އަންނަ މާރިޗު މަހުގެ 5 ވަނަ ދުވަހުގެ ކުރިން، މަސްވެރިންނަށް ދޭން ހުރި ހުރިހާ ފައިސާއެއް ދީ ޚަލާސްކުރައްވާނެ ކަމުގެ ޔަގީންކަން މަސްވެރިކަމާއި ކަނޑުގެ ވަސީލަތްތަކާއިބެހޭ ވުޒާރާގެ ވަޒީރު އަހުމަދު ޝިޔާމް ދެއްވައިފި އެވެ. 

މަސްވެރިންނަށް ލިބެންޖެހޭ ފައިސާ ނުލިބޭތީ ކޫއްޑޫގައި ދާދިފަހުން މަސްވެރިން ވަނީ އިހްތިޖާޖު ކޮށްފައެވެ. އެ މަސްވެރިންގެ ކަންބޮޑުވުންތައް އަޑު އެއްސެވުމަށް އެދުވަހު، ވަޒީރު ޝިޔާމް ކޫއްޑޫއަަށް ވަޑައިގެންފައިވާއިރު، އެދުވަހު މަސްވެރިންނާއި ވާހަކަ ދައްކަވަމުން ޝިޔާމް ވަނީ، އަންނަ މާރިޗު ކަމުގެ 5 ވަނަ ދުވަހުގެ ފަހުން މަސްވެރިންނަށް ސަރުކާރުން ދޭންޖެހޭނެ ފައިސާއެއް ނުހުންނާނެ ކަމުގެ ޔަގީންކަން ދެއްވާފައެވެ. 

މިއަދުގެ މަޖިލީހުގެ ޖަލްސާއަށް ޝިޔާމް ހާޒިރު ކުރުވުމުން، މަކުނުދޫ ދާއިރާގެ މެމްބަރު މުހައްމަދު ރާއީ ވަނީ އެކަން ފާހަގަކުރައްވައި، މަސްވެރިންނަށް އެ ދެއްވި ޔަގީންކަން މަޖިލީހުގައި ވެސް ދެއްވުމަށް އެދިލައްވާފައެވެ. އަދި ކުރިއަށް އޮތް ގާތްގަނޑަކަށް 15 ދުވަސް ތެރޭގައި އެ ފައިސާ ދޭނެ ގޮތުގެ ތަފްސީލުވެސް ދެއްވުމަށް އެދިވަޑައިގެންފައެވެ. 

Advertisement

އެ ސުވާލަށް ޖަވާބު ދެއްވަމުން ޝިޔާމް ވިދާޅުވީ، އެންމެ ފުރަތަމަ ދުވަހުން ފެށިގެންވެސް ސަރުކާރުގެ އަމާޒަކަށްވީ މިދިޔަ ވެރިކަމުގައި ވާރުތަވެފައި ހުރި ނުދެވި ހުރި ފައިސާ ހިމެނޭހެން، މަސްވެރިންނަށް ދޭން ހުރި ފައިސާ ވޭހާވެސް އަވަހަސް ދީ ޚަލާސްކުރުން ކަމަށެވެ.

މިއާއެކު ޝިޔާމް ވިދާޅުވީ މި ސަރުކާރުން ވެރިކަމާ ހަވާލުވިއިރު 200 އެތައް މިލިއަން ރުފިޔާއެއް މަސްވެރިންނަށް ދޭން ހުރި ކަމަށާ، މިއަދާއި ހަމައަށް އައިއިރު، ޖުމްލަ އަދަދަށް ބަލާއިރު މަސްވެރިންނަށް ދޭން ހުރީ 310 މިލިއަން ކަމަށެވެ. އޭގެ ތެރެއިން އެކި ބައިތައް ދޫކުރުމަށް ފަހު، މިހާރު ނުދެވި ހުރި 280 މިލިއަން އެއްހާ ރުފިޔާ މާޗު މަހުގެ 05 ކުރިން އެއްކޮށް ހަލާސް ކުރެވޭނެކަމަށް ޝިޔާމް ވިދާޅުވިއެވެ.

މާރިޗު 5 ގެ ކުރިން މަސްވެރިންނަށް ފައިސާ ދީ ޚަލާސް ކުރާނެ ކަމަށް ޝިޔާމް ވިދާޅުވެފައި ވާއިރު، ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވެސް ވަނީ ލޯން ނަގައިގެން ނަމަވެސް މަސްވެރިންނަށް ނުދެވި ހުރި ފައިސާ ވޭހާވެސް އަވަހަށް ޚަލާސް ކުރައްވާނެ ކަމަށް ވިދާޅުވެފައެވެ.