ރާއްޖޭގެ މަސްވެރިކަން ކުރިއެރުވުމަށް ސައުދީ އަރަބިއާއިން އެހީތެރިވާނެ ކަމުގެ ޔަގީންކަން އެގައުމުގެ ސައުދީ ފަންޑް ފޯ ޑިވެލޮޕްމަންޓް (އެސްއެފްޑީ)ގެ ޑެޕިއުޓީ ޗީފް އެގްޒެކެޓިވް އޮފިސަރު އެޗްއީސީ ފައިސަލް އަލް ކަހުތާނީ ފިޝަރީޒް މިނިސްޓަރު އަހްމަދު ޝިޔާމް އަށް ދެއްވައިފިއެވެ.

ފިޝަރީޒް މިނިސްޓްރީން ބުނީ މިޔަގީންކަން ދީފައިމިވަނީ މިނިސްޓަރު ޝިޔާމް ސައުދީ އަށް ކުރައްވާ ދަތުރުފުޅުގައި އެސްއެފްޑީ ޑެޕިއުޓީ ޗީފް އެގްޒެކެޓިވް އޮފިސަރު އެޗްއީސީ އާއި އެކު ބޭއްވި ބައްދަލުވުމުގައި ކަމަށެވެ.

މި ބައްދަލުވުމުގައި އެ ކުންފުނީގެ މަސްވެރިކަން ތަރައްގީ ކުރުމުގެ މަޝްރޫތަކާމެދު މަޝްވަރާ ކުރުމުގެ އިތުރުން، ދާއިރާ ކުރިއެރުވުމަށް ގެންގުޅުއްވާ ސިޔާސަތުތަކާ މެދު މަޝްވަރާކުރައްވާފައިވާ ކަމަށް ފިޝަރީޒް މިނިސްޓްރީ އިން ހާމަކުރެއެވެ.

މި ބައްދަލުވުމާއި ގުޅޭ ގޮތުން މިނިސްޓަރު ޝިޔާމް އެކްސްގައި ކުރެއްވި ޕޯސްޓެއްގައި ވިދާޅުވީ  ސައުދީ ފަންޑު ފޯ ޑިވޮލޮޕްމަންޓުގެ ޑެޕިއުޓީ ސީއީއޯއާ ބައްދަލުވުމުން އުފާ ކުރައްވާ ކަމަށެވެ. އަދި، ރާއްޖޭގެ މަސްވެރިކަމުގެ ދާއިރާ ކުރިއަރުވަން އެ ގައުމުން ދޭ އެހީތެރިކަމަށްޓަކައި އެބޭފުޅާ ވަނީ ޝުކުރު އަދާކުރައްވައިފައެވެ.