ސައުދީ ޕްރޮފެޝަނަލް ލީގަކީ ފާއިތުވެދިޔަ 2023 ވަނަ އަހަރުގެ އެންމެ ބޮޑު ކުރިއެރުމެއް ހޯދި އެއް ލީގެވެ. އަދި މިވަގުތު އޭޝިއާގެ އެންމެ ވަރުގަދަ ލީގަކީ ވެސް ސައުދީ ލީގެވެ.

ޕޯޗުގަލް ކެޕްޓަން ކްރިސްޓިއާނޯ ރޮނާލްޑޯ 2022 ވަނަ އަހަރުގެ ފަހުކޮޅު ސައުދީ ޕްރޮފެޝަނަލް ލީގުގެ އަލް ނަސްރަށް ސޮއި ކުރުމާއެކު އެލީގުގެ މަގުބޫލުކަން ފުޓްބޯޅަ ސަޕޯޓަރުންގެ މެދުގައި ވަނީ ވަރަށް ބޮޑަށް އިތުރުވެފައެވެ. އަދި މިއާއެކު ޔޫރަޕުގެ ބޮޑެތި ކުލަބުތައް ދޫކޮށް ގިނަ ތަރިންތަކެއް ވަނީ ސައުދީ ލީގާއި ގުޅިފައެވެ.

އޭގެ ތެރޭގައި 2022 ވަނަ އަހަރުގެ ބެލެންޑޯ އެވޯޑް ކާމިޔާބުކުރި ރެއާލް މެޑްރިޑްގެ ކުރީގެ ކެޕްޓަން ކަރީމް ބެންޒީމާ އާއި، ލިވިޕޫލުގެ ބްރެޒިލް ފޯވާޑް ރޮބާޓޯ ފިރްމީނޯ, ޕީއެސްޖީގެ ބްރެޒިލް ތަރި ނޭމާގެ އިތުރުން ފުލަމްގެ ސާބިއާ ފޯވާޑް އެލެގްޒެންޑަރ މިޓްރޮވިޗް އަދި ބަޔާން މިއުނިކްގެ ސަޑިއޯ މާނޭ ފާހަގަކޮއްލެވެއެވެ.

Advertisement

މިއާއެކު ސައުދީ ލީގުގެ ޓޮޕް ސްކޯރާ މަގާމުގެ ވާދަވެރިކަން މިވަނީ ވަރަށް ބޮޑުވެފައެވެ. ލީގުގައި ކޮންމެ ޓީމަކުން 20 މެޗު ކުޅެފައިވާއިރު ލަނޑު ޗާޓުގެ ކުރީގައި މިވަގުތު އޮތީ އުމުރުން 39 އަހަރުގެ ކްރިސްޓިއާނޯ ރޮނާލްޑޯ އެވެ. ލީގުގައި ކުޅުނު 19 މެޗުގައި ރޮނާލްޑޯ 21 ލަނޑު ކާމިޔާބުކޮށްފައިވާއިރު، މި ލިސްޓުގެ ދެވަނައިގައި މިވަގުތު އޮތީ އަލް ހިލާލްގެ ސާބިއާ ފޯވާޑް އެލެގްޒެންޑަރ މިޓްރޮވިޗް އެވެ.

އުމުރުން 29 އަހަރުގެ މިޓްރޮވިޗް ވަނީ ލީގުގައި ކުޅުނު 18 މެޗުގައި އެޓީމަށް 19 ލަނޑު ކާމިޔާބުކޮށްދިނުމުގެ އިތުރުން ލީގު ތާވަލްގެ އެއްވަނަ އެޓީމަށް ހޯދައިދިނުމުގައި މުހިންމު ދައުރެއް އަދާކޮށްދީފައެވެ.

ކޮންމެ ޓީމަކަށް ބާކީ 14 މެޗު އޮތްއިރު، ލީގު ތާވަލްގެ ކުރީގައި ހަތް ޕޮއިންޓްގެ ލީޑަކާ އެކު މިވަގުތު އޮތީ އަލް ހިލާލް އެވެ. ދެވަނަގައި އޮތް އަލް ނަސްރަށް 20 މެޗުން 49 ޕޮއިންޓް ލިބިފައިވާއިރު، މިދެޓީމު ވެސް ވަނީ އޭއެފްސީ ޗެންޕިއަންސް ލީގު ރައުންޑް އޮފް 16 ގެ ފުރަތަަމަ ލެގުގެ މެޗު ކާމިޔާބުކޮށް ކުއާޓާ ފައިނަލުގެ ފުރުސަތު ބޮޑުކޮއްފައެވެ.