރިއެރުމެކެވެ. 2023 ވަނަ އަހަރުގެ މި މުއްދަތުގައި ރާއްޖެ އަށް ޒިޔާރަތް ކުރީ 189,332 ފަތުރުވެރިން ކަމަށް ވާއިރު 2022 ވަނަ އަހަރު ރާއްޖެއަށް ޒިޔާރަތް ކުރީ 143,876 ފަތުރުވެރިންނެވެ.

މި އަހަރު އެންމެ ގިނަ ފަތުރުވެރިން ރާއްޖެ އަށް ޒިޔާރަތްކުރީ 3 ފެބްރުއަރީ ވީ ހޮނިހިރު ދުވަހުއެވެ. އެދުވަހު ރާއްޖެއަށް 8,900 ފަތުރުވެރިން ޒިޔާރަތްކޮށްފައިވާއިރު، ރާއްޖޭގައި ފަތުރުވެރިން ގާތްގަޑަކަށް 8 ދުވަސް ހޭދަކުރެއެވެ.

ރައީސް ޑރ.މުއިއްޒު މިއަދު އިއްވެވި ރިޔާސީ ބަޔާނުގައި އެމަނިކުފާނު ވަނީ ރާއްޖެ އަށް މިއަހަރު 2 މިލިއަން ފަތުރުވެރިން ގެނެވޭނެ ކަމަށް އަންދާޒާ ކުރައްވާ ކަމަށާއި އަމާޒަކީ މި އަހަރު ނިމުމުގެ ކުރިން މުޅިން އަލަށް 20 ރިސޯޓު ހުޅުވައި، 2،857 އެނދު އުފެދިގެން ދިއުން ކަމަށް ވިދާޅުވެފައެވެ.