މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ ފަރާތުން މޯލްޑިވިއަން އިން ނަގާފައިވާ ޓިކެޓަށާއި، އަދި ޗާޓަރ ކޮށްފައިވާ ފުލައިޓްތަކަށް ދައްކަން ޖެހޭ ފައިސާ، ނުދައްކާ މައްސަލާގައި އެޕާޓީގެ މައްޗަށް ދައުވާކުރަން ޖެހިދާނެ ކަމަށް މޯލްޑިވިއަން އިން ބުނެފިއެވެ.

މޯލްޑިވިއަންއިން މިހެން ބުނެފައި މިވަނީ އެކުންފުންޏަށް އެމްޑީޕީގެ ފަރާތުން ދައްކަށް ޖެހޭ ފައިސާގެ ތެރެއިން 8 ޖެނުއަރީ 2024 ގެ ނިޔަލަށް 5،629،861 (ފަސްމިލިއަން ހަލައްކަ ނަވާވިސް ހާސް އަށްސަތޭކަ ފަސްދޮޅަސް އެއް ރުފިޔާ) ރުފިޔާ ނުދައްކާ އޮތުމުން އެމްޑީޕީގެ ޗެއާރޕާޝަން ފައްޔާޒު އިސްމާއިލަށް އެޑްރެސްކޮށް ފޮނުވާފައިވާ ސިޓީއެއްގައެވެ.

އެސިޓީގައި މޯލްޑިވިއަންގެ ފަރާތުން ބުނެފައިވަނީ އައިލެންޑް އޭވިއޭޝަނާއި އެމްޑީޕީން މީގެ ކުރިން އެއްބަސްވެފައި އޮތީ ޚިދުމަތް ހޯދާ ތާރީހުން ފެށިގެން 48 ގަޑިއިރު ތެރޭގައި ފައިސާދައްކާ ހަލާސްކުރާ ގޮތަށް ނަމަވެސް އެކި ފަހަރު މަތިން ސިޓީ ފޮނުވައިގެން ވެސް އެ ފައިސާ ދައްކާފައި ނުވާކަމަށާއި، އެހެންކަމާއި އެކު މި މަހުގެ 18 ވަނަ ދުވަހުގެ ކުރިން އެ ފައިސާ ނުދައްކައިފި ނަމަ ޝަރުޢީ މަރުހަލާ ފަށާނެ ކަމަށް އެޕާރޓީގެ މައުލޫމާތަށްޓަކައި އަންގާކަމަށެވެ.  

މޯލްޑިވިއަންގެ ފަރާތުން އެމްޑީޕީއަށް މިފަދައިން އަންގާފައިވާއިރު އެންމެފަހުން ބޭއްވުނު ރިޔާސީ އިންތިހާބުގެ ދުވަސް ވަރު ސަރުކާރުގެ ވަސީލަތްތައް ނަހަމަ ގޮތުގައި އެމްޑީޕީގެ ކެންޕެއިނަށް ބޭނުންކުރަމުން ދިޔަ ކަމަށް އޭރުގެ އިދިކޮޅު ފަރާތްތަކުން (މިހާރު ސަރުކާރުގައި ތިއްބެވި ފަރާތްތައް)  ދިޔައީ ބުނަމުންނެވެ.

އޭރު އެންމެ ބޮޑަށް އެމްޑީޕީއަށް ނިސްބަތްކޮށް ދެއްކި އެއް ވާހަކައަކީ ވެސް ކެންޕެއިން ދަތުރުތަކުގައި ސަރުކާރުގެ ވަސީލަތްތައް ނަހަމަ ގޮތުގައި ބޭނުންކުރަމުން ގެންދިޔަ ކަމުގެ ވާހަކައެވެ.