ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވަޢުދުފުޅާއި އެއްގޮތަށް، ސަރުކާރުން މަސް ގަންނަ އަގު 20 ރުފިޔާއަށްވުރެ ކުޑަ ނުކުރައްވާނެ ކަމަށް ފިޝަރީޒް މިނިސްޓަރ އަހުމަދު ޝިޔާމް ވިދާޅުވެއްޖެއެވެ. 

މިއަދުގެ ރައްޔިތުންގެ މަޖިލީހުގެ ޖަލްސާގައި ވަޒީރާއި ސުވާލު ކުރުމަށް ހުޅުވާލި ފުރުސަތުގައި ދާންދޫ ދާއިރާގެ މެންބަރު ޔައުގޫބް އަބްދުالله ވަނީ ސަރުކާރުން މަސް ގަންނަމުންދާ އަގު 20 ރުފިޔާއަށްވުރެ ވެސް ދަށް ކުރަން ވާހަކަތައް ދެކެވޭ ކަމަށް އަޑު ފެތުރިފައިވާ ކަން ފާހަގަކުރައްވައި އެފަދައިން ކަން ކުރުމުގެ ވިސްނުން ސަރުކާރުގެ އޮތްތޯ ސުވާލު ކުރައްވާފައެވެ. 

އެ ސުވާލަށް ޖަވާބު ދެއްވަމުން ވަޒީރު ޝިޔާމް ވަނީ، އެފަދަ އެއްވެސް ވިސްނުމެއް ސަރުކާރުގެ ނެތް ކަމަށާ، މަސް ގަންނަ އަގު 20 ރުފިޔާއަށް ވުރެ ދަށް ނުކުރުމަކީ ރައީސުލްޖުމުހޫރިއްޔާ ޑރ މުހައްމަދު މުޢިއްޒުގެ ވަޢުދުފުޅެއް ކަމަށްވާއިރު، އެ ވަޢުދާއި އެއްގޮތަށް އަގު ހިފެހެއްޓިފައި ހުންނާނެ ކަމަށެވެ. 

މީގެ އިތުރުން މަހުގެ އަގު 20 ރުފިޔާގައި ބަހަށްޓައިގެން މަސް ގަނެ ވިއްކުމުން ލިބޭނީ ކިހާ ގެއްލުމެއްތޯ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ ޝަރީފް) ކުރެއްވި ސުވާލަށް ޖަވާބު ދެއްވަމުން ވަޒީރު ޝިޔާމް ވަނީ އެފަދައިން ގަނެ ވިއްކާމުންދަނީ 6 ރުފިޔާގެ ގެއްލުމާއި އެކު ކަމަށެވެ. 

މަސް ކިލޯއެއްގެ އަގު 20 ރުފިޔާގައި ހިފަހައްޓަވައ އެ އަގު ވެއްޓުނަ ނުދެއްވާ ބޮޑު ކުރުމަށް މަސައްކަތްޕުޅު ކުރެއްވުމަކީ ރިޔާސީ އިންތިހާބުގެ ކެންޕެއިން ތެރެއިން ރައީސް މުޢިއްޒު ވެވަޑައިގެންނެވި ވަޢުދުފުޅެކެވެ.