ދިވެހި ޤައުމީ އެއާލައިން، މޯލްޑިވިއަން އަށް އޭޓީއާރު މަރުކާގެ އިތުރު ދެ ބޯޓު ގެންނަން ނިންމާ އެކަމާއި ގުޅޭ އެއްބަސްވުމުގައި ސޮއިކޮށްފިއެވެ.

މިއެއްބަސްވުމުގައި ސޮއިކޮށްފައި ވަނީ މިހާރު ސިންގަޕޫރުގައި ކުރިއަށްދާ އެއާރސޯގެ ތެރެއިންނެވެ. ރާއްޖޭގެ ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންގެ ހާޒިރުގައި މި އެއްބަސްވުމުގައި ރާއްޖޭގެ ފަރާތުން ސޮއިކުރައްވާފައި ވަނީ އައިލެންޑު އޭވިއޭޝަންގެ މެނޭޖިންގ ޑިރެކްޓަރ އިބްރާހިމް އިޔާސްއެވެ.  

އޭޓީއާރު އިން ކުރި އެކްސްޕޯސްޓެއްގައި ބުނެފައިވާ ގޮތުގައި މޯލްޑިވިއަން އިން ގެންނަށް ނިންމި އޭޓީއާރު600-42ގެ ދެ ބޯޓާއި އެކު މޯލްޑިވިއަން އިން ބޭނުންކުރަމުންގެންދާ އޭޓީއާރު މަރުކާގެ ބޯޓުގެ އަދަދު 7 އަށް އަރާނެއެވެ.

އޭޓީއާރު އިން އިތުރަށް ބުނެފައިވާ  މޯލްޑިވިއަންއިން އޭޓީއާރު މަރުކާގެ ބޯޓް ގެންދަން ނިންމުމަކީ މޯލްޑިވިއަން އިން ނިންމި ވަރަށް ރަނގަޅު ނިންމުމެއް ކަމަށާއި، އޭޓީއާރު މަރުކާގެ ބޯޓްތަކަކީ ތިމާވެއްޓާއި ރައްޓެހި، ވަރަށް ހަރަދު ކުޑަ ބޯޓުތަކަކެއް ކަމަށެވެ.

މިކަމާއި ގުޅިގެން ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ކުރެއްވި އެކްސް ޕޯސްޓެއްގައި ވިދާޅުވެފައި ވަނީ މިއަހަރު ނިމުގެ ކުރިން ދެ ބޯޓް ރާއްޖެ ގެނެވޭނެ ކަމަށާއި، ރައީސް ޑރ.މުހައްމަދު މުއިއްޒުގެ މި ސަރުކާރުގެ ވިސްނުމަކީ މޯލްޑިވިއަން ޒަމާނީކޮށް ކުންފުންޏަށް ހެޔޮބަދަލެއް ގެނައުން ކަމަށެވެ.

މޯލްޑިވިއަން އިން އޭޓީއާރު 600-42 މަރުކާގެ ދެ ބޯޓް ގެނައުމަށް ސޮއިކޮށްފައިވާއިރު މި ސަރުކާރުގެ އަމާޒަކީ ދިގުރާސްތާއަށް ދަތުރުކުރެވޭ ވަރުގެ ބޮޑަތި ބޯޓްތައް ހޯދާ ރާއްޖެއަށް ފަތުރުވެރިން ގިނައިން އަންނަ މަންޒިލްތަކަށް އަމިއްލަ ޤައުމީ ފުލައިޓްގައި ދަތުރުތައް ކުރުމެވެ.

އެގޮތުން މިހާރު ސަރުކާރުން ވަނީ ބޮއިން 8-787 ޑްރީމް ލައިނާ މަރުކާގެ ބޯޓެއް ކުއްޔަށް ނަގަން އިއުލާނުވެސް ކޮށްފައެވެ. ގައުމީ އެއާލައިނުގެ އޮޕަރޭޝަނަށް ވައިޑް ބޮޑީ ބޯޓު ތައާރަފު ކުރުމަކީ ރައީސް މުހައްމަދު މުއިއްޒުގެ ވައުދުތަކުގެ ތެރޭގައި ހިމެނޭ ވައުދެއްވެސް މެއެވެ.