ގައުމު ކުރިއަށްދާ މިސްރާބު ރަނގަޅު ނޫން ކަމަށާއި، ފުން އަދަވަޅަކަށް ވެއްޓެމުންދާއިރު ވެރިކަން ކުރެއްވި ބޭފުޅެއްގެ ހައިސިއްޔަތުން އެކަމަށް ލޯ މަރާލައިގެން ހުންނެވެން ނެތް ކަމަށް ކުރީގެ ރައީސް އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

ރައީސް ޞާލިހު މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ އިންތިޚާބަށް، ހިންނަވަރު ދާއިރާއަށް ވާދަކުރައްވާ، މިހާރުވެސް އެ ދާއިރާ ތަމްސީލް ކުރައްވަމުންދާ މެންބަރު ޖީހާން މަހްމޫދަށް ތާއީދު ހޯދުމަށް ހިންނަވަރުގައި ރޭ ބޭއްވި ޖަލްސާގައި ވާހަކަފުޅުދައްކަވަމުންނެވެ. 

އެހޮތުން ޞާލިހު ވިދާޅުވީ، ގައުމުގެ މިސްރާބު ނުބައި މިސްރަބަކަށް ހުރިއިރު، މީގެ ކުރިން ވެރިކަން ކުރެއްވި ބޭފުޅެއްގެ ހައިސިއްޔަތުން އެ ކަމާ ލޯ މަރާލައިގެން ހުންނެވެން ނެތް ކަމަށެވެ.

Advertisement

މިއާއެކު ޞާލިހު ވިދާޅުވީ ޕީޕީއެމް/ ޕީއެންސީން ވެރިކަމަށް އަންނަންވެގެން ހެދި ދޮގުތައް މިހާރު ރައްޔިތުންނަށް އެނގި ވިސްނެމުންދާ ކަމަށެވެ. އަދި އެކަމާއި މެދު މިހާރު އެ ރައްޔިތުން ހިތާމަ ކުރާ ކަމަށްވެސް އެމަނިކުފާނު ވިދާޅުވި އެވެ. 

މީގެ އިތުރުން، ރައީސް ޞާލިހު ވަނީ، އެ މަނިކުފާނުގެ ވެރިކަމުގައި ރަށްރަށުގައި ތަރައްގީގެ ގިނަ މަސައްކަތްތަކެއް ކުރެއްވި ކަމަށް ވިދާޅުވެފައެވެ. އެހެންނަމަވެސް ސަރުކާރު ބަދަލުވުމާ އެކު އެ ހުރިހާ މަޝްރޫއެއްހެން ހުއްޓިފައިވާ ކަމަށް އެމާނިކުފާނު ވިދާޅުވި އެވެ.