ވަކިވަކި މެންބަރުންގެ ނުފޫޒުން މިފްކޯ ސަލާމަތް ކޮށް އެތަން ރީ-ސްޓްރަކްޗަރ ކޮށް ރިފޯމް ކުރުމުގެ މަސައްކަތް ކުރައްވަމުންދާ ކަމަށް މަސްވެރިކަމާއި ކަނޑުގެ ވަސީލަތްތަކާއިބެހޭ ވުޒާރާގެ ވަޒީރު އަހުމަދު ޝިޔާމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިފްކޯއިން މަސްވެރިންނަށް ދޭންޖެހޭ ފައިސާ ނުދެވެނީ ކީއްވެތޯ ވިލިގިލީ ދާއީރާގެ މެންބަރުން ސަޢުދު ހުސައިން ކުރެއްްވި ސުވާލަށް ޖަވާބުދެއްވަމުން ޝިޔާމް ވިދާޅުވީ، މިފްކޯއިން މަސްވެރިންނަށް ދޭންޖެހޭ ފައިސާ ނުދެވެނީ އެތަނުގެ މާލީ ހާލަތު މިހާރު އޮތް ހާލަތަށް ދަށަށް ގޮސްފައިވާތީ ކަމަށެވެ.
އަދި މިހާރު އެތަން އޮތް ހާލަތަށް ދިޔައީ، އެކިއެކި ސަރުކާރު ތަކުގައި، ނުފޫޒް ގަދަ ފަރާތްތަކުގެ ސަބަބުން ކަމަށާ، އެކަން ހުއްޓުވައި މިފްކޯ ރީ-ސްޓްރަކްޗަރ ކުރުމުގެ މަސައްކަތް މިހާރު ކުރަމުންދާ ކަމަށް ޝިޔާމް ވިދާޅުވި އެވެ.
މިފްކޯ މިހާލަތަށް ދިޔުމުގައި އެންމެ ދައުރެއް އަދާކުރީ އެކިއެކި ސަރުކާރު ތަކުން. ނުފޫޒުގަދަ ބައެއް ފަރާތްތަކުން. ބައެއް މަސްވެރިން އެބަ ވިދާޅުވޭ, ވަކިން ހާއްސަކޮށް ހުވަދޫއަށް ދިޔައީމަ ހުވަދޫގެ މަސްވެރިން އެބަ ވިދާޅުވޭ، ކީއްވެގެންހޭ މިވެނި މީހެއްގެ ނުފޫޒާއި ބާރުން މިފްކޯ ގައި، މިވެނި މީހަކު ބޭނުންވާ ގޮތަށް ހުރިހާ މަގާމުތަކަށް މީހުން ލައިގެން މިވެނި މީހަކު ބޭނުންވާ ގޮތަށް މިފްކޯ. އަޅުގަނޑުމެން މިއުޅެނީ މިކަން ހުއްޓާލަން. މިކަން އަޅުގަނޑުމެން ހުއްޓާލަން އުޅޭތީ މިއުޅެނީ އުނދަގޫ ވެގެން. އަޅުގަނޑުމެން މިއުޅެނީ މިފްކޯ ރީ-ސްޓްރަކްޗަރ ކުރަން. އަޅުގަނޑުމެން މިއުޅެނީ މިފްކޯ ރިފޯމް ކުރަން. މިފްކޯ މިގޮތަށް ބްލީޑް ވާކަށް އަޅުގަނޑުމެން މި ސަރުކާރަކުން ޖާގައެއް ނުދޭނަން އިރާދަކުރެއްވިޔާ. އެ މަސައްކަތް ކުރާތީވެ މިއުޅެނީ ތަންކޮޅެއް އުނދަގޫ ވެގެން.
ވަޒީރު އަހުމަދު ޝިޔާމް
ޝިޔާމް އިތުރަށް ވިދާޅުވީ މުޒާހަރާތަކުގައި ތިއްބެވި ހުރިހާ މަސްވެރިންނާއި ޚާއްސަކޮށް ހުވަދޫގައި މުޒާހަރާގައި ތިއްބެވި ހުރިހާ މަސްވެރިންނާއި ބައްދަލު ކުރެއްވި ކަމަށާއި އެ މަސްވެރިންގެ މައިގަނޑު ޝަކުވާ އަކަށް ބުނަމުންދިޔައީ މިފްކޯގެ ކަންކަން ހައްލު ކޮށްދިނުމަށް ކަމަށެވެ.
މިތަން އެހަށް ހައްލު ކޮށްދީބަލާށޭ. ވަކި މެންބަރެއްގެ ނުފޫޒުން މިތަން ސަލާމަތް ކޮށްދީބަލާށޭ. ތިމަންނަމެން މިކުރާ މަސައްކަތުގެ އުޖޫރަ ތިމަންނަމެންނަށް ލިބޭނީ މިތަނުގެ ޚަރަދު ކުޑަ ކުރެވިގެންނޭ. ވަކި މީހަކު ބޭނުންވީމާ މިތަނުގެ ވަޒީފާތައް ގިނަކޮށްހެން މިތަން މި ހިންގާ ހިންގުން ނިމުމަކަށް ގެނެސްދޭށޭ. އެކަން އަޅުގަނޑުމެން ކުރާނަން.
ވަޒީރު އަހުމަދު ޝިޔާމް
މީގެ އިތުރުން މަސްވެރިންނަށް ދޭންޖެހޭ ފައިސާ ނުދެވެނީ ކީއްވެތޯ ދާންދޫ ދާއިރާގެ މެންބަރު ޔައުގޫބް އަބްދުالله ކުރެއްްވި ސުވާލަށް ޖަވާބު ދެއްވަމުން ޝިޔާމް ވިދާޅުވީ، ކުރީ ސަރުކާރުން މިފްކޯއަށް ބޭކާރު ގޮތުގައި ކޮންސަލްޓަންޓުން ނަގައި ބޮޑު މުސާރަ ދެމުންދާ ކަމަށެވެ. އޭގެ ސަބަބުން މިފްކޯއަށް ގެއްލުންތަކެއް ވެފައިވާ ކަމަށާ، އެފަދަ ބޭކާރު ގޮތުގައި ނަގާފައި ތިބި، ކުރާނެ މަސައްކަތެއް ނެތް މުވައްޒަފުން ވަޒީފާއިން މިހާރު ވަކިކުރަމުންދާ ކަމަށެވެ.
Advertisement
This content is created and paid for by advertisers and does not involve Voice Journalists
