އަލް ޢަސްރު ޖަމިއްޔާއިން އިންތިޒާމް ކޮށްގެން މިހަފްތާ ބަންދުގައި ކުރިއަށް ގެންދެވުނު އައްޑަނަ ވޯކްޝޮޕްގައި ނުކުޅެދުންތެރިކަން ހުންނަ ކުދިންވެސް ބައިވެރި ކުރެވިގެން ދިޔުމަކީ ހާސިލް ކުރެވުނު މުހިންމު ލަނޑުދަޑިއެއް ކަމަށް، އެ ވޯކްޝޮޕްގެ ބައިވެރިންނަށް ކިޔަވައިދެއްވި އައްޝެއިޚު ސާޖިދު މުހައްމަދު ވިދާޅުވެއްޖެއެވެ. 

އުމުރުން 13 އަހަރާއި 19 އަހަރުގެ ކުދިންނަށް އަމާޒުކޮށްގެން މިމަހު 9 އަދި 10 ވަނަ ދުވަހު އަލް އަސްރުން ކުރިއަށް ގެންދިޔަ އައްޑަނަ އަޤީދާ ވޯކްޝޮޕް ގައި 60 އަށްވުރެ ގިނަ ބައިވެރިން ބައިވެރިވެފައިވާއިރު، އޭގެ ތެރޭގައި އަޑު އިވުމުގެ ނުކުޅެދުންތެރިކަން ހުންނަ 8 ކުއްޖަކުވެސް ވަނީ ބައިވެރިވެފަ އެވެ. 

މި ވޯކްޝޮޕްގެ ބައިވެރިންނަށް ކިޔަވައި ދެއްވާފައިވަނީ ޝެއިޚް ސާޖިދުގެ އިތުރުން އުސްތާޛް ނިޝާމް އަންވަރެވެ. 

އައްޑަނަ ވޯކްޝޮޕްގެ ތެރެއިން--ފޮޓޯ/އަސްރު

ވޯކްޝޮޕް ނިންމާލުމަށްފަހު، ވޯކްޝޮޕާއި ގުޅިގެން "ވޮއިސް" އަށް ދެއްވި ޚާއްސަ ބަސްދީގަތުމެއްގައި ޝެއިޚް ސާޖިދު ވަނީ އެ ވޯކްޝޮޕަކީ ވަރަށް ކާމިޔާބު ވޯކްޝޮޕެއް ކަމަށެވެ. އެގޮތުން ވޯކްޝޯޕްގެ އެންމެ ފަހު ސެޝަނަށް ވެސް 60 އަށްވުރެ ގިނަ ބައިވެރިން ހާޒިރުވެފައިވާއިރު، އެ ބައިވެރިންގެ ފަރާތުން ވަރަށްބޮޑު ތަރުޙީބެއް ލިބިގެންދިޔަކަން ޝެއިޚް ފާހަގަކުރެއްވި އެވެ. 

އައްޑަނަ ވޯކްޝޮޕްގެ ތެރެއިން އިވުމުގެ ނުކުޅެދުންތެރިކަން ހުންނަ ދަރިވަރެއް ޕްރެޒެންޓޭޝަން ހުށަހަޅައިދެނީ--ފޮޓޯ/އަސްރު

މިއާއެކު ވޯކްޝޮޕުން ފާހަގަކުރެވުނު ޚާއްސަ ކަންކަމަށް އަލި އަޅުވާލައްވައި ވާހަކަ ދައްކަވަމުން ޝެއިޚް ސާޖިދު ވިދާޅުވީ، އެ ވޯކްޝޮޕުގައި ބައިވެރިވެ ވޯކްޝޮޕް ނިންމި ޚާއްސަ އެހީއަށް ބޭނުންވާ ދަރިވަރުން، ވޯކްޝޯޕްގައި ދިން ގުރޫޕް މަސައްކަތުގެ އިތުރުން ޓެސްޓްވެސް ފުރިހަމަ ކޮށްފައިވާ ކަމަށެވެ. 

އަދި އެއީ އެ ވޯކްޝޮޕުން ހާސިލް ކުރެވުނު މުހިންމު ލަނޑުދަޑިއެއް ކަމަށްވެސް ޝެއިޚް ވިދާޅުވި އެވެ. 

އައްޑަނަ ވޯކްޝޮޕްގައި އިވުމުގެ ނުކުޅެދުންތެރިކަން ހުންނަ 8 ދަރިވަރަކު ބައިވެރިވާއިރު، އެކުދިންނާއި އެކު، އެކުދިންގެ ވާހަކަތައް ކިޔައިދިނުމަށް އިންޓާޕްރިޓޭއެއްވެސް ވަނީ ހަމަޖައްސައިފަ އެވެ.